Балезино ёрос Кернюра гурт: Кыкетӥ шокчон

Удмурт Дунне
By Удмурт Дунне 19 февраля, 2016 13:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нылпиос вуо ке, гуртын выльысь шулдыр луэ

Балезино сюрес вылысен Кернюра гурт кырымпыдэс вылын кадь адӟиське. Но отчы кожонэз ум шедьтӥське — сюрес кузя солань но ортчим, берлань но  берытским ни. Музъем вылэ акшан васькыны кутскемын — тодымтэ интыын йыромыны кема ӧвӧл.

SONY DSC

Фермаын возьмаськись В. Перевощиков.

 Ку яра пӧяськыны?

Вуим гуртэ пырон азьысь ферма доры. Паськыт сюреслэсь со ог 100-200 метрын гинэ палэнын сылэ. Гидысь думетын ветылъёс сыскиськыса сыло, шоре уг но учко — муртъёс пыриллям шуыса, кӧберзы но ӧвӧл, лэся. Но ӧсэтӥ пырем-потэммес шӧдыса, дорамы лыктӥз возьмаськись. Ассэ Василий Перевощиков шуиз.

— Уйин возьмаськись мон, — веранзэ мытӥз воргорон. — Вераны но уг валаськы ни, кӧня арзэ ужасько татын. Велосипедэ вань дыръя ужаны Исаке ветлӥсько вал — Кернюраысь отчыозь 7 километра пала. Отын но фермаын ик уйин возьмаськись вал. Но велосипедэ тӥяськиз — пыдын нуналлы быдэ солань-талань ветлыны акыльтӥ.

Ветылъёсты сяна, пичи кунянъёсты но чакласько, шуэ воргорон. Нуназезэ бӧксӥсьёсты сюдыны 2 нылкышноос ветло, пе, одӥгез — Василийлэн кузпалыз. Нош кыкетӥезлэн кунян сюдӥсь нылкышнолэн мужикез — та фермаын ик механик.

— Озьы семьяен-семьяен ужаськом, куддыр кышноеным ужын гинэ адӟиськиськом но: со бертэ — мон лыктӥсько, мон лыктӥсько — со бертэ, — серекъя Василий.

Возьмаськись уг ваты: кышкан вакытъёсыз но куддыр луыло. Фермазы сюрес дурын ик сылэ бере, мурт пырасьёс вань.

— Ог куинь нунал талэсь азьло гинэ легковой машинаен кык мужикъёс пыразы, — тодаз вае В. Перевощиков. — Ӟуч верасько. Мынэсьтым ма но со юалляськем каро. Огнад-а, пе. Олокытысь пӧяны валай: эше вань на, пӧй, тани-тани лыктыны кулэ. Огнамме валасалзы ке, незнай, мар луысал меда?

Василий Перевощиков Кернюрае меӵак сюрес возьматӥз: гуртамы машинаен пырась-потась трос ӧвӧл, соин но, лымы пельтэ ке, сюресэз шуак адӟыны уг луы ни, пе.

Маин висъясько лавка но магазин?

Гуртысь одӥг гинэ ульча кузь-кузь кыстӥське. Коркаос ӧжыт ӧвӧл ке но, тросаз улӥсьёсыз ӧвӧл ни — ӟезьы азьёссы лымыен тырмемын.  Тылъёс ог дасо коркан сяна уг ӝуало.

— Вазен гуртамы 60 пала  корка вал, — тодаз вае Галина Князева. — Калык татысь кылем даурысь 90-тӥ аръёсы кошкыны кутскиз. Туж кужмо «Авангард» хозяйствомы быриз угось, уж ӧй вал. Али кин но со ветлэ Исакысь «Восходэ». Кӧня ке мурт  ужа «Развитие» эштосын — таизлэн контораез Ушурын.

Кернюраын ноку вылымтэ школа, нылпи сад. Медпункт усьтӥськылэм ик трахомаен висисьёс трос дыръя. Вылэм лавказы. Со ворсаськем бере егитъёс солэсь юртсэ клуб нерге  карылӥллям. Али со юрт ярантэм луэмын.

— Гуртысьтымы лавка 1975-тӥ аръёсы пытсаськиз ни, — азинтэ веранзэ Галина Владимировна. — Мон но вуз карись вал. Но ужай магазинын, Ушурын. Маин висъяське лавка но магазин? Магазин — со бадӟым. Нош лавкаын сиён-юонэн сяна вуз уг каро.

Галина Владимировна кузпалыныз 2 пи будэтэм. Одӥгез семьяеныз улэ Глазовын. Кыкетӥез пиез кылем Кернюрае ик.

— Глазовысез пие милицаын ужаз, али пенсие потӥз ни, — шуэ нылкышно. — Пичиез первоклассной шофёр, ужамзэ ушъяло. Нош мон туж шумпотӥсько, пиналъёсме ушъяло шуыса. Кыкезлэн ик пиосылэн быдэн 2 нылъёссы. Ӟеч дышетско, ӟеч кивоштӥсьёс будо. Пиос ӧвӧл шуыса, сокем уг ӝожомиськы — юисез уз луы, эсьма. Пиос курытсэ ӟизтыны ярато уга. Гуртамы но сыӵеос вань. Ярам ай, пиосы юон вылэ ӧз чӧлске. Чорыгало, пӧйшурало. Глазовын улӥсез котькуд шутэтскон нуналэ дӥнямы вуылэ. Пиосы ӟечесь бере, кызьы соослэн молодушкаоссы уродэсь луыны быгатозы, — кенъёссэ но ушъя нылкышно.

Малы нылпиос сюрес дурын сыло?

Татьяна Князева — Галина Владимировналэн огез кенэз. Кернюрае бызем Исакысь. Табере та интыослы туж дыши, шуэ. Мукет азе улыны выжон сярысь малпанэз но ӧвӧл. Кернюра котырын инкуазь чебер  — гужемзэ узы-боры, губи бичан интыос трос. Нуналлы быдэ уже ветлэ Ушуре — отысь школаен кивалтэ.

— Гуртысьтымы нылпиос 9-тӥ классозь Ушурын дышетско, нош 10-тӥе мыно ни Исаке, — вера  Татьяна Витальевна. — Бен гуртын школьникъёсмы 3 гинэ.

Кыкез та пӧлысь ветло, пе, Ушуре. 1-тӥ но 5-тӥ классъёсын дышетскись нылъёслы 7 часлы ӵукна рейсовой автобусэ потоно луэ ни, угось ог 6 иськемез пыдын уд ортчы. Школае, валамон, туж вазь вуо — эшъёссэс возьмаса, шып пуко, шудыны нокинэн на. Берлань автобуссы 3 часын ортче ни, нош школаын отчыозь ужало на пӧртэм кружокъёс, секциос.

Исаке пиналъёс ветло школа автобусэн. Таиз пӧртэм гуртъёсысь нылпиосты люка: Люк станциысь, Ушурысь, Кернюраысь… Вуоно арын школа автобус Кернюрае уз пыра ни  — 10-тӥ-11-тӥ классын дышетскисьёс уз луэ.

Егитъёс Кернюрае уг кылё. Тросаз коркаосын уло оген кылем песянай-песятайёс.   Но шутэтскон нуналъёслы ваньмызлэн сямен нылпиоссы вуыло — сиён-юон вайыса кельто, мунчо эсто. Гуртлэн соку кыкетӥ шокчонэз усьтӥське кадь…

Элина Кумачёва

 

 

 

 

Удмурт Дунне
By Удмурт Дунне 19 февраля, 2016 13:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<