Улыны дышетӥзы рольёс. Удмуртиысь калык артисткалы Валентина Меняйлолы — 70 арес

Удмурт Дунне
By Удмурт Дунне Январь 27, 2016 09:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
m5378

В. Меняйло кырњанлэсь ноку ӧз люкиськылы.

Глазов ёросысь Порпи гуртын вордскем Валентина Меняйло ноку ӧз малпа, дыр, Ленинградын тодон-валан люкалоз, Полтаваысь офицерлы бызёз, Удмурт театрлэн сцена вылаз шудыса, калык артистозь будоз шуыса.

— Валентина Михайловна, тӥ кырӟась, солы юромо дышетскемын. Озьы ке но улонды герӟаськиз Удмурт театрен — драматической актриса луиды. Мынон сюресты кыклы люкиськиз шуыса, ноку ӧд жалялэ-а?

— Ӧй, ӧй жаля. Бен, мон кырӟасьлы дышетскемын. Но улон кыӵе но ӧре уг кожыты. Ми анай-атайлэн 6 пиналъёссы вал, мон 4-тӥез луисько. Тятямес Михаил Яковлевич Трефиловез фронтэ басьтӥзы, вань секытэз Рита апаймылы но мамамылы йӧтӥз ини. Мамамы 86 аресозь улӥз. Рита апае улэп дыръя ваньмы со доры люкаськиськом вал. Табере кык улэпъёсыз — пичи сузэре но выны — мон доры ветло ини.

Покчи классъёсын асьме гуртын дышетски. Собере Глазовысь 4-тӥ школае вамыштӥ. Гуртмы суро-пожо вал, ӟучъёс но, удмуртъёс но, бесерманъёс но улӥзы. Соин ик ӟуч кылын вераськыны ӧй шугомылы. Нош улыны интыяськи мамалэн сузэрез доры.  Ми сое Лиза атя шуиськомы вал. Соослэн монтэк но семьязы бадӟым вал: 7 пиналзы сяна, ӵужмуми но ӵужатай доразы улӥзы на. Озьы ке но ваньмызлы инты тырмылӥз. Туала арын табере озьы уз ни улэ, ӟоскыт шуозы. Городысь школае пропискатэк уг куто вал, соин ик прописка но мыным лэсьтӥзы.

Школаын дышетскыкум, художественной самодеятельносте ветлыны яратылӥ, одӥг ужрад но монтэк ӧз ортчылы, дыр. 11-тӥ классэз йылпумъякум (соку 11 класс дышетсконо вал), экзаменъёсме сётъякум, школамылэн директорез дораз ӧтиз. Мон куалектӥ: малы? Угось соку укыр востэм вал. Озьы но озьы, пе, Удмурт театр егитъёсты Ленинградэ дышетскыны келя. Монэ сяна, уйпал ёросъёсысь Михаил Ворончихинэз, Фая Булдаковаез, Сергей Кудрявцевез но Геннадий Городиловез (пӧртэм интыосын ужаса, бӧрысь соос ваньзы ик сӥё-дано артистъёс луизы) 1964-тӥ арын Ленинградысь крезьгуръя Н. Римский-Корсаков нимо консерваторилэн училищеяз келязы.

Удмурт театре ужаны вуыса, тодӥм, татчы ик интыяськемын вылэм Крезьгуръя театр но. Соку Удмурт театрын 13 артист ужаз. Ваньзы синмаськымонэсь, котыр ласянь адӟем карымонэсь: Нина Бакишева, Василий Перевощиков, Борис Безумов, Валентина Загуляева… Со вакытэ Валентина Александровна Удмурт радиоысь хоре кырӟаны кошкиз. Мон борды удмурт  артистъёс ӝабыр-ӝабыр басьтӥськизы. Ачим но соку малпаськыны кутски: Крезьгуръя театре ке кылёно, отын 1 рольлы 4 адями луэ вал, ваньмызлы шудыны роль ик ӧз сюрылы. Нош Удмуртаз рольёс ваньмызлы окмылӥзы. Озьы Удмурт театре пыраклы кыли. Валентина Загуляева берен театре ужаны вуыса, ми соин спектакльёсын ӵош шудыса кырӟаллямы, нимысьтыз репертуармы но вал. Ми котьку ик асьмеос кырӟамы, али сямен фонограммаен ӧм. Табере ум кырӟаське ни, но шӧдӥське, гурт калык, уката ик милям ёзъёсмы, витё милемыз, лыктэ вал дорамы, шуыло. Алигес Игнатий Гаврилов драматурглэн вордскем гуртаз, Можга ёросысь Сибые, вуылӥмы. Ой, кыӵе шумпотӥзы гуртоос, кемалась тӥледыз адӟеммы потэ ни вал, шуо. Ужатозямы кӧня пол Башкортостанэ, Татарстанэ, Киров но Пермь улосъёсы спектакльёсын потамын! Гужемлы быдэ гастрольёс, гастрольёс, гастрольёс. Котькытын ӝутскем мылкыдын пумиталлязы. Клубъёсын гинэ ӧвӧл, бусыосын но, гаражъёсын но, фермаосын но спектакльёс пуктылӥм, творческой ӝытъёс ортчытъям. Спектакльёсын шудэм но кырӟам сяна, театрысь профсоюзэн кема кивалтӥ.

— Тӥледлы, лякыт но каньыл сямо адямилы, сыӵе ик рольёсты сётъязы, дыр? Кудъёсыз сюлэмдэс тужгес но бугыртыса кельтӥзы?

