Туннэ Петер Домокошлы тырмысал 80 арес

Удмурт Дунне
By Удмурт Дунне Январь 15, 2016 14:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Peter Domokosh

П. Домокош тодэ кылиз «Удмурт литературалэн историез» монографиеныз.

Литературамес данъяз венгер тодосчи Петер Домокош

2016-тӥ арын 15-тӥ январе 80 арес тырмысал венгер тодосчилы, литературоведлы, филология наукаосъя докторлы, Удмурт кун университетысь дано профессорлы Петер Домокошлы.

Кылэз дышетӥз словарен

Домокош Пал Петер вордӥськиз Трансильваниысь (туала Румыниысь) Дердёафалу гуртын. 1959-тӥ арын йылпумъяз Будапештысь университетэз, литературалы но кыллы 6 ар дышетӥз Будапештысь гимназиын. 1965-тӥ-1970-тӥ аръёсы Ленинградысь университетын фин-угор кафедраын венгер кыллы но литературалы дышетӥз, 1970-тӥ арысен Венгриысь Сегед университетысь наукая ужась вал, 1980-тӥ арысен — Будапешт университетысь доцент, профессор.

Петер Домокош туж бадӟым уж лэсьтӥз дуннеысь фин-угор калыкъёслэсь литератураоссэс, историзэс эскеронын. Венгер, англи, француз, немец, фин, ӟуч кылъёсын 300-лэсь ятыр наукая ужъёс гожтӥз.  Тодосчи тужгес но бадӟым саклык висъяз удмурт калыклэн литератураезлы но культураезлы. Удмуртъёс но вань сюлмынызы кыстӥськизы та визьмо адями борды. Со вал ог-огдэ яратон но валан. Но пӧртэм культураослэн ог-огзы доры сюрес шедьтонзы капчиен ӧз ортчы.

Наука удысын тыршемзэ но улон сюрессэ Петер Домокош ӵошатылӥз шуг-секытъёс пыр потонэн. Азяз пуктэм ужпумъёсты со, номыр шоры учкытэк, быдэстыны тыршылӥз. Кунгож сьӧрын улӥсьёс понна Удмурт шаер Совето вакытэ ворсамын вал. Тодосчи удмурт кылэз дышетӥз словарен. Командировкаосы СССР-ысь фин-угор республикаосы, Москвае, Ленинградэ, Казане вуылыса, одно ик удмурт писательёсын, тодосчиосын пумиськон муг шедьтылӥз. Соос пыр басьтылӥз удмурт кылъя урокъёс, литературая но культурая визь-кенеш. Кусып возиз гожтэтъёс пыр но. Ваньмыз со тодосчилы юрттӥз «Удмурт литературалэн историез» монографизэ гожтыны.  Венгер кылын со поттэмын 1975-тӥ арын Будапештын. Ӟуч кылэ берыктэмезъя кенешон ортчиз 1978-тӥ арын 9-тӥ-10-тӥ феврале «Удмуртия» издательстволэн актовой залаз. Кенешонэ пыриськизы Удмурт научно-исследовательской институтысь тодосчиос, Удмуртиысь писательёс, КПСС-лэн обкомаз ужасьёс, издательёс. Будапештысь тодосчилэн удмурт литература шоры учконэз дары (порох) пуштэм выллем вал. Та сярысь трос вераськизы, споръяськизы, малпаськизы. Нош тужгес но тунсыкоез — рукописьсэ эскеронын ачиз автор ӧй вал. «Корт занавес» шуон вакыт кунгож сьӧрысь тодосчилы Ижлэсь ӧсъёссэ ӧз усьты.

Домокошлэн ужезлы люкаськемъёс огъя вылӥ дунъет сётӥзы ке но, куд-ог ужпумъёсын соглаш ӧз луэ. Шонерен ӧз лыдъялэ методологизэ, удмурт литературалэсь кылдэмзэ (периодизация) выль сямен учкемзэ, куд-ог авторъёслы дунъет сётэмзэ. Тужгес но паймытӥз пӧртэм мугъёсын улонысь вазь кошкем но гожъяськонын вань быгатонлыкъёссэс усьтыны вуымтэ писательёслэсь, репрессиос улэ шедемъёслэсь нимъёссэс, соослэсь ужъёссэс нимаз списокен сётэмез. Петер Домокош та библиографиез лэсьтӥз, Москваысь но Ленинградысь архивъёсын утчаськыса.   Домокошлэн монографиез шарае поттӥз трос выль но вунэм нимъёсты, кудъёсыз сярысь ми ӧм но тодылэ, нош куд-огез сярысь вераны но ӧз яралля. Вакытэз сыӵе вал.

Домокошлэсь ужзэ со кенешын пӧртэм сямен дунъязы, мазэ ке курлазы, мазэ ке ушъязы, но милемыз ваньмес соку  огазеяз фин-угор калыкъёсын данъяськон но ӵыжы-выжыяськон мылкыд. Тужгес но данъяськимы асьмелэсь кылмес дышетэм но литературамылы сӥзем со быдӟа уж лэсьтэм венгер тодосчиен. Солы луыса  литературамес нырысьсэ дуннеысь литературалэн оглюкетэныз адӟимы.

Монографизэ ӟуч кылын гожтыкуз, Домокош пумиськылӥз дуннеысь литературая А.  Горький нимо институтысь национальной литератураосъя отделлэн кивалтӥсеныз, филология наукаосъя докторен Георгий Ломидзеен. Домокошлэн рукописезлы дунъет сётыны курыса, венгеръёс солы ик вазиськизы. Георгий Иосифовичлы та уж яраз, печатланы дэмлаз. Со борды итӥськиз филология наукаосъя доктор, Удмурт кун университетысь доцент Зоя Богомолова.

