Асдун будэ, дун кулэсме

Удмурт Дунне
By Удмурт Дунне Февраль 18, 2016 12:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
036708,магазин Грош,торговля,супермаркет,гипермаркет,прилавок,молоко,продукты питания

Заводъёс 1 килограмм йӧлэз 19,49 манетэн басьтӥзы.

Берло дыре шаерысьтымы хозяйствоос йӧл поттэмлэсь ыштонъёс адӟо. Йӧллы дун ялан усе уго. Таин сэрен миым ноябрь-декабрь толэзьёсы гинэ 90 миллион манет кисыязы ӧз вуы.

Удмуртстат ивортэмъя, 2015-тӥ ар пумын Приволжск федерал округысь 14 улос пӧлын йӧллы закупочной дунъёсъя асьме шаермы 12-тӥ интыын вал (1-тӥ интыын бадӟымез дун). Заводъёс 1 килограмм йӧлэз 19,49 манетэн басьтӥзы. 2014-тӥ арен ӵошатоно ке, та 24 копейкалы ичигес. Со дыре ик тужгес бадӟым дун пукто Самараын — 22,39 манет.

Таӵе секыт югдур кылдэмен, Удмуртилэн Тӧроез Александр Соловьёв кенеш люказ. Отчы пыриськизы ёрос кивалтӥсьёс, переработкаен вырисьёс, гурт хозяйствоослэн кузёоссы.

— Музон улосъёсын, йӧллы закупочной дунъёс ӝутӥськыку, оптовой дун но будэ. Асьме хозяйствоослэсь йӧлзэс дунтэмен басьто, но со вие ик кузятэмлы, йӧлвыллы дунъёс будо гинэ. Йӧллы оптовой дун  воксё но ар пумын 31 манет вылэ тэтчиз. Нош  магазинъёсы со, 40 манетозь будыса, вуэ, — шуэ гурт удысъя но сиён-юонъя министрлэн воштӥсез Евгений Шкарупа. — Со дыре ик хозяйствоосмы йӧл уногес кыскыны ӧдъязы, заводъёс сыр-вӧй кадьёсты уногес поттыны кутскизы.

Озьы узырмо переработка но вуз карон, нош хозяйствоос арысь аре начаре кылё. Евгений Шкарупа верамъя, йӧллэн асдуныз (себестоимостез) ялан будэ уго. Пудо сиён дасяно, уждун тыроно — талы тужгес трос уксё кошке. Бензин, тыл но мукетыз понна уксё кисьтон вань на. Кылсярысь, 1 килограмм йӧллэн асдуныз миым декабре шорлыдын 22,3 манет вал ке, заводъёс сое 19,4 манетэн сяна ӧз басьтэ. Сыӵегес суред арлы быдэ.

йӧл

— Гуртоос 28 процентозь ыштонъёс адӟо, — шуэ Евгений Иванович. — Кылем арын ноябрь толэзе ик 1 литр йӧлэз 22 манетозь ӝутыны кулэ вал. Заводъёс таин сэрен нокыӵе ыштон ӧй адӟысалзы, нош гуртоослы юрттэт вуысал. Но со туэ январь толэзе но 19,76 манет возиське. Со дыре магазинъёсын дунъёс ялан ӝутӥсько.

Азьланяз но тазьы ик луиз ке, гуртоос выль сямен ужаны амал утчалозы. Кылсярысь, дэмен кариськыса, пичиесь йӧл поттонъя заводъёс кылдытозы, йӧл басьтонъя пунктъёс ӝутозы, инвесторъёсты кыскыны кутскозы. Али ик гуртоос араз ог 80 сюрс тонна йӧлэз республикалэн палэназ потто. Нош йӧлмы асьмелэн ӟеч — ог 95 процентэз вылӥ сортъем.

йӧлдун

Удмуртилэн Тӧроез Александр Соловьёв ар пумын гуртоослы вазиськоназ пусйиз вал, 2020-тӥ арозь араз 1 миллион тонна йӧл кыскыны кулэ шуыса. Но азьланяз но йӧл дун ӧз буды ке, палэнысь заводъёсы йӧлмы уногес «бызьыны» ӧдъялоз. Тае кивалтӥсьёс валало. Но Тӧро дорын кенешонын но дунъёсты бадӟыматонъя огъя малпанэ вуыны ӧз быгатэ на.

Елена Сараматова

Туспуктӥз А. Горбунов

Суредъёсты пӧрмытӥз В. Штыкова

 

Удмурт Дунне
By Удмурт Дунне Февраль 18, 2016 12:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<