Удмурт ульчаын шыпытаз

Удмурт Дунне
By Удмурт Дунне Январь 28, 2016 18:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Павел Поздеев малпамъя, со герӟаськемын вакытлэн воштӥськеменыз

Ижын толэзьлы быдэ ортчылӥсь удмурт дискотека азьын пумиським удмурт режиссёрен, продюсерен Павел Поздеевен. Соин кенешизы Дарали Лели, Мария Векшина но Лариса Дмитриева.

darali

ДАРАЛИ ЛЕЛИ

векшина

МАРИЯ ВЕКШИНА

дмитриева

ЛАРА ДМИТРИЕВА

М. В.: Мар али уг тырмы удмурт культураын? Мар кароно, выль азьветлӥсьёс мед кылдозы шуыса?

ПАВЕЛ ПОЗДЕЕВ

П. П.: Ойдолэ историез учком. Адямиос кыӵе ке кризис дыръя «сайкало». Война вакытэ кылдо быдӟым ожгарчиос. Шыпыт вакытэ кисьмало зол талантъем муртъёс. Дыр-вакыт ачиз со муртъёсты шедьтэ, поттэ. Оло, ваньмыз озьы ик луыны кулэ: азьветлӥсьёс асьсэос кылдозы, возьмано гинэ.

М. В.: Нош мар бере тон ачид удмурт проектъёс бордын ужаны кутскид, кыӵе кужым тонэ вырӟытӥз?

П. П.: Мон «Иван Купала» ансамблез кылӥ. Нырысь — «Иван Купалаез», собере — А. Эркишевез. Валай: улонын трос «мукетэз», аспӧртэмлыкоез. Со вал 2001-тӥ арын.

Д. Л.: Али 2016-тӥ арлэн пумыз.  5 ар ортчыса, кыӵеен адӟиськод удмурт крезьгур удысэз? Воштӥськонъёс луозы-а?

П. П.: 5 ар талэсь азьло мукет юанъёс потало вал: малы ӧвӧл таиз я мукетыз крезьгур стиль? Калленэн ваньмыз кылдэ, югдур воштӥське. Малпасько, 5 ар ортчыса но, вужез но возиськоз, вылез но кылдоз. «Эктоника» улэп. Удмуртъёс дискотекае ветлэмысь дугдӥзы ке, «Эктоника» ышоз-быроз. Соин ӵош быроз одӥгез субкультура.

Д. Л.: Малпаськод, калык эктыны ветлэмысь дугдоз?

П. П.: Чылкак озьы вераны уг луы (серекъя).

Д. Л.: Оло, азьланяз адямиос удмурт крезьгурез доразы кылзозы? Удмуртъёс кырӟанъёстэк улыны уг быгато кадь.

П. П.: Кырӟанъёс бордын гинэ ужпум луысал ке. «Эктоника» ӝытъёсын калык понна крезьгур валтӥсез ӧвӧл. Маинызы калыкез ас бордазы кыско концертъёс, массовой культуралы сӥзем ӝытъёс? Адямиослэн пумиськылэмзы потэ, озьы огкадь малпаськись муртъёс ог-огзы борды кыстӥсько. Крезьгур — со вылтус гинэ, адямиослы люкаськыны амал, муг.

Д. Л.: Крезьгур сяна, мар быгатысал на огазеяны удмуртъёсты? Этнофутуристической симпозиумъёс?

П. П.: Кӧня бергасько ни удмуртлыкын, малпанэ ӧз воштӥськы на: калыкез аргантэк-шоккетонтэк туж секыт бичаны…

М. В.: Нош визь сынанъя «Шудком» шудонъёс?

П. П.: Со люка «мукет» калыкез. Мыным туж кельше вал Дарали Лелилэн «Берло чупало» огин улсын люкам тусовкаез («Берло чупало» — кар культуралы сӥзем диско-ӝытъёс), али яра «Шудкомын» люкаськылӥсь интеллигенция. Но та быдэс калык ӧвӧл на. Таос — пичи субкультураосы пырисьёс.

