Ачиз сюдӥсь автобус. Ижысь пыдйылчиосты сюдо, дӥсяло, кӧлто

Удмурт Дунне
By Удмурт Дунне 24 февраля, 2016 12:14

Кыкетӥ арзэ ни Ижетӥ ворттылэ пыд-йылчиослы шуныт дӥсен но пӧсь шыдэн автобус. Нош кураськисьёс городын ог 500 пала лыдъясько.

DSC_0828

Автобус Ижысь ог 500 курась-кисьёсты сюдэ.

Кенос  но, сиськон инты но

Ижын улӥсьёс пӧлын сюлмо адямиос шедемен, Удмурт епархилэн бурд улаз ужаны ӧдъяз автобус. Котькуд вторнике но четверге со потэ сюрес вылэ. Дугдылон интыосыз уг вошъясько: Гагарин урамысь Алексеевский храм котырын но Чугуевский урамысь «Пежо» автосалон мышкын. Пыдйылчиосты утялто православной черкъёсын ужась нылкышноос.

Огпол мон но сьӧразы куриськоно кариськи. 10 часын ӵукна люкаськимы Троицкой соборлэн складаз.

— Та милям кеносмы, — ӝажыосы радэн-радэн интыям дӥськутъёс пӧлын бугыръяськыса, мыняз Валентина. — Та арбериосты ваё Ижын улӥсьёс.

Валентиналы мон но юрттӥськи шуныт дӥськутъёсты  автобусэ ӝоктыны. Автобус пичи ке но, ваньзэ ошылыны инты сюриз. ӝӧк но тусьты-пуньы  чылкытэсь, ваньмыз ӝикыт тыремын.Черкын ужасьёс дыртыто: туннэ, пе, беромиськомы, нош кутоно на ӝук — адямиос кынмозы.  Куазь зэмзэ но ӟырт кезьыт кариськиз. Шуныт возиськем бере кӧттыро адямилы но кезьыт йӧтэ. Гагарин ураме люкаськемъёс — векчи курткаосын, кроссовкиосын, бызырмеменызы тэтчаса сыло, ымныръёссы ик кынмемын ни. Автобусэз адӟыса гинэ, выльысь улӟизы, куспазы маке вераськыны ӧдъязы, мыняны кутскизы. Елена но Валентина дыртыса люкылыны ӧдъязы сӥлен ӝук, гордкушманлэсь салат, пӧсь чай.  Быдэн 2 колды нянь сётъязы. Огез ужбергатӥсь нянен озьы котьку шумпоттэ. Со ноку уг тырмы. Ӵуказе автобус уз лыкты ни кожаса кадь, куанеръёс мешокъёсты ӝог бушато. Кӧттыремзы бере дӥсь но пыдкук доры черодэ султо.

— Дӥсьлэн быдӟалаез нокинлы нокыӵе уг поты: паськытгес но шунытгес ке, уката шумпотыса куто — вылазы золтыны капчигес уго. Туж ёрмо воргорон пыдкутчанлы, — дӥсь пӧлын бугыръяськыса, воргоронлы куртка мычиз Елена.

Пиосмурт шуныт дӥсез дыртыса басьтӥз но мукетызлы черод сётӥз. Мышказ ог 20 адями сылэ на.

Туж пайми, пӧлысьтызы чагыр синмо 3 аресъем пияшез адӟыса. Сютэм кион кадь сиськиз со. Котыраз кышноен карт бергало. Юалляськыны кутскемысьтым, соос шуизы, анай-атаез огдырлы гинэ пияшез кельтӥзы, асьсэос кытчы ке кошкизы. Мумиз-бубиз ужало-а шуыса юамысьтым, посӥськыны ӧдъязы.

— Улон интымы вань, эн сюлмаське. Пияшсэс берлань кутозы, чакланы гинэ кельтӥзы, — вазиз нылкышно.

— Пыдйылчиос гинэ автобус дӥне шунтӥськыны уг лыкто, — нылкышнолы дурбасьтыса кадь валэктыны дыртӥз Елена. — Сиёнлы ёрмисьёс но шедё радазы.

Черодын сылӥсьёслэн котькудӥзлэн аслаз курыт улонэз. Огзэ сӧсырмыны шедем воргоронэз кышноез ураме уллям. Мукетыз воргорон анайзэ утьыны вырон сяменыз пыдйылчие потэм. Мумиз секыт висьыны усем, воргорон операцилы шуыса коньдон люкан вылысь Казане ужаны кӧня ке толэзьёслы кошкем. Со куспын анаез квартиразэс вузам. Номыр юрттымтэ ни  — кулэм. Озьы пиез липеттэк кылем, улэ подъездаз.

DSC_0874

Чугуевский урамын ог 30 адями автобусэз возьма вал.

Кампетлы шумпотон

Чугуевский урамын ог 30 адями автобусэз возьма вал. Уноез — воргоронъёс. Котыразы лачак пуныос гожеръяло. Кураськисьёс асьсэлы мырдэм сюрем шорем няньзэс быжоослы но сёто. Но пуныос трослы кӧттыроесьгес но чебересьгес адӟисько, пыдйылчиосын ӵошатыса.

— Пӧсь сиён  начаръёс-ты уг вошты, адямилыкогес уг кары. Соос дышемын ни урам кузя лошъяськыса, дасьсэ возьмаса улыны. Но юрттытэк но уг луы. Возьмало соос шуныт кыл но сиён, — шуэ Валентина.

