Быронэн ваче син

Удмурт Дунне
By Удмурт Дунне Февраль 24, 2016 09:37

620 сюрс адями ожмаськиз мурт музъем вылын

Афган музъем вылын Кияса ёросысь 30 пала пиос ожмаськизы. Соос пӧлысь одӥгез Владимир Тукаев, али со Уддяди школаын технологилы дышетэ.

DSC_7777

Афган оже ветлэм В. Тукаев дышетэ Кияса ёросысь Уддяди школаын.

— Пичи ожъёсысь ветеранъёсын пумиськылӥськом Афган музъем вылысь войскоосты поттон нуналэ, 15-тӥ тулыспалэ, озьы ик 23-тӥ тулыспалэ, Пограничникъёслэн нуналазы, 28-тӥ куартолэзе, — шуэ Владимир Наумович. — Улонысь кошкем эшъёсмылэн шайгу вылазы ветлӥськом, отчы сяська тыриськом. Берло аръёссэ ёросысь «афганецъёслэн» огазеяськонэнызы кивалтэ Владимир Соловьёв. Солэсь азьвыл та ужез нуиз Николай Неклюдов. Жаляса верано, со улонысь кошкиз ини. Николай Васильевич юромо Кияса черкогурт шоры ик БМП вайыса пуктӥз вал. Со синпелет али но сылэ, Афганистанын но Чечняын ожъёсты буре вайытэ. Ёросысьтымы администрация но егитъёсын ужанъя отдел милемлы бадӟым саклык висъяло, 23-тӥ февраль азьын котьку ик Кияса черкогуртын митинг ортчыто. Отчы дышетскись нылпиосты но потто, спортэн шудонъёс ортчытъяло, милемыз чаен утялто.

Монэ армие 1981-тӥ арын нуизы. Мон Забайкальее пограничнике сюри. Ар ортчыса, 200 пала пиосты, самолётэ пуктыса, Узбекистанэ нуизы. Отысен тодӥм ини: милемыз нуо Афганистанэ.

Отчы вуыса, тужгес но паймимы куазьзылы, сыӵе вошъяське вылэм. Асьмеос пӧсьлы дышемын ӧвӧл ук. Нуназе 30 градуслэсь ӝокыт возиське, нош уйин кезьыт кариське. Ми, егит пиос, война мынэ шуыса, тодӥськом ке но вал, романтика луоз, малпамы. Нош отын ожмаськон, бӧрдон но виылон. Декабре лымы ӧй вал на отын. Котыр луо, гурезьёс, пуштылэм машинаос но коркаос. Нылкышноос паранджаен ветло. Отын нокинэ но, пичи-а тон, бадӟым-а, нылкышно-а, воргорон-а, чакласа уг уло, ыбыса кушто но тӥни. Куазь сямен ик, адямиос но вошъясько. Нуназе соос тонэн артэ ульчаетӥ вамышъялозы, чырткемъяськозы, нош ӝытазе тон шоры ик тачыр ыбылозы. Ульчаын лошъяськылӥзы чилясь арбериос но синмез кыскись шудонъёс. Кылсярысь,  огез эшмы мынон сяменыз пыд улысьтыз чильк-вальк кисьтаськись бадӟым термосэз ӝутӥз. Мазэ-созэ валаса ик ӧм вуттэ, син азьын со шедьтосэныз валче пуштӥз. Оген ульчае потаны ик  ӧз лэзьылэ. Ми, сапёръёс, минаосты утчаса,  бусыостӥ, гуртъёстӥ но гурезьёстӥ ветлӥмы.

Воткинскысь Андрей Мерзляков командирмы вал. Андрей сӧсырмыны шедиз. Улонэн люкиськонзэ шӧдыса, дыр, бќрдыса ик шуиз: Тукай (солдатъёс мыным таӵе кушем ним сётӥзы), тонэ мон уг адӟы ни, дыр.  Андрей али ке но ми понна егит, чырткем, таза но чебер. Солэсь тусбуйзэ мон утьыса фотоальбомам возисько. Командирмы котькулы 28 аресъем кылиз.

Бертонмы вуиз но, 1984-тӥ арын тулыспал толэзе милемыз Афганистанысь пичиен-пичиен поттаны кутскизы. Ми бере лыктэмъёсты  кельтӥзы на. Вуж Тӥгырмен гуртысь Лёня Камашевлы эшшо ӝыны ар служить карыны кулэ на вал. Мон кошкисько, доре бертыны потэмын шуыса, адӟиз но синвуаськиз. Жаль вал мурт дуннее кельтыны. Ваньзылы вордскем гуртазы бертыны мед кылдоз шуыса, Инмарлы тэльмырыса, потӥмы. Лёняен али ке но эшъяськиськом, нуналлы быдэ сямен телефон пыр вераськиськом…

Ёросысьтымы кыкез эшъёсмы — Дмитрий Никифоров но Вениамин Беспалов — афган оже бырыны шедизы. Соослэсь нимъёссэс калык сюлэмаз возе. Кияса черкогуртысь но Вуж Тӥгырмен гуртысь ульчаос соослэсь нимъёссэс нулло. Афганистанын 10 ар пала ожмаськон мынӥз. Кӧня пиос быризы! Кинлы кулэ вал со война? Мыным удалтћз, улэп кыли. Рая кузпалэным кык пи вордӥмы. Кышноелэн сузэрез улонысь кошкыса, солэсь но кыкто нылъёссэ быдэ вуттӥмы.

Владимир городысь эшмы Владимир Сысоев Афганистанын ожмаськеммы сярысь трос книгаос поттӥз ини. Мыным 4-зэ келяз. Со ялан утчаське, выльзэ шедьтыны тырше. Ставрополь городлэн мэрез луыса ужа землянкаын артэ кӧлам эше Николай Борисенко. Мон со доры кунояны но адӟиськыны огпол вуылӥ. Эшшо но адӟиськом на шуиськом вал но, улон воштӥськиз, сюрес вылэ азьло сямен потаны уг луы ни.

Любовь Тихонова

 

 

 

 

Удмурт Дунне
By Удмурт Дунне Февраль 24, 2016 09:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<