Ыш-ыш-ыш! Кытчы вуттэ ужъёсты берлолы кельтон

Удмурт Дунне
By Удмурт Дунне Январь 25, 2016 17:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шуныт сётӥсь гумыос укыр ӵем пасяськемен, Ижын туж секыт югдур кылдӥз. Соин ик 15-тӥ январьысен уен-нуналэн ужало «УКС» огазеяськон, Иж город администрация, ёрос администрациос, управляющей компаниос.

0102792,жрп,авария,УКС,зима,труба,прорыв

Ижын 70 процентэз гумыос сузмемын.

Но югдурез озьы гинэ уд тупаты. 21-тӥ толшоре 21 учыр пусъемын. Кылсярысь, Репин урамысь 21 номеро юрт вӧзын ву потыны кутскиз, пе. Пасяськем 500 миллиметръем гумы. Со борды итӥськемын 58 улон юрт, 12 нылпи сад, 3 дышетскон организация. Ваньзы таос огдырлы шуныттэк кыльылӥзы. Бен, УКС-лэн бригадаез пасяськем гумыез 8 часысен 15 часозь кышъяны быгатӥз. Но вань меда оскон, мукет интыысьтыз  ву уз пызйы шуыса?

Югдур быдэс городын огвыллем. Туэ тол кутскон азьын Иж администрацилэн, УКС-лэн (Удмуртские коммунальные системы) ватэмзы ӧз луы ни: шоркар дась ӧвӧл кезьытъёслы. Ог 70 процентэз гумыос ярантэм луэмын, соосты выльдонлы берло 7-8 ар ӵоже коньдон висъяллямын ӧвӧл.

Ярам, секыт югдурлэн мугез тодмо луиз. Но валантэм: малы кылдэм авариосты ӝегатскытэк палэнтонъя штаб алигес гинэ кылдытэмын?

— Но янгышъёсты утчаны дыр ӧвӧл, — журналистъёсын пумиськылыкуз, шуиз город администрацилэн йырызлэн ЖКХ-я воштӥсез Сергей Задорожный. — Али валтӥсь ужпум: авариос сярысь вакчи дыр куспын тодоно, соосты тупатон борды ӝегатскытэк басьтӥськоно. Пасяськем интыосты ӝогак кышъяны турттӥськом, кулэ дыръя уйин но ужаськом.

Но УКС ныпъетсэ кемалась уг вормы ни, пӧзись пуртые сюрем кадь луэмын. Иж город администрацие люкаллязы управляющей компаниослэсь кивалтӥсьёссэс. Соосты котькыӵе учырлы дась луыны куризы. УКС-лэн валтӥсь инженерез Сергей Каренков шуиз: асьме бригадаослы юрттӥськыны вуэмын Ульяновскысь, Пермьысь, Кировысь, Чебоксарыысь, Екатеринбургысь, Самараысь специалистъёс.

Ижын ялэмын кышкыт учырез палэнтонлы дась луон режим.

Югдурлы дунъет сётӥз Удмуртилэн Тӧроез Александр Соловьёв:

— Ву но шуныт сётонэз УКС-лы оскыку, малпам вал: со кужмо компания, ужзэ валаса радъялоз. Но солэн туала кивалтӥсьёсыз кыдёке азьлане уг учко вылэм. Шуныт сётон вакытлы дасяськыкузы, соос данаксэ ужасьёссэс мозмытӥзы, оптимизация ортчытӥзы. Авариосты палэнтыны 10 гинэ бригада кельтӥзы. Соослэн таӵе вамышсы мыным чик валантэм: шыръяны малпазы — кытчы со вуттӥз, адӟиськом. Сӥзьылысен шунытэз 588 пол кысылӥзы ни, 98 процентэз со пӧлысь — УКС-лэн янгышезъя.

Александр Соловьёв тау каре Ижын улӥсьёслы чидамзы понна, оскытэ: гумыосты выльдонлы уно миллиард манет кулэ ке но, та уз шӧдӥськы тарифъёс вылын. Ватсаз на: Ижысь азьвыл кивалтӥсьёс УКС-лэсь ужзэ чакласа возьысалзы ке, югдур умойгес луысал.

* * *

Матысь дыре Иже вуыны кулэ УКС-лэн валтӥсь предприятиезлэн, «Т Плюс» компанилэн, кивалтӥсез Борис Вайнзихер. Со кылдэм югдурысь потон амалъёс утчаны юрттоз.

Ижын жилищно-коммунальной хозяйствоен герӟаськем югдурез чакласа возе Россилэн Президентэзлэн Приволжск федерал округъя оскем муртэзлэн аппаратэз но. Отысь комиссия пумиськылӥз шоркарысьтымы улӥсьёсын, мылкыдъёссэс кылзӥз. Тодмо: Михаил Бабич югдурлы дунъет сётыны куре МВД-ез но, озьыен, Ижын шуныт сётонлы дасяськымтэ кивалтӥсьёсты кыл кутон улэ кыскыны быгатозы.

Мар витёно Ижын улӥсьёслы вуоно арын? Та юанлы валэктон туннэ ик сюроз шуыса оскон ӧвӧл. Бен, город администрациын вераськонъёс вань: гумыосты выльдонлы араз 700-800 миллион манет висъямын луоз. Нош али ало: квартираяды пӧсь ву уг бызьы, батареяос кезьытэсь ке, вазиське управляющей компанияды. Отысь специалистъёс герӟаськозы УКС-эн. Жингыртыны луоз городысь диспетчер службае но 072 яке 998-072 номеръёсъя. Таос озьы ик ивортонэз вуттозы УКС-э.

Элина Кумачёва

Туспуктӥз А. Горбунов

 

Удмурт Дунне
By Удмурт Дунне Январь 25, 2016 17:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<