Швейцариын выжыкылын кадь ужамы

Удмурт Дунне
By Удмурт Дунне Январь 28, 2016 13:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ижысь гурт удысъя академиысь 5 студентъёс алигес бертӥзы Швейцариысь. Кунгож сьӧрын соос 4 толэзь ужазы. Пӧлазы вал экономикая факультетысь  Лилия Никитина но.

Лиля 2

Л. Никитина Рейн водопад дурын.

Укно улын — кыед

— Швейцариын ваньмыз-ӧвӧлэз 26 кантон, — отчы вуылэмез сярысь вера Лиля. — Асьме сямен — ёрос. Мон шеди Цюрих кантонысь Динхард гуртысь Хайнц Финк фермер доры. Уже секыт ӧй вал: скал кысконо, сиён пӧрано, выж миськоно, бакчаын мар но со кароно, Хайнцлэсь 2 пичи нылъёссэ утёно.

Кузёе капчиен вераське англи, немец, француз сямен. Швейцариын вань мылкыд карисьёс фермер луыны уг быгато. Со понна нырысь кема дышетсконо. Соку гинэ кун музъемъёссэ  исаны лэзе. Хайнцлэн кышноез нылпи садысь покчиосты немец кыллы дышетэ. Угось тросэзлэн татчы улыны интыяськемъёслэн пиналъёссы немец сямен лабыртыны уг быгато.

Швейцариын 4-5 пӧртэм диалект. Соос сыӵе пӧртэмесь — кунлэн огпалаз улӥсьёс уг валало тапаласьёсызлэсь вераськемзэс. Швейцария интыяськемын Австрия, Франция, Германия но Италия вискы. Соин, шуом, Италилы матынгес улӥсьёслэн вераськоназы трос пумиськыло итальян кылъёс. Ваньзы ог-огзэс мед валалозы шуыса, рос-прос дышетыны выро немец кылэз.

Нырысь-валысь шуг-секытъёс кылдӥзы сиён пӧран ласянь. Татын угось мукет сямен кӧтсэс тыро. Шыдзы — ӝук. Чайзы — компот яке ву. Каунлэсь (тыквалэсь) трос-трос шыд пӧзьтыны куризы. 2 миска пӧрай гинэ — сое тыпыр-тапыр кезьыт интые поттӥзы. Дышемын соос: одӥг шыдзэс арня-кык сиё. Сиськыку куронъёссэс чаклано: ӝӧк сьӧрысь оген-кыкен потаны уг яра. Огез шыд ӟузьылыку, мукетызлы чай борды кутскыны лэземын ӧвӧл. Соин кӧтсэс час пала тыро.

Лиля

Гурезь йылысен.

Пудозэс адями чотын возё — котьку сюдэмын, утялтэмын мед луоз. Огпол шефе куре: скалъёслэсь, пе, наштаськем макесъёссэс гылты. Мон паймисько: ма, дэриез куасьмоз но ас понназ куашкалоз ай! Хайнц визьманы кутскиз: полицейскойёс ульчаысь кырсь скалэз адӟизы ке, штраф сётозы.

Тыриськон ляко, котькуд скал азьын ведраен ву ӧвӧл ке. Соин ик татысь фермеръёс али гинэ вордскем кунянзэс вешаны уг дырто — ву дуре ӝог-ӝог бызё. Гужем скалъёсты гурезьёсы тубыто. Отын угось турын чылк-чылк, вож-вож. Ӵапак со вакытэ ик йӧллы дунъёссы будо. Гурезьёсын ик лэсьто дуно сыр.

Паймытӥз соиз но: пыдыз сисьмыны шӧта ке, асьмеос скалэз вандӥськом, сӥльзэ сииськом. Татын сыӵеосты нимысьтыз интыын суто. Вань бӧксӥсьёссы пиль-пиль гордэсь. Но йӧлзы трос уг люкаськы — нуналаз огпол гинэ кыскылӥмы. Со понна туж нап.

Асьме дорын кыед люкало коргид котыре. Нош таос — укно улазы. Но отысь зын но уг лыкты, кырсь но уг адскы. Со люкъёсы угось вылысьтыз-вылаз мертто пуштыр-пуштыр сяськаос. Ульчаын котькыӵе пӧсь мед возиськоз — фермеръёссы ужало кирза сапеген. Асьме палъёсын гурт удысын воргоронъёсгес тыршо. Нош отын нылкышноос но уг аналско. Тани кузёмылэн 78 аресъем анаез тракторен, комбайнэн, великен ворттылэ. Картошка мынэсьтым шаплы бича, ява! Егитъёссы шумпотыса ужало гурт удысын.

Штраф тырыто вылэм пуныез думетысь лэзем понна но. Та сярысь тодӥ одӥг учыр бере. Эшме пумитаны остановкае кузёмылэн пуныеныз мынӥ. Ӧй но чакла: пуные электричкае пуксем но городэ ширтэм. Ӧжыт улыса, сюлэмы пыдтышкам вуиз: дорамы полицейскойёс пыриллям. Кузёмы ӵаш поттэ: Лилия, нах Хаузе! (Лилия, дорад берт! — авт.) Швейцариын котькуд пуны борды чип юнмато. Соя ик полицейскойёс шараяло утӥсьлэсь кузёзэ. Шудэ вылэм — Хайнцлы монэн йырин тыриськон ӧз ляке, пунызэ берыктӥзы.

Швейцариын кисызэс паськытгес усьтоно луо дышетскытэк чорыгасьёс но. Визнанэн пукыны мылкыд карисьёс нырысь курсъёс пыр пото. Соку ини соослы чорыганы право сёто.

Швейцариын гужем скалъёссэс гурезьёсы тубыто.

Швейцариын гужем скалъёссэс гурезьёсы тубыто.

Пилемъёс вылын — корка

Огпол Хайнцез школае ӧтизы. Мон но сьӧраз калъяськи. Абдрай: 2-тӥ классэ  ветлӥсь нылыз дорын юр-яр вазе. Пиналъёс выж вылын, ӝӧк сьӧрын шудо. А-а, таослэн переменазы, малпасько. Берло гинэ валэктӥзы — Швейцариын, асьмеос сямен, парта сьӧрын, ӝот-ӝот пукыса, уг дышетско. Покчиос, пе, визь люкало шудыса.

Черкъёссы татын мӧзмытэсь: 1 этажо, 1-2 укноё, буш борддоро. Палэнысен учкыса, малпалод: огшоры корка. Сьӧрам шаермылы сӥзем туспуктэмъёсты кутӥ вал. Фотоос пӧлысь Ижысь Дун-чылкыт Михаиллы сӥзем черкез адӟыса, кузёелэн синъёсыз питыръяськизы: кыӵе выжыкылысь та юрт?

Татын музъемзы туж дуно. Котькытынгес — луо, горд сюй, из. Соин сьӧд сюй — зарни интыын. Кузёелы бусыысьтыз гопо интыоссэ ӵошкытатон понна сьӧд сюй вайизы. Сое пыртакум, сюрес вылэ кӧня ке кисьтыны шедьтӥ. Пичи Пурга ёросысь Вуж Мӧньяям талы нокыӵе ик ӧй кариськысал. Нош отын одӥг пырызэ но кельтыны ӧз лэзе — чылк-чылк ӵужыса, сюез бусые кисьтӥ.

Швейцарилэсь котькуд сэрегзэ ас синмыным учкыса потӥ. Альпы гурезьёс пӧлысь огаз мертчиськемын мудрон корка — Ашер. Отчы вуон понна тубоно 5-лэсь ятыр иськеме. Меӵ гурезь йылэ кый сямен кыстӥське туристъёсын пачылмем лынгыр-лонгыр сюбег сюрес. Чабкиськи: воргоронъёс, нылпиоссэс тыбыр вылазы поныса, гыж отчы тубо. Кин ке пичильтоксэ коляскаен нуэ. Таӵеос шоры кӧты шурдыса учкