Вань удмуртъёслэн 13-тӥез бадӟым ӧтчамзы ортчоз 11-тӥ-12-тӥ феврале

Удмурт Дунне
By Удмурт Дунне 21 января, 2016 13:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сое радъян азьын «Удмурт Кенеш» огазеяськонлэн берпуметӥез исполкомез ортчиз.

 

Умуртъёслэн берло ӧтчамъёссы дыртӥд-вуттӥд 1 нуналскын ортчылӥзы. Валамон ни, сыӵе дыръя ужез рос-прос радъяны нокызьы но ӧз луылы, сюлэмез шуг карись ужпумъёсты йылозяз-пумозяз сэрттыны дыр ӧз сюрылы. Табере отчётъёслы но, секытэсь ужпумъёсты ӝутыны но дыр сюроз. Ужрадэ Удмуртилэн Тӧроез Александр Соловьёв пыриськоз шуыса, чакламын. Ӧтчамын 382 делегатъёс ужалозы 6 удысъя: дышетон но кылэз азинтон, этнополитика но право, егитъёсын ужан, лулчеберет, ивор вӧлмытон, семья но тазалыкез утён. Ужан радлыке берпуметӥоссэ воштонъёсты та нуналъёсы куто. Юнматӥськозы соос 2-тӥ феврале ортчоно Пичи кенешын.

Огез уз воштӥськы: ӧтчам дыръя сӥё-дано ӟечкылалозы туэ К. Герд премиен пусъем муртъёсты. Со Михаил Атаманов, протодиакон, профессор, филология наукаосъя доктор, Геннадий Кузнецов, кырӟанъя но эктонъя «Айкай» кун театрысь артист, Ольга Шилова, «Удмурт Кенеш» огазеяськонлэн Ижысь Первомай ёросысь ёзэныз кивалтӥсь.

Премиосты сётонъя комиссиен кивалтӥсь Владимир Владыкин верамъя, туэ туж секыт вал нимо-дано адямиос пӧлысь нимысьтыз кинэ ке бырйыны.

— Туэ комиссие вуиз 5 кандидатлэн нимтулыз. Ваньзы ик удмуртлык понна трос лэсьто. Луонлык сётысалзы ик, витьназэс ик премиен пусйысал. Котькуд аре тазьы уг луы.

Кандидатъёс зэмен ик юнэсь. Соин ик Пичи Пургалась удмуртлыкез ӝутонэ пыриськисьёсты, удмурт дэремъёсты улӟытӥсьёсты Татьяна но Василий Москвинъёсты но Эстониысь писателез, асьме гожъяськисьёсты кунгож сьӧрын тодмо карисез Арво Валтонэз но ӝож уз каре. Туэ сӥзьыл «Удмурт Кенеш» кылдэм дырысен 25 ар тырме. Ӵапак юбилеез пусъён ужрадын та адямиосты но К. Герд премиен пусъёзы. Исполком тае умоен лыдъяз.

Исполкомын ик юнматэмын Э. Батуев нимо премиен пусъем адямиос — «Кизили» журналлэн валтӥсь редакторез Ульфат Бадретдинов, Ува ёросысь Ӵушкам гуртысь шаерчи, дышетӥсь но гожъяськись Евгений Эжбаев. Егит гожъяськисьёс пӧлын нимысьтыз пусъемын Пичи Пурга ёросысь «Маяк» газетысь журналист Анжелика Петрова.

Исполкомын ик ӝутӥськиз ёросъёсысь «кенешчиослэн» ужамзы сярысь юан. Куд-огез уго азьтэмъяськыны ӧдъяз. Отчётъёслы но быръёнъёслы сӥзем конференциосазы но одӥг огез ма вераны ӟудӥз. Югдурез тупатон борды басьтӥськоно, ужамы тросгес кысконо воргоронъёсты, шуиз «Удмурт Кенешлэн» тӧроез Игорь Семёнов. Уката ик сӥзьыл матэкто ёросысь Депутат Кенешъёсы быръёнъёс. Депутатъёс радэ уногес кыскыны тыршоно удмурт егитъёсты, пусйиз Игорь Николаевич.

Елена Сараматова

Туспуктӥз А. Горбунов

Удмурт Дунне
By Удмурт Дунне 21 января, 2016 13:08