— Мыным пӧртэм сямо нылъёсты но нылкышноосты шудыны кылдылӥз. Котькуд выросме, вераськон манерме гуртысь нылкышноослэн кадь карыны вырылӥ, быдэсак соослэн улоназы выйылӥ. Син азям пуктӥсько вал мамаме, гуртысь мукет пересь нылкышноосты. Секыт вал Нина Бакишева бере «Жингрес сӥзьылысь» Настя Сорокинаез шудыны. Мон со роль борды кышкасагес кутски. Отын шудон понна астэ пуктыны быгатыны кулэ. Тырши керпотонме вунэтыны. Соиз ласянь выжыкылъёсын умой шудыны, ымнырад маска понӥськод но, тонэ уг тодмало ни.

«Эн кушты монэ, туганэ» спектакльын Купанчаез шудӥ. Таиз быдэсак яратон пушкын. Мон котьку ик яратыса шудылӥ лирической героиняосты. Кылсярысь, «Эн ыбылэ тӧдьы юсьёсты» спектакльысь Харитинаез. Котькудӥз роль лулпушез узырмытэ. «Гуртысь маскарчиос» спектакльын Ася героиняе пересь писателен улэ. Нылкышно егит пиез яратэ ке но, сюлэмзэ со пала уг берыкты, чылкытлыкез утьыны тырше. «Дуринчи карын» Аннушкаез шудӥ, «Тонэ кожай вал юг дыдыкын» — Гуӵин кенакез, «Яратон уг пересьмы» спектакльын — Окиез, «Кезьыт ошмесын» — Жагаез,  «Исьтокын но Насьтокын» — Насьтокез, «Гондыр кушын» — Лизаез… Ваньзэ вераса уд быдты, сомында рольёсты шудэмын. Ваньзэ соосты, режиссёр оске бере, урод-а, умой-а сямзы, сюлэм пыртӥ поттыса шудоно вал. Тросэз рольёсы монэ улыны дышетӥзы.

Спектакльын шудыку, кӧня тумошо учыръёс луылӥзы. Одӥг пол кыӵе ке но гуртын кезьыт клубын шудӥськом. Мыным спектакльын чай юыны кулэ вал. Борис Безумов, со мынэсьтым дусымме шудӥз, кутэм но чай пӧлам курытсэ кисьтэм. Мон, егит нылаш, шудон сяменым капчияськем, лэся, серекъясь луи. Катанчи пала йырме берыктӥ но, ну, мукет артистъёс шорам серекъяса учко ук.

— Пиналъёстэс артистэн ӧд адӟе-а? Кин луыса соос ужало?

— Кузпалыным Сергей Павловичен кык пиосмес будэтӥм. Со ачиз Украинаысь бере, пиосмылэн пичи дырзы — мон гастроле ветлон вакытэ, гужем каникулъёсы — Полтаваын песянайзы дорынгес ортчылӥз. Одӥг пол пиосмес вайыны мынӥськом но, Олегмы, пулемёт сямен, украин кылын тачыртыса вераське. Зар! бӧрдӥсько, ява, пиелэн верамысьтыз номырзэ уг валаськы. Олег мебелен выре, нош Паша домоуправлениын ужа. 4 нуныкайёсмы будо: Андрей, Алёна, Савва, Максим. Андреймы чылкак асьмелэн кадь. Ми сое 5 аресысеныз асьмеос будэтӥм. Кенмы, лек пыктосэн висьыса, улонысь туж вазь кошкиз. Андреймы милемыз шумпоттэ ини, кылем арын со Москваысь Бауман нимо университетэ дышетскыны пыриз.

Сцена вылын шудон понна юн сямо луыны кулэ. Нош милям выжыямы воргоронъёсмы гинэ но лякыт но небыт сямоесь. Адямиез лёгаса кошкыны ум быгатӥське. Алёна нуныкае школаын дышетсконзэ йылпумъяз но артистэ мынон сярысь вераськыны ӧдъяз. Мон солы чутрак пумит луи. Артист луыны кулэ юн сямо, яркыт тусбуё, бадӟым таланто но пӧсятозь тыршись. Тужгес но берпуметӥез капчиен уг сётӥськы.

— Вордскем гуртады бертылӥськоды-а? Таӵе огыр-бугыр вакытэ Полтава пала шер вуылӥськоды ни, луоз?

— Порпимы Глазовлэсь 5 иськеме гинэ интыяськемын вал. Гурт калык ӧз ни кыльы отчы, сад-бакча возисьёс гинэ корка пуктыло на. Но гольык пыд бызьылэм интыос котьку ик доразы кыско, ма, собере, мамаен тятямы отчы ватэмын. Соос доры ми ӵем гинэ вуылӥськом.

Полтава сярысь ке, кызьы мынод на сыӵе кышкыт азе? Сергейлэн табере матысь ӵыжы-выжыосыз ик ӧвӧл ни отын.

— Меӵак юан сётэме потэ: тӥ шудо-а?

— Кызьы меда шудтэм шуод? Семьяе вань, ужай сюлэмысь, аслам учкисе вал. Ми Сергеен асьме коркан улӥськом, мунчомы но, бакчамы но вӧзамы. Яратӥсько театрез. Мон сотэк одӥг нунал но улыны уг чидаськы. Мыным со кужым но ӵуказе нуналлы оскон, эрик кузьма, мылкыдме ӝутэ, отын мон быдэсак улӟисько. Берло аръёссэ трос рольёс уг ке но сёто ни, массовкаосын но выжыкылъёсын шудӥсько. Адямилы ужын гинэ чебер луоно ӧвӧл,  пересьмыны но со чебер мед быгатоз.

Любовь Тихонова

 

Удмурт Дунне
By Удмурт Дунне Январь 27, 2016 09:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<