Петер Домокош та дунъетэз ӟечен пумитаз. 1980-тӥ арын Г. Ломидзелы гожтӥз: «… Книгае гожтэмын удмурт калыкез яратон мылкыдын. Солы мон дасяськи 15 ар пала. Али ке но жалясько, 60-тӥ аръёслэн кыкетӥ ӝыныязы (Ленинградысь кун университетын ужакум), трос пол ӝуткаськылӥ ке но, одӥг пол но ӧз кылды удмурт музъем вылэ вуылыны но эскерон ужъёс ортчытыны. Мур пуштросъем но котыр ласянь радъям ужез быдэстон понна мынам луонлыкъёсы ӧй вал адямиосын пумиськылыны…»

Рукописезъя ӵектонъёсты лыдэ басьтыса, венгер тодосчи монографизэ йылаз-пумаз вуттӥз. Ужаз выль сямен усьтӥськиз пичи  калыклэн литератураез, дуннеысь литератураен артэ пуктыса. Удмурт калыклэсь литературазэ азинтонын Октябрь революцилэн кулэлыкез но чузъяськиз. Пусйымон соиз, Домокош ӧз вамышты со вакытысь политикалэн куронъёсыз сьӧры, ужзэ выль сямен ӧз гожты.  Книгаез потӥз ни странаямы но кунгож сьӧрын политикая югдур воштӥськон вакытэ. 15 арлы беромыса печатлам книга возьматӥз тодосчилэсь наука удысын шонер сюрестӥ вамыштэмзэ.

«Удмурт литературалэн историез» монографиен тодматскон ортчиз 1993-тӥ арын июне Удмурт кун университетын (книгалэн наукая валтӥсез вал А. Шкляев). Отчы пыриськизы Венгер Республикалэн Президентэз Арпад Гёнц но ачиз автор Петер Домокош.

Ултӥямъёсты утись

Вань улытозяз, Петер Домокош тыршиз ултӥям, репрессиос улэ шедем писательёслы дурбасьтыны. Тужгес но сюлмаськиз Кузебай Гердлэсь но Ашальчи Окилэсь нимъёссэс калыке кельтон сярысь. Трос кужымзэ сётӥз Кузебай Гердэз шонере поттонлы. Удмурт калыклэн дано пиеныз тодматӥз ас калыксэ, со сярысь книга гожтӥз. Поттэмын Будапештын 2004-тӥ арын. Озьы ик писательлэн произведениосызъя подстрочникъёс дасяз. Соосъя венгер берыктӥсьёс  Беде Анна, Белла Иштван, Кепеш Геза, Козмач Иштван но мукетъёсыз калыксы доры вуттӥзы Кузебай Гердлэсь кылбуръёссэ но прозазэ.

Нырысетӥ удмурт нылкышно кылбурчи Ашальчи Оки, 37 кылбур гожтыса, пыраклы дано луиз. «Малы шып улэ удмурт нылкышно» книгая сое тодэ мадьяр калык но. Книгаез дасяз но азькыл гожтӥз Петер Домокош, нош кылбуръёсты венгер кылэ берыктӥз Анна Беде. Книгае пыризы «Чыртывесь» бичетысь (дасяз А. Ермолаев) кылбуръёсыз.

Петер Домокош трос тыршиз кун сьӧрысь тодосчиосты удмурт литератураез эскерон борды кыскон ласянь. Солэн ӵектэмезъя Англиысь тодосчи Джон Гордон Коутс басьтӥськиз удмурт кылэз эскерон борды, англи кылэ берыктӥз Кузебай Гердлэсь «Сюрес дурын» балладазэ, Ашальчи Окилэсь кӧня ке кылбуръёссэ. Котыр ласянь дурбасьтӥз француз тодосчилы Жан-Люк Моролы удмурт кылэз эскеронын но удмурт кылбуръёсты француз кылэ берыктонын.

Профессор Петер Домокош, 1960-тӥ арысен кутскыса, пыриськиз фин-угор тодосчиослэн ваньмаз ик калыккуспо конгрессъёсазы. Фин-угор писательёсты огазеянын но со азьпал радъёсын вал. Нырысетӥез пумиськон ортчиз 1989-тӥ арын Йошкар-Олаын. Кӧня ке аръёс ӵоже со вал Фин-угор писательёслэн ассоциацизылэн кивалтӥсез.

Тодосчилы шаерамы нырысьсэ вуыны шуд усиз 1989-тӥ арын удмурт литературалы 100 ар тырмонлы сӥзем ужрадэ. Удмурт кун университет но «Удмурт Кенеш» огазеяськонъёслэн ӧтемзыя пыриськылӥз пӧртэм съездъёсы но форумъёсы. Петер Домокош данъямын УАССР-ысь Верховной Советлэн Данъян грамотаеныз, сётэмын «Удмурт Республикаысь наука удысысь дано ужась» ним, Кузебай Герд нимо премия. Со озьы ик Удмурт кун университетысь дано профессор, Санкт-Петербургысь кун университетысь дано доктор луиз. Россиен эшъяськон кусыпъёсты юнматэмез понна Президент В. Путин венгер тодосчиез данъяз А. С. Пушкинлэн медаленыз.

Петер Домокош улонысь кошкиз 2014-тӥ арын. Но мадьяр калык аслэсьтыз дано пизэ уг вунэты. 20-тӥ январе Будапештын ортчоз тодосчилы сӥзем научной конференция.

Анна Измайлова-Зуева,

кылосбур тодосъя доктор

Туспуктэм: nbrkomi.ru

Удмурт Дунне
By Удмурт Дунне Январь 15, 2016 14:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<