Уноез пыдйылчиос «Тёп-лый кров» проект сярысь но тодо. Кезьыт гумыос бордын, тӧл шорын но лымы улын кӧлам интые, липет улэ пырыны луэ. Миым 2-тӥ ноябре, Удмурт епархия сюлмаськемен, Телегин урамысь Инмар Анайлэн Успениезлы сӥзем храм котырын усьтӥськиз 50 адямилы палатка. Ӝыт 20 часысен ӵукна 8 часозь отчы сюрес усьтэмын.

Татын котькудӥзлы кӧлыны небыт выж лёгет сётӥське. Палатка пушкын югыт, шуныт но чылкыт. Сиён но вань. Югдурез утисьёс но артэ.

Психологъёс верамъя, бомж урам кузя 1 арлэсь ичигес лошъяське ке, тупатскыны быгатэ на. 7 арлэсь кема пыдйылчиын ветлӥсь муртэ нокин но номыр уз вошты ни. Ольга Никандровна ульчаын кӧла 2011-тӥ арысен.

DSC_0814

Сӥлен ӝук.

— Кампетэн но куноятӥськоды шат? — палаткае сюрыса, аслаз синъёсызлы оскытэк, киоссэ кузь лэзьыса, вазиз нылкышно.

Пичи мурт кадь пальпотэмысьтыз, котыраз люкаськемъёс но лӧптӥзы, серекъяны ӧдъязы. Кураськисьёс но, социальной ужасьёс но, югдурез утисьёс но — ваньзы огдырлы вунэтӥзы кадь, кин татчы люкаськемын.

— Зэмос праздник кадь, — азьланьтӥз Ольга Никандровна, ческытсэ куртчыса. Синъёссэ ик музысь ӝутыны дӥсьтӥз со, адямиос шоры оскыса учкыны ӧдъяз кадь.

Ольга Никандровна РОВД-ын выж миськисьын ужа. Нош уйлы гумыос бордын шунтӥськыны дыртылэ вал. Табере уйлы быдэ липетэз кылдылэ.

— Коркады ӧвӧл-а? — юасько.

— Квартирае вань, — данъяськыса кадь вазе, но собере куараез чалмытгес луэ, — нылы отын улэ. Картэныз люкиськиз, тюремщикен герӟаськиз. Кулэтэм луи. Но мон кема уло на. Мон улонэз но, адямиосты но яратӥсько. Мыным апреле 54 арес тырмоз ни. Отысен пенсиозь но кема ӧвӧл. Соку улыны кутско ке кутско ни!

Со куспын Ольга Никандровна дӥне воргорон лыктӥз но аслэсьтыз кампетсэ солы сётӥз. Нылкышнолэн коньытэзлы пичи мурт кадь шумпотэмезлы паймыса, лыктӥз, дыр. Татын уго сыӵе шумпотӥсьёсты туж шер пумиталод.

— Татын кӧланы кышкыт ӧвӧл-а? — выжыятӥсько выль тодмоелэсь.

— Мар тон? Кнопкаез зӥбид но, дежурнойёс соку ик юрттыны вуозы. Шыпыт но каньыл татын, тау Инмарлы.

DSC_0898

Ӝажыосы радэн-радэн интыям дӥськутъёс.

Кулонэн улон вискын

Зэм, дежурнойёс верамъя, палаткаын уйин но улон уг кысылы. Пыдйылчиос ялан солань-талань ветло, верасько. Нуналысь нуналэ татын кӧласьёсыз тросгес но тросгес люкасько. Толалтэ урамын кынмыса медаз кулэ шуыса ик, Ижысь епархия сюлмаськиз. Калык но коньдонэн юрттӥськиз. Оглом 530 сюрс манет люкамын вал. Сиён-юонлы, палаткае шуныт кысконлы, эмъюмъёслы тырмиз со. Проектлэн координаторез Валентина Матюшина верамъя, уксё люканы туж секыт. Но ӵапак та проектлы луыса пыдйылчиос, шунтӥськем сяна, ыштэм документъёссэс но выльысь лэсьтыны быгато. Та понна котькуд вторнике но пятницае татчы социальной ужасьёс лыкто. Ольга Никандровна аслэсьтыз документъёссэ лэсьтӥз ни.

— Уноезлэн кураськисьёслэн туж потэ выльысь адямиос радэ султэмзы, — вера Валентина Матюшина. — Но кытчы соос берыктӥськозы? Ужаны кутскон понна документъёс кулэ ук.

Ижын пыдйылчиос понна социальной гостиница ужа. Отчы сюрыны каньыл ӧвӧл — больницаысь справка бичано. Собере, гостиница 20 интылы гинэ чакламын. Палаткае лыктӥсьёслы огдырлы прописка лэсьтыны юртто, соосты уже интыяны малпало.

— Черк адямиослы юрттӥсь луыны кулэ. Кулонэн улон вискын ветлӥсьёс дортӥ синтэмъёс кадь кошкеммы уг луы. Вань кужыммес сётомы соослэсь мугорзэс но лулзэс шунтон понна, — шуэ Валентина Матюшина.

Надежда Рысьева

Туспуктӥз автор

 

 

 

Удмурт Дунне
By Удмурт Дунне 24 февраля, 2016 12:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<