Ижез шунтӥзы шудонъёс

Related Articles

• «Лудорвайын» ӧс кусыпъёс волялозы 0 30.Ноя
• Дунъет сётэмын, ужпумъёс чакламын 0 15.Июн
• ДаУР: Удмуртия — Ижкар гинэ ӧвӧл 0 11.Сен

Озьы ярмаркае вуттэмын вал 2 сюрслэсь ятыр небыт шудонъёс.

Тодмо луизы Выль арлы сӥзем «Ӵошен — шунытгес!» конкурсын вормисьёс. Отын кужымзэс мертазы Ижын улӥсьёс но огазеяськонъёс.

Вожвылъяськонлэн куронэз вал одӥг: Выль ар праздниклы шоркарез шулдыргес, яркытгес кароно. Со понна городысь калык резь-куаж керттӥськиз, вуриськиз, пужъятскиз. Озьы ярмаркае вуттэмын вал 2 сюрслэсь ятыр небыт шудонъёс. Соосты вузаса, люкаськиз 314 сюрс манет.

— Ачим но басьтытэк ӧй чида — алигес нуноке вордскиз. Ӧжыт будӥз ке, шудонэз одно ик солы кузьмало, — вераз Иж городлэн йырыз Юрий Тюрин. —  Люкам уксёен Ижысь 69 номеро нылпи садлы вертикализатор басьтӥмы. Табере отысь нылпиос котькуд нунал быгытъёссэс золъялозы, тазалыксэс юнматозы.

Ярмарка калыклы ярам, лэся. Данэз будэ — кылем арын отчы 800 адями пыриськиз ке, туэ — 2 поллы тросгес. Огазеяськонъёс но шаплы кариськизы — 208-эз городэз чеберъяз. Бадӟым вуз карон центръёс сяна, вормисьёс пӧлы шедизы, кылсярысь, 24, 83 номеро гимназиос, 11-тӥ нылпи сад, филармония но мукет.

Ольга Корепанова

Туспуктэм: vk.com/izhfest