Д. Л.: Пичи тусовкаос ӝог быро. Соосты кыл-дытӥсь муртъёс быдэ вуо но тусовказылэсь палэнско. Нош тусовка кулэ! Мон малпасько, али «Шунды», егитъёслэн «уллёзы»,  азьпала потэмын. Гуртысь Иже али гинэ вуэм егитъёслэн кужымзы трос.

disco

Удмуртъёс дискотекае ветлэмысь дугдӥзы ке, «Эктоника» ышоз-быроз.

П. П.: Тазьы городысь удмурт дискотекаос сярысь но вераны луэ. Али отчы ньылетӥез яке витетӥез поколение ветлэ ини, егитъёс ог-огзэс вошто. «Берло чупало» сӧзнэт кадь ужасал ке, системалы пӧрмысал ке, отын но егитъёс вошъяськысалзы. «Шудкомын» но командаос пумен выльдӥськозы.

Д. Л.: «Эктоникае» ветлӥсьёслэн но арлыдзы будэ ни кадь.

П. П.: Уг. Нырысь ик, со ог 20 аресъем муртъёс. Зэм, куддыр пӧлазы олокинэз но сюре.

Д. Л.: «Берло чупало» борды егитъёс зол ӧз кырмиське. Кин ке кие гинэ сётэме потэ ни вал та малпанме. Нош аслым кивоштӥсь ӧз сюры (ди-джейёс гинэ но).

П. П.: Тон воштӥськид но соин йырин быдэс субкультураез виид. Ачим сярысь ке, мон удмурт дискотека радъян бордысь палэнски мукет муген: Влад Горжакез будэтон понна. Озьы ик пӧрмиз. Али «Эктоника» быдэсак возиське Влад вылын.

Д. Л.: Таӵе югдур тӥляд гинэ ӧвӧл. «Дарт» газетлы но вуоно кыл кутӥсез, егит муртэз  утчано…

М. В.: Малы ке шуоно газет котырын субкультура кылдытыны, лидеръёсты люканы ӧм быгатэ.

Л. Д.: Таланто муртъёс шер вордско. Соосты утьыны кулэ.

Д. Л.: Соосты лэсьтыны но луэ, вера ук Паша, Горжакез сямен.

Л. Д.: Уггес оскиськы талы.

Д. Л.: Паша, тон оскись-код-а, удмурт лулчеберетын таӵе юромо кылдытэм, малпам макеос вань шуыса: «Чудья промо», «Поколение Ӟ», постэтнофутуризм?..

П. П.: Котькуд макелэн нимыз луыны кулэ. Нырысь мар ке кылдэ, собере со кылдэмез кабъяны, ниманы кулэ.  Собере, коӵышпиосты вуэ куштэм кадь, кылдэм маке ачиз уяса кошке.

Д. Л.: Уз изъянты-а та «ним понон» кылдэм макеосты? Нималод, нош берло валалод: янгыш нимамын.

П. П.: Кылсярысь?

Д. Л.: Шуом, «Поколение Ӟ». Вань-а соос? Ӧвӧл. Нош постэтнофутуризм? Настя Шумиловалы пышкылӥсь чуръёс гожъяны муг коть сюриз.

П. П.: Кыӵе ке явление котырын вераськонъёс мыно ке, со умойлы гинэ.

Д. Л.: Туала удмурт культура сярысь мар верасалыд?

П. П.: Кызьы верай ни, али мынэ воштӥськон вакыт, субкультураос кошко, куло. Культураын шыпыт луиз.

Д. Л.: Ижысь электронной крезьгурез кыл-зӥсьёслэн субкультуразы быриз 2010-тӥ арын. Соос интые кылдӥзы «БВИ» клубе ветлӥсьёс.

П. П.: …пӧртэм субкультураослэн кулэмзы но «Шунды» огазеяськонлэн ӝутскемез — тани мар вал туэ.

Д. Л.: «Шундылы» кыӵе ке дэмланъёсыд вань-а?

П. П.: Мед утёзы Ольга Тронина вакытэ кылдэм, али ужась проектъёссэс.

Д. Л.: Мон малпасько, «Шундые» выль вуэм егитъёс — со пӧртэм тусовкаослэн сураськемзы. Отын ик «Берло чупало», отын ик «Ӟ выжы»… Паймоно кадь, «Шунды» «Эктоникаен» но вожвылъяське — крезьгур шоры мукет синмын учкыса.

