Вожояськон, спортэн вырон но чылкытатӥськон. Нош мар та вие луиз тынад ёросад?

Удмурт Дунне
By Удмурт Дунне Январь 27, 2016 08:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вавож

Бызись чуръёс

Бызись чуръёсын электронной табло кылдӥз Выль Бия гуртын.

Гуртын улӥсьёслы таӵе амалэн ивор вӧлмытон сярысь сюлмаськиз «Колос» эштос. Табло интыямын культура юртэ пырон вадьсын, со умой адӟиське бадӟым сюрес вылтӥ мынӥсь-ветлӥсьёслы. Татысь лыдӟыны луэ вордскем нуналэн, юбилеен но мукет дано лыдпусъёсын ӟечкыланъёсты, пӧртэм ялонъёсты, хозяйстволэн но нимаз адямиослэн улонысьтызы тунсыко учыръёсты, лыдпусъёсты. Соос гожтэмын ӟуч но удмурт кылъёсын. Нырысетӥ чуръёс вал хозяйстволэн кузёезлэсь, гуртоосты со Выль арен ӟечкылаз.

Алнаш

Ӟуч толэзь

Та толэзь ёросын сӥземын ӟуч культуралы.

Тол каникулъёс дыръя тросэз ужрадъёс ортчизы ини. Соосты радъязы библиотекаосын, клубъёсын, музейёсын. Ваньмыз ужрадъёс герӟаськемын ӟуч культураен, йылолъёсын. Пиналъёс дышетскыны кутскемен, табере школаосын но нылпи садъёсын пӧртэм адӟытонъёс, концертъёс ортчозы. Алнаш черкогуртын улӥсьёс пумиськылӥзы ни Любовь Курбатова кылбурчиен, нациосын ужан политикая министрен Лариса Бурановаен, нош туннэ ёросысь культура юртын вожвылъясько кылбур лыдӟыны быгатӥсьёс, 27-тӥ январе «Берёзка» нылпи садын ӟуч кырӟанлы сӥзем праздник радъяськоз.

Каракулино

Одӥг аре вордӥськизы

Ёрос 90 аръем юбилейзэ пусйыны дасяське. Нош Каракулиноысь Тамара Калмаковалы 90 арес тырмиз ни 14-тӥ январе.

Тамара Ильинична вордскемын но вань улонзэ ортчытэмын Каракулино черкогуртын. 7 класс дышетскыса, калык судэ секретарь луыса ужаны кутскем, нош бӧрысь, пенсие потытозяз, вузаськись луыса тыршем. Ӟеч тыршемез «Ужысь ветеран» нимын пусъемын. Арлыдыз шоры учкытэк, гурт котыраз берга, яратэ сад-бакчаяз бугыръяськыны. Тамара Ильиничнаез вордскем нуналэныз ӟечкыланы ёрос администрациысь кивалтӥсьёс вуылӥзы. Арлыдо кышномурт соослэсь юалляськиз ёросысь югдур сярысь, нош куноослы тунсыко вал Каракулино черкогуртлэн азьвыл улонэз.

Сарапул

Удмуртъёслэн выль азьветлӥсьсы

Сарапул ёросысь удмуртъёслэн бадӟым кенешсы ортчиз.

Ёросысь удмуртъёслэн кенешазы вуылӥзы ёрослэн йырыз Игорь Абасов, «Удмурт Кенеш» огазеяськонлэн вице-президентэз Валерий Хохряков. Озьы ик ужрадэ пыриськизы вань муниципал кылдытэтъёсысь удмуртлыкез ӝутонэ мыло-кыдо пыриськись муртъёс. «Удмурт Кенешлэн» ёзэз Сарапул город но ёрос понна татчыозь одӥг вал. Люкаськемъёс соин валче огкылэ вуизы: Сарапул ёросын кылдытоно «Удмурт Кенеш» огазеяськонлэсь ёззэ. Правлениын ужасьёс быръемын, нош кивалтӥсьлэсь ужзэ быдэсъялоз Нина Бехметова. Та вие со  кивалтэ Сигаевоысь «Кам ӟардонъёс» коллективен. Бадӟым кенешон шулдыр удмурт концертэн йылпумъяськиз.

Эгра

Вожояськизы магазинын но

Сэп гуртысь пиналъёс вашкалазэ тодазы вайизы вожояськыса.

«Икча-кукча» фольклор ансамбле ветлӥсьёс вашкала йылол-сямен тодматскизы но вожолы сӥзем кырӟан-веранъёс дышетӥзы. Ваньзэ пыр-поч тодэмзы бере нырысь ик Сэп гуртэтӥ вожояськыса ветлӥзы, нош ӵуказеяз Эгра каргуртысь магазинъёсы пырасьёсты абдратӥзы. Калык нылпиослэсь кырӟам-верамзэ сак кылзӥз. Арлыдогес басьяськисьёс, егит дырзэс тодазы вайыса, лэся, шумпотӥзы но нылпиослы ческыт сиён кузьмазы. Вожояськыны потаса, школаын дышетскисьёс улӟытӥзы вуныны кутскем сямез.

Балезино

Тазалыкед дуно ке, эскериськы

Ёрос больницаен кивалтӥсь Вадим Ромашов огъя югдурен тодматӥз.

Балезино ёросын улӥсьёс пӧлысь 2016-тӥ арын 6 сюрс 142 мурт диспансеризациез ортчыны кулэ. Ӵапак сомында адями тазалыксэ эскерем вылэм 3 ар талэсь азьло, диспансеризация ортчыны кутскем бере. Туннэ нуналлы Балезино ёросысь 22 мурт тазалыксэ эскериз ни. Вадим Ромашов верамъя, диспансеризацилэсь палэнтӥськыны уг яра. Вылаз ик, секыт висёнэн — «парсь пыэдэн» — курадӟисьёс Россиын пумисько.

Юкаменск

Дэмен — куас вылэ

Кыкетӥ арзэ Юкаменск черкогуртын ортчизы куасэн бызьылонъя бадӟым ӵошатсконъёс.

Ёросысь кивалтӥсьёс но куасэн бызьылыны яратӥсьёс сяна, вожвылъяськонэ пыриськизы Красногорск, Глазов, Кез, Яр ёросъёсысь спортсменъёс. Ӵошатсконэ лыктэмъёслы вольыт сюрес сӥзизы но нырысь ик стартэ потӥзы кивалтӥсьёс. Соос пӧлын вормизы Ирина Бузалакова (Юкаменск ёрос) но Николай Поторочин (Красногорск ёрос). Ас ёзо эшъёссы пӧлын озьы ик вормисе потӥзы Александра Ушакова, Анна Кунаева (Глазов ёрос), Юлия Рудина (Яр ёрос), Павел Усеев (Юкаменск ёрос), Сергей Селивёрстов но Владимир Дзюин (Глазов ёрос).

Сюмси

Чылкытатӥськизы

Казанско-Богородицкой храмын ортчиз Йӧвылэсултонлы сӥзем служба.

Ужрадэ лачак калык люкаськиз, черкогуртысь сяна, пӧртэм гуртъёсын улӥсьёс но лыктэмын вал. Служба ортчем бере дэмен вамыштӥзы Сюмсиысь ӵыпет вылэ. Вуэз вӧсямзы бере шуре пырисьёс но шедизы. Тужгес арлыдоез пыласькисьлы Семён Прокопьевич Мальцевлы — 77 арес. Ӵыпет вылэ нимысьтыз палатка пуктэмын вал, уй но нунал чаклазы эмъясьёс но спасательёс.

Удмурт Дунне
By Удмурт Дунне Январь 27, 2016 08:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<