Бусыез шобыртэ нюлэс…

Удмурт Дунне
By Удмурт Дунне Февраль 8, 2016 09:34
027767,природа,лес,времена года,зима

Берло 3 ар ӵоже 50 сюрс гектар бусыос кузётэм кылизы.

1990-тӥ арысен шаерамы 400 сюрс гектар бусыос нюлэсэн шобырскизы.

Кылем ар пумын Президент Владимир Путин Федерал Собранилы вазиськоназ  пусйиз, миллион гектаръёсын аналтэм бусыос луыны кулэ ӧвӧл шуыса. Пӧрмостэм кузёлэсь музъемзэ талано но  гурт ужен рос-прос вырись адямилы сётоно. Но шаерамы аналтэм бусыосты басьтӥсьёс но уг шедё ай. Гурт удысъя но сиён-юонъя министерствоысь будосъёсъя но музъем кусыпъёсъя управлениен кивалтӥсь Николай Широбоков верамъя, фермеръёс но умой музъемез басьтыны выро. Пашмемез шоры нокин уг учкы.

— Берло 3 ар ӵоже 50 сюрс гектар бусыос кузётэм кылизы, — шуэ Николай Алексеевич. — Кылем арын 21 сюрс гектар музъем ӧз кизиськы ни. Якшур-Бӧдья, Балезино, Каракулино ёросъёс музъемзылэсь куштӥськизы, хозяйствооссы банкрот кылемен. Артэ юн хозяйствоос ужасалзы ке, бусыоссэс, оло, киултысалзы. Вавож ёросын ас вакытаз одӥг гектарезлы но пашмыны ӧз сётэ уго. Отысь кужмо эштосъёслы музъем уг но тырмы. Нош ляб хозяйствоос кызьы муртлэсьсэ гырозы? Асьсэлэсь бусыоссэс утялтыны-калтыны техниказы но, уксёзы но уг тырмы. Мар веранэз ни 3-4 ар буш улӥсь музъем сярысь. Отчы писпу выжызэ лэзе. 1 гектарзэ нюлэсэн шобырскем бусыез порылон, гырон понна 14 сюрс манет кулэ. Кинлэн мултэс уксёзэ кисьтэмез потоз? Зэм, шаерысьтымы вылӥ кивалтӥсьёс бусыосты паськытатыны косо. Но туннэ валтӥсь интыын мукет ужпум: кизёно бусыосмес ӧвӧл кулэстоно. Йылэм интые уго ялан синӥськом. Ферма котыре инвесторъёсты кыскыны капчи ке, лудэ соосты поттыны секытгес.

Зэм, куддыр сюро ик куштэм музъем борды басьтӥськыны мылкыд карисьёс. Кылсярысь, Каракулино ёросысь банкрот кылем «Троицкое» хозяйстволэсь 1,5 сюрс гектар музъемзэ миым сӥзьыл гырись шедиз ни. Но паймоно кадь: каракулиноос пӧлысь нокин ӧз кутскы — юрттэт вуиз артысь Сарапул ёросысь «Мир» хозяйствоысь. Туэ утялтэм музъемзэс кизьыны медо. Но со сяна, ёросын эшшо 2 эштос банкрот кылемын на. Таос юн хозяйствоосын артэ ке но, нокин соос борды уг кутскы.

— Пудозэс сюдыны асьсэ бусыоссы тырмо бере, муртлэнэз шоры уг учкыло, — валэктэ Каракулино администрациысь гурт удысъя управлениен кивалтӥсь Сергей Шарычев. — Куд-ог бусыосын пичи пинал ӝуждаесь пужымъёс будо ни. Кузёоссэс Россельхознадзорысь специалистъёс кыскало ик. Зэм, та югдурез уг вошты. Но мукет кузёосты аналсконлэсь возе.

Россельхознадзорлэн Киров улосъя но Удмурт Республикая управлениысьтыз музъем кусыпъёсъя ёзэн кивалтӥсь Светлана Кубашева верамъя, берло 2 ар ӵоже бусыосын писпу будэтэм пумысен 287 муртлы предписание гожтэмын, соослы ог 3 миллион манет тыр штраф лякемын. Нюлэсэн шобырскем 2 сюрс 718 гектар пӧлысь та дыр ӵоже 0,7 гектарез гинэ утялтэмын, выльысь кизьыны тупамон каремын. Озьыен, штраф но нокинэ уг курдаты ни. Сое тырыны уго капчигес, музъемез утялтонэн ӵошатыса. Фермеръёс пӧлын но музъемзылэсь куштӥськисьёс йылӥзы. Музъемзэ аналтӥз Глазовысь техникая колледж но.

— Уноез фермеръёс музъемен выриськом шуо, нош асьсэос трос аръем турын гинэ  кизё. Сыӵе азьын жуг-жаг сяна уг буды. Но соосты кыл кутон улэ кыскыны нокызьы но уг луы — ужамъясько уго, — вера Светлана Кубашева.

Югдур капчи ӧвӧл. Таин сэрен 26-тӥ январе Удмуртилэн Тӧроез Александр Соловьёв люказ ёрос но город йыръёсты. Роспотребнадзорен валче ужано, аналтэм но нюлэсэн шобырскись бусыос матысь аръёсы медаз луэ, шуиз Александр Васильевич. Пудо йырез йылтон сярысь ужпум пуктэмын бере, пудо сиён дасяны бусыосты но паськытатытэк уг луы.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Февраль 8, 2016 09:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<