П. П.: «Шундылэн» азинскемез герӟаськемын Нациосын ужан политикая министерстволэн коньдонэн юрттэменыз. «Юмшан57» промо-группа ужан вакытэ мон но, клипъёслы коньдон утчаса, бызьылӥ, но малпанме лыдэ ӧз басьтэ. Мыным кельше «Шундыен» быръем ужан амал: клип лэсьтонэз соос люкизы пӧртэм муртъёс куспын. Мон малпасько, «Шунды» туэ быгатӥз «гурезьлэн йылаз тубыны», табере уллань васькоз, выль вырйыл ӧз ке сюры.

Д. Л.: Нош «Эктоника» табере кыӵе гурезь вылэ тубыны кулэ, тубемез потэ ке?

П. П.: «Эктоникаез» продюсерской центрен адӟисько бере, оскисько, кылдозы выль авторъёс, кырӟасьёс, вуоно кизилиос. Утчано соосты, будэтоно. Та понна уксё тырмыт ӧвӧл ай.

Д. Л.: Кырӟасьёслы асьсэлы но азинсконо, выль ӧръёсты оскалтоно.

М. В.:  Выль удмурт блогеръёс но ӧвӧл.

Д. Л.: «ВКонтактеын» «Кылзы, ёптэ!» бам вань. Тунсыко ук. Собере туэ IT- удысмы зол азинскиз! Телефонэ удмурт ватсэтъёс, удмурт клавиатура потӥз.

П. П.: Таиз но Нациосын ужан политикая министерстволэн уксёеныз азинтӥське. Мыным туж кельшиз туэ быдэ вуэм «Малыми» панк-группа. Ольга Тронина быгатӥз пӧртэм адямиосты «Шундыкар» лагерьын огазеяны.

Д. Л.: Шаплы егитъёс пумен лапкомо, семья кылдыто, пинал вордо…

П. П.: Зэм, зол шӧдӥське поколенилэн воштӥськемез. Таин но удмурт культураын кризис золгес, лэся, шӧдӥське. Пичиос ӧз на будэ. Паськыта егитъёс но 40 аресъемъёс вискын гу. Радио пыр тросгес шудэ арлыдоослы крезьгур. Егит адямилэн тодаз но уз лыкты, тае кызьы ке но воштыны луэ шуыса. Удмурт радио — сыӵе, кыӵе вань. Яке кылзод, яке уд.

Д. Л.: Ӟеч крезьгур, туала крезьгур — вот мар уг тырмы. Крезьгурез валан-шӧдон — со субкультура шат?! Уг валаськы.

П. П.: Удмуртлыкын уг луы вераськыны крезьгурез шӧдон сярысь. Кыӵе со ӟечез крезьгур, кыӵе уродэз… Удмурт крезьгур тыныд яке кельше, яке уг. «Чебер, йӧно, ӟечлыко утчаськонъёс» — со субкультуралэн тодметъёсыз ни. Егит удмурт нылаш яке пияш уз жингыръя эфире но уз кереты редакторен: вае мыным мукет крезьгур! Нош субкультура — со огин, солэн вань азьветлӥсез. Сыӵе адями дась радиоен кусып возьыны, мае ке воштыны, вераськыны.

Д. Л.: Фольклор но субкультура луиз ни… Калык гуръёс эфирын ӧжыт чузъясько бере.

П. П.: Адямилы туэ маке кулэ ке, сое вотэсысь шедьтоз. Радио — со берпуметӥ инты.

М. В.: Газетэн но озьы ик.

П. П.: Ӧвӧл. Газет — со тодыны тыршисьёслы ӟечлыко продукт. Соослы, кин утчаське, кин лыдӟиське.

Д. Л.: Озьыен, газет — со элитарной продукт.

П. П.: Мон «Удмурт дуннеез» усьтӥсько, угось тодэме потэ, мар луэ удмурт дуннеямы.

Д. Л.: Пумиськеммы понна тау. Озьыен, вераськеммес лыдӟод газет бамысь.

Туспуктэм: vk.com/ektonika

Удмурт Дунне
By Удмурт Дунне Январь 28, 2016 18:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<