Гурт тол шудонъёсы Гондыр возьма ни

Удмурт Дунне
By Удмурт Дунне 9 февраля, 2016 13:23

Эгра ёросын улӥсьёс дэмен дасясько шаерысьтымы гурт спортсменъёсты пумитаны. Март толэзьлэн нырысетӥ арняяз Эгра каргуртын ортчозы 22-тӥ Гурт тол шудонъёс. Бадӟым ужрадлы дасяськонлэн мынэмез сярысь пыр-поч мадиз ёрос администрациысь мугор кыдатон культурая но спортъя ёзэн кивалтӥсь Николай Мерзляков.

Эграын тол шудонъёслы лэсьтӥське куас база.

Эграын тол шудонъёслы лэсьтӥське куас база.

— Гурт шудонъёслы дасяськонэз шаерысьтымы нимысьтыз кылдытэм комиссия эскере, — вера Николай Мерзляков. — Валлян гинэ Эграын бадӟым кенешон ортчиз,  спортсменъёс но куноос понна дасям интыос эскеремын. Куд-ог лэсьтӥськон ужъёс йылаз-пумаз вуттымтэ на ке но, куно пумитаны ёросмы дась ни, угось толэзь ӵоже вань шекъёс тупатъямын луозы. Куас базаез сӥё-дано усьтон ужрадэз ортчытыны чакламын 3-тӥ мартэ.

— Гурт тол шудонъёслы кутскон сётэмын вал ӵапак Эгра ёросын кыдёкысь 1994-тӥ арын.

— Со вакытэ гурт спортсменъёслэсь ӵошатсконзэс радъяллязы, шуыны луоз, дасез вылын. Угось ёросамы куно пумитан интыос, спортзалъёс вал ни, куасэн бызьылон сюресъёсты волятыса возизы. Ёросмылы азинсконъёс басьтыны юрттӥз мувӧй поттон удыс. Бӧрысьгес ини куно пумитась ёросъёслы толалтэзэ куас базаос, хоккеен шудон коробкаос лэсьтылӥзы, нош гужемзэ — туала куронъёслы тупась стадионъёс. 2001-тӥ арын милям шумпотонмы дурыныз пачылаз: Эграысь выль стадионын гужем шудонъёс ортчизы. Собере шаерысьтымы вылӥ кивалтӥсьёслы трос пол вазиськылӥмы, тол шудонъёсты дорамы выльысь ортчытыны курыса.

— 1994-тӥ арын ортчем шудонъёслэн утисьсы (талисманзы) Гондыр вал, спортсменъёсыз туэ кин пумиталоз?

— Гондырмылы ми синмаськемын. 1980-тӥ арын Москваын ортчем гужем но 2014-тӥ арын Сочиын ортчем тол Олимпиадаослэн утисьёссы Гондыръёс вал. Та пӧйшур ик 22-тӥ Гурт шудонъёсын но кузёяськоз. Ёросъёсысь командаосты пумитаны нимысьтыз адямиос быръемын, соосын семинаръёс ортчытэмын.

— Ма вылез луоз та шудонъёсын?

— Спортъя ӵошатсконъёс ваньмыз азьвыл аръёсы кадь радъяськозы. Куноосты пумитан интыосын (школаосын но нылпи садъёсын) ваньмаз сямен выльдон-тупатъян ужъёс ортчытэмын. Куасэн бызьылон сюресъёсмы гурезетӥ ортчо. Ӵошатсконлэсь куронъёссэ лыдэ басьтыса, лыжнялэсь куд-ог интыоссэ паськытатӥмы, 1 но ӝыны иськем сюресмы югдытӥське. Та вакытэ сюлмаськыто куас сюрес вылтӥ тюбинген нискыланы яратӥсьёс. Соос лыжняез куашкато, спортсменъёсын шуккиськыны быгатозы шуыса, уг но малпало, лэся. Калык пӧлын валэктон уж ортчытӥмы, но пайдаез уггес шӧдӥськы ай. Хоккеен шудон интымы ӵыжак-выль ӧвӧл ке но, шумпотыса вераны быгатӥсько, вань командаосты туэ нимысьтыз дасям шуныт кабинаос витё, мисьтӥськонэз но вань. Азьвыл аръёсы Гурт шудонъёсын таӵеез ӧй вал на.

— Куно пумитась ёрослы луонлык сётӥське спортысь вань амалъёсъя ӵошатсконъёсы пыриськыны. Эгра команда дась-а бадӟым вожвылъяськонлы?

— Гурт шудонъёсын Эгра ёрослэн командаез котьку но азьветлӥсьёс пӧлын луэ. Тужгес бадӟым вормонъёсмы толалтэ луо. Кылем арез верано ке, группаосын шудонэз ӧз ортче вал хоккеистъёс но нылкышно баскетболистъёс. Туэ вань амалъёсъя ӵошатсконъёсы пыриськомы. Эгра ёрослэн командаяз 72 мурт юнматэмын, со тужгес бадӟымез луоз.

Спортын вормон басьтон понна ёрослэн огазеям командаеныз сборъёс ортчытоно вал. Но берло аръёсы команда люканы туж секыт луиз, троссэ спортсменъёсты ужан интыосысьтызы уг мозмыто. Бюджет удысын ужасьёс ласянь гинэ капчигес. Нимысьтыз ушъяме потэ ёросысь кивалтӥсьёсты — тренировкаосы потало. Соос дартсэн шудозы, ыбылӥськозы но куасэн бызьылозы. Нылкышно кивалтӥсьёсмы ёросысь спортсменъёслы но адӟем карымон луо.

Монэ сюлмаськытэ спортсменъёсты куас база дорозь нуон-ваён. Транспортлэсь ветлэмзэ умой радъязы вал толалтэ Балезиноын, гужем Воткаын ортчем ӵошатсконъёс дыръя. Спортсменъёсты школаосы интыяломы, нош куас база дорозь 3 иськем мыноно. Ӝыны часлы быдэ нимысьтыз автобусъёс отчы ветлозы, Гурт шудонъёсы пыриськисьёс дунтэк вуыны быгатозы.

Валентина Емельянова

Туспуктӥз Александр Караваев

 

 

Удмурт Дунне
By Удмурт Дунне 9 февраля, 2016 13:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<