Бомжъёслы приют усьтӥськиз

Related Articles

• Юрттэт 0 09.Фев
• Иван Черезов: Удмурт шаерлэсь мӧзмоно 0 04.Авг
• Сьӧлта ёросэз тодмо кароз тетера 0 06.Июн

Бомжъёслэн лыдзы Ижын 500-лэсь ичи ӧвӧл.

Ижлэн но Удмуртилэн епархиез, волонтёръёс кичӧлтэмъя тол кутсконын шоркарамы усьтӥськиз «Тёплый кров» приют. Со чакламын бомжъёслы.

Ижысь Успенской черк сюлмаське соослы палаткаос пуктыны, кӧлон инты висъяны, шунтыны но сюдыны, тазалыксэс эскерыны. Но та палаткаос улысь музъем черклы сётэмын вал огдырлы гинэ, ӝоген со дыр йылпумъяськоз, палаткаос пуктыны уз яра ни. Кытчы кариськозы бомжъёс?

Зэм, та приют сяна, Ижын вань бомжъёслы чаклам социальной гостиница. Но калыкез утёнъя, семья но демография политикая министр Ольга Корепанова верамъя, отын инты усьтэмын 20 муртлы гинэ — ар куспын юрттэт сётӥське ог 80 адямилы гинэ. Нош бомжъёслэн лыдзы Ижын 500-лэсь ичи ӧвӧл. Ваньзэсты та гостиницае пыртыны луонлык ӧвӧл. Югдурысь потон амал утчано, угось кылем арын кынмыса но сютэм улыса быриз 56 бомж. Тужгес но сюлмаськытэ соослэн йыруж лэсьтэмзы. Югдурез утёнъя министр Александр Первухин пусъемъя, кылем арын бомжъёс «пӧраллям» 170 йыруж. Улон интытэм но коньдонтэм муртъёс калыклы кышкытлык кылдыто. Александр Соловьев Правительстволы но Иж городлэн администрациезлы вазиськиз, бомжъёслы юрттэт сётонъя интыос радъяны косыса.

Ижлэн но Удмуртилэн епархиез шоркар администрациен огкылэ вуизы: «Тёплый кров» приютлы сётоно Ижысь Ленин ёросысь вуж школалэсь юртсэ. Министр Ольга Корепанова шуиз:

— Юрт тупатъямез кулэ каре. Элькунлэн но, шоркарлэн но бюджетъёсазы талы уксё ӧвӧл. Соин ик та юрт сётэмын луоз Ижлэн но Удмуртилэн епархиезлы. Черк луонлык шедьтоз юртэз выльдыны.

Елена Никитина