42 секунд уте улонэз

Удмурт Дунне
By Удмурт Дунне 1 февраля, 2016 12:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Эгра каргуртысь тылпулэсь утиськонъя 31-тӥ частьын ужасьёслэн шыпыт нуналъёссы чиньыен лыдъямон луо. Тылпу кысонэ потам сяна, нырысетӥ юрттэт сёто сюресъёс вылын шуккиськон учыре шедемъёслы.

Водитель И. Дорофеев но караулэн кивалтӥсь О. Кожевников.

Водитель И. Дорофеев но караулэн кивалтӥсь О. Кожевников.

Тылпу кысонъя частьысь караулэн 15-тӥ арзэ кивалтэ Олег Кожевников. Вордскемезъя Якшур-Бӧдья ёросысь Дмитриевка гуртысь луэ, улон сюрес сое Эгра каргуртэ вуттӥз. Школазэ йылпумъямез бере мелиораторлы дышетскиз ке но, трактор-машина руль сьӧрын одӥг нунал но ужаны кылдымтэ: дышетскемезъя уж ӧз шедьты. Эгра каргуртысь тылпу кысонъя частен тодматскыны пырем но пыраклы отчы ужаны кылем.

— Тылпу кысћсь луо шуыса, ноку ӧй малпалля, — вера Олег Васильевич. — Нырысь нуналъёс секытэн сётскизы, отӥяз ваньмызлы пумен дыши. Шуизы вал, нырысь 3 арзэ чидад ке, зэмос пожарной луод. Нырысь 3 арзэ огшоры тылпу кысӥсь вал, нош собере караулэн кивалтӥсе пуктӥзы.

Кемалы вунонтэм кылиз 2010-тӥ ар. Кӧс гужеме Арлеть гуртын огкутскемен кӧня ке юрт ӝуаз. Мукет аре Магистральной каргуртысь 2 этажъем 16 квартираем юрт тылын гомаз. Ярано коть, куашкан калэ вуэм коркан улӥсез трос ӧй вал ни, сотэк бадӟым ыштонъёс луысалзы. Эграысь Западной микрорайон ӝуаку, ӝыны каргурт ӵын пушкы ышылӥз. Ёросын бадӟым тылпуос потон дыръя эграослы юрттӥськыны вуо бускель Балезино но Глазов ёросъёсысь эшъёссы, нош куд-ог дыръя асьсэос но юрттэт сёто. Берлозэ потазы Дэбес черкогуртэ, 2 квартираем 3 юрт ӝуаз вал.

Кылем ар но ёросысь тылпу кысӥсьёс понна капчиен ӧз сётскы. «Горд атас» 37 пол потаз, 4 мурт быриз, 8 адями сӧсырмиз. Тылпулэн потон мугъёсыз ӵем дыръя герӟасько вужмем электроприборъёсын я электроезъёсын, урод гуръёсын. Адямиос юонэн эшъясько, тамак пумзэс кысыны вунэто.

Эгра ёросысь тылпулэсь утиськонъя частьын 3 цистерна ву возиське, бадӟым шуг-секытъёс кылдон учырлы эшшо 3 цистерна чакламын на. Тылпу кысӥсьёс спасательёслэсь ужзэс но быдэсъяло. 32 пол потазы сюрес вылын секыт шуккиськон учыръёсы. Калыклы дыраз но валаса юрттэт сётон вылысь тылпулэсь утиськонъя частьын ужасьёс нуналлы быдэ быгатонлыкъёссэс кыдато.

— Тылпу кысӥсьёслэн командазы 42 секунд куспын азбарысь потыны кулэ. Со дыр пӧлысь 27 секундэз дӥсяськонлы висъяське. Шумпотыса вераны быгатӥсько, вань ужасьёсмы та куронэз быдэсто, — шуэ Олег Васильевич.

Шаерысьтымы тылпулэсь утиськонъя частьёсын ужасьёс пӧлын арлы быдэ пӧртэм ӵошатсконъёс, спартакиадаос ортчо. Эграос висъясько ӵын пушкысь адямиез ӝог шедьтыны но солы нырысетӥ юрттэт сётыны быгатэменызы. Вормон басьтыны юрттэ тренажёр залзы. Егитъёс но, арлыдо ужасьёс но отын мугорзэс кыдато. Караулэн кивалтӥсь шуныт кылъёс вераз частьын трос аръёс ӵоже ужасьёслы. Водительын 18-тӥ арзэ тырше Иван Буров, тылпу кысӥсь луыса 15-тӥ арзэ ужа Сергей Исаев, ас ужзэс ӟеч быдэсто отделенилэн командирез Юрий Ившин, диспетчер Ольга Дорофеева но мукетъёсыз.

Валентина Емельянова

Туспуктӥз автор

Удмурт Дунне
By Удмурт Дунне 1 февраля, 2016 12:38 Updated