Марий Элысь Ӟаны гуртысь калык тодматскиз туала удмурт культураен

Удмурт Дунне
By Удмурт Дунне 16 февраля, 2016 09:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
9

Марий Элысь Ӟаны гуртысь «Корни» ансамбльысь пиос.

Палэнысь ке но, одӥг выжыысь

Ортчем шутэтскон нуналъёсы Удмуртиысь егитъёс вуылӥзы Марий Элысь Ӟаны (Карлыган) гуртэ. «Шунды» огазеяськон отын удмурт культуралы сӥзем ужрад ортчытӥз.

Ӟаны музъем вылын уло пӧртэм калыкъёс: поръёс, удмуртъёс, ӟучъёс, бигеръёс. Соин ик, кызьы шуэ гурт калык, музъемзы вань калыкъёслэсь культураоссэс огазе суралтэ но эшъяськытэ.  Соин татын удмурт культуралэн но аслаз шӧмыз. Калык данъяське Кузьма Андреевлэсь нимзэ нуллӥсь школаен. Солы туэ 133 ар тырмоз. Школазэс быдтэмын писательёс Ашальчи Оки, Григорий Медведев, Удмуртиысь калык артист, Россиысь искусство удысысь дано ужась Леонид Романов. Пиналъёс татын бырйыны быгато анай кылэз сямен пор яке удмурт кылэз дышетыны. Угось Карлыган котырысь гуртъёсын удмуртъёс поръёс мында ик уло.

Удмуртиысь егитъёсты пумитаз нылпиослэн «Корни» оркестрзы. Быдэс зал тыр чузъяськиз баянэн, домраен, балалайкаен но мукет инструментъёсын вордӥськем крезьгур.

Туала удмурт культуралы сӥзем ужрад кыстӥськиз быдэс нунал. Нырысь ик  пиналъёс тодматскизы «Шунды» огазеяськонэн, егитъёслэн Dart газетэнызы, удмурт кылын гожъяськись блогеръёсын но удмурт яркыт проектъёсын, пыриськизы пӧртэм мастер-классъёсы. Кин ке газет лэсьтӥз, кин ке калык пужыосын афиша пӧрмытӥз, бисерен выриз, актёр кариськиз. Берлояз тужгес трос калык люкаськиз — Карлыган школаын вань театральной кружок. Пиналъёс паймыто быгатонлыкъёсынызы. Настя Торопова, кылсярысь, нырысетӥ классысен ини ветлэ «Корни» оркестре, шудэ домраен. Кылем арын соослэн оркестрзы  «Адрес детства — Россия»  конкурсын вормиз, Анапае но вуылӥз. 11-тӥ классын дышетскись Ольга Пашкеева гожъяськыны яратэ, малпа Удмурт кун университетлэн удмурт ёзаз пырыны. Зульфия Саляхова, бигер нылаш, школаын дышетэ удмурт кылэз. Алигес эскериз удмурт но бигер сямен огвыллем чузъяськись кылъёсты. Кылсярысь, кешыр, сугон, чукиндэр, бабай (песятай) но мукетъёсыз. Бутарасова Марина яратэ пӧраськыны, газет лэсьтонъя мастер-классын но со гожтоно кариськиз перепеч но перемеч (шаньга) сиёнъёс сярысь. Кыӵе пиналлэсь гинэ эн юа, со одно ик кыл поттылоз  «Ӟардон» ансамбле ветлэмез сярысь. Ансамбльлэн репертуараз пор, бигер, удмурт, ӟуч кырӟанъёс. Арлыдоез вӧзын кырӟа егитэз. Веста Андреева, кылсярысь, удмурт сямен уг вераськы, но сюан гурез сюлмысьтыз кырӟаса лэзе. Арлыдоослэсь кырӟамзэс кылзӥськыса, дышоно, шуэ.

IdiID11EP3k

Нылпиос пыриськизы пӧртэм мастер-классъёсы.

Ӝытазе вань мылкыд карисьёс пӧсятозязы удмурт эктонъёсты эктӥзы. Люкаськизы клубазы, со интыяськемын Геннадий Багаев нимо ульчаын. Та адями кивалтэм улсын Карлыганын ӝутскиз «Восход» совхоззы, пуктӥськизы клуб, трос квартираё улон коркаос, выльдӥськиз школа…

Концертэ вуиз пичиез но, бадӟымез но, удмуртэз но, ӟучез но. Сцена вылын ог-огзэс вошъязы вашкала кырӟанъёсты ас сяменыз быдэсъясь Dukes группа,  кырӟасьёс Богдан Анфиногенов, Анна Образцова, Константин Никитин. Ӝытэз нуизы Удмурт театрысь артистъёс Максим Князев но Наталия Буранова. Сцена вылэ, песянайлы пӧрмытскыса, юморескаеныз потаз Удмурт театрысь егит артист Надежда Наговицына.  Калык со шоры учке но тодманы выре, оло, пе, та бускель Кисель починка гуртысь песянай, куараез дотово тодмо. Асьсэ быгатонлыкъёссэс возьматӥзы Карлыганысь но пиналъёс. Кылсярысь, гуртэз сярысь кырӟанэз рэпез сямен быдэстӥз Дима Яковлев. Сценалэсь со уг кышка ни — 3 ар «Шундыкар» лагере ветлэмын.

pVkUE5N0EWU

Удмурт театрысь егит артист Надежда Наговицына шоры калык учке но тодманы выре, оло, пе, та бускель Кисель починка гуртысь песянай, куараез дотово тодмо.

Концерт бере калык егитъёсты ушъямысь ӧз дугдылы. Доразы, пе, удмурт егитъёс концертэн шер вуыло.

— Ми Интернет пыр Богдан Афигенныйлэсь (Анфиногеновлэсь) «Super удмурты» клипсэ учкиськом, нош улэпкын ӧм адӟылэ на вал, — вера одӥгез учкись.

—  Нош Dukes группаысь нылъёс шоры мон, синме вошъятэк, учки, ачим удмурт кылэз уг тодӥськы ке но, кырӟанъёссы сюлме зол пыризы, — мылкыдзэ кисьтэ мукетыз.

Та выллем ужрадъёс удмурт егитъёс азьланяз но ортчытъялозы. 27-тӥ-28-тӥ тулыспалэ Удмуртиысь десантэз возьмало Татарстанысь Кукмор ёросысь Ошторма-Юмья гуртын.

Мария Векшина

Туспуктӥз Григорий Григорьев

 

 

 

 

 

 

Удмурт Дунне
By Удмурт Дунне 16 февраля, 2016 09:26