Гын сапегез сӥлы карон, нунал куспын выж лэсьтон но егит семьяослы музъем висъян

Удмурт Дунне
By Удмурт Дунне Февраль 9, 2016 12:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нош мар луэ тӥляд ёросады? Ивортэ!

Сюмси

 20 арзылы 20 концерт

Ёрос центрысь «Орфей» нылпи коллективлы туэ 20 ар тырмоз.

Кызьы вераз коллективлэн кивалтӥсез Марина Гричик, котырес лыдпусэзлы сӥзьыса, ар куспын «Орфей» 20 концерт пуктоз. Нырысетӥ концертсэс кылем арня пумын Кильмезьысь Орловской нылпи юртын возьматӥзы. Пумиськон дыръя артистъёс нылпи юртысь пиналъёслы «Что такое Родина? Сокровенное…» альбом кузьмазы. Асьсэ киын лэсьтэм альбом

П. Чайковскийлэн 175 ар тырмонэзлы сӥземын, отчы ик пыртэмын Екатерина Гричик но Павел Виноградов егит артистъёслэн кылбуръёссы.

Можга

28 пиос но 42 нылъёс

Можга ёрос больницаысь роддомын кылем толэзь куспын 70 пинал вордскиз.

Кылем арын оптимизация чотын Удмуртиын 9 нылпи ваён юртъёс ворсаськизы. Нош Сарапулысь, Воткаысь, Глазовысь, Эграысь, Уваысь, Можгаысь но Ижысь нылпи ваён юртъёс паськытазы. Можгаысь роддомын 30-зэ пиналэз городын, 25-сэ Можга ёросын улӥсь анайёс вайизы. Быдэн одӥг пиналъёс вордскизы Грак но Алнаш ёросъёсын улӥсьёслэн, 8 тэшкылилы узырмиз Вавож ёрос, 5 муртлы — Кизнер. Вань та ёросъёсысь нылкышноос табере нылпи ваё Можгаын.

Сарапул

Гын сапег шунтэ, эшъяськытэ

Дулесово гуртын гын сапеглы сӥзем ужрад ортчиз.

Кылем арнянуналэ ёросысь 8 муниципал кылдытэтъёсысь куноос Дулесовое люкаськылӥзы. Та гуртысь культурая юрт котыре нимысьтыз азбаръёс кылдытӥзы.  Одӥгаз бызьылӥзы-тэтчазы, мукетаз нылпиос шулдыръяськизы, куинетӥяз — чай сектазы, ас пыжиськемъёсынызы куноятӥзы ӟучъёс, удмуртъёс, бигеръёс.

Бадӟым шулдыръяськонлэн шорсюлмыз герӟаськемын вал гын сапеген. Культурая юртысь сцена вылын та шуныт пыдкуклы сӥзем дефиле ортчиз. Шумпоттӥзы Дулесово гуртысь нылпи садэ ветлӥсьёс. Гын сапегъёсазы пӧртэм выжы калыкъёслэн пужыоссы пуктылэмын вал.

Ужрадлэн кыкетӥ люкетаз такмак кырӟаны быгатӥсьёс вожвылъяськизы. Арганэн шудыны быгатэменыз но жингрес куараеныз паймытӥз Дулесовоысь ик Егор Макшаков.

Шаркан

Тэк пукисьёс ӧвӧл

Ёросысь Дышетонъя центрын та вие осеменаторлы дышетскисьёс люкамын.

Центр юн кусып возе ёросысь калыкез уже интыянъя центрен. Ужтэк кылемъёс пӧлысь 13 мурт мылкыд кариз осеменаторлы дышетскыны. 4 толэзь тодон-валан люкамзы бере соос выльысь берытскозы вордскем гуртъёсазы. Егит специалистъёсты чидатэк витё «Луч», «Мир», «Восход», «Исток» хозяйствоосын, Павел Киселёвлэн фермер хозяйствояз. Одӥгез дышетскись дораз, пе, дасо мында пудо вордэ. Скалъёсызлэсь лыдзэс будэтон вылысь нимысьтыз дышетсконо кариськем.

Матысь дыре центрысь партаос сьӧры пуксёзы 21 воргоронъёс, соос тракторист-машинистлы дышетскозы.

Дэбес

Выж лэсьтӥзы нунал куспын

Сенькагуртын улӥсьёс арзэс, выль выж вылтӥ ветлыса, пумитазы, шуыны луоз.

Январь толэзе Сенькагуртын улӥсьёс доры сюрес усьтӥзы. Туннэ нуналлы пичи гуртын 6 мурт улэ, пӧлазы вань арлыдоос но, ужась калык но, школае ветлӥсьёс но. Гуртэ нуись сюресэз лэсьтон борды «Турнес» хозяйство басьтӥськылӥз вал. Угось арлы быдэ жалем пудо сиёнзэс Сенькагурт котырысь гуосы тыро. Но кутскем ужзэ пумозяз ӧз вутты. Гуртоослэсь сюлмаськонзэс ёросысь кивалтӥсьёс кылӥзы — коньдон висъязы. Ёросысь сюрес лэсьтӥсьёс одӥг нунал куспын гурт котырысь выжез сэрттӥзы но, выльдӥзы но.

Балезино

Тодэ ваёнъёс кино пыр

Карсовайысь библиотекаын кинолы сӥзем арез усьтӥзы.

Со понна «Паймымон укно — кино» адӟытон дасязы. Совето Союзысь кинолэн кылдэмез, артистъёс сярысь гожъямъёсты нимысьтыз стендэ люказы, тужгес тунсыкъяськись муртъёслы викторина малпазы. Кызьы ивортӥз библиотекаен кивалтӥсь Наталья Васильева, быдэс ар ӵоже пӧртэм ужрадъёс ортчытыны чакламын. Кылсярысь, апрель толэзе кинорежиссёрлы, актёрлы, писательлы но сценаристлы Василий Шукшинлы сӥзем ӝыт радъялозы, нош сентябрь толэзе вераськозы театрысь но киноысь актриса Фаина Раневская сярысь.

Юкаменск

Пыэдэн нюръясько шудыса

Кылем ар пумын Палагай школалэн азбараз хоккеен шудон инты кылдӥз.

Йӧ вылын нискылан сярысь кичӧлтонэн потэм школаын ужась завхоз Рафис Абашев. Ӟеч малпанлы дурбасьтӥзы пиналъёс но соослэн анай-атайёссы. Йӧ кисьтыны юрттӥз «Куркан» огазеяськонлэн кивалтӥсез Булат Абашев, тылпу кысон машина висъяса. Пиналъёс мугорзэс кыдатонлы табере бадӟымгес саклык висъяло. Нылъёс нискыланы дышетско, пиос вож-маськыса хоккеен шудо. Нылпиослэсь бере уг кылё мумы-бубыоссы но. Пусйыны кулэ, хоккеен шудон инты та дырозь ёрос центрын гинэ вал, ӟеч уженызы палагайёс мукетъёслы но адӟем карымон луо.

Сьӧлта

Кочыш гурт выльдӥське

Гуртэ пуктӥськыны мылкыд карись 25 семьялы музъем висъямын.

Сюромошур (гуртоос сое Кочыш шуо) муниципал кылдытэтысь валтӥсь специалист Тамара Кольцова верамъя, гурт котырысь 56 гектар музъем выль юртъёс пуктыны висъямын. Та вакытэ Центральной ульчалэн огпалаз выль коркаос сыло ни. Улыно-вылыно 2 юртэ тыл пыртонэз гинэ кылемын. Со сяна, та гуртын кылдозы на Полевая но Цветочная выль ульчаос. Кочышысь сяна, пуктӥськон борды мыло-кыдо басьтӥськизы бускель Аяшур гуртын но Ижевскын улӥсьёс. Висъям музъем чакламын 70-лэсь ятыр хозяйстволы, юртъёс котырын луозы на шутэтскон но мугор кыдатон интыос, нылпи площадкаос, вуз карон юрт.

Дасяз Валентина Емельянова

 

Удмурт Дунне
By Удмурт Дунне Февраль 9, 2016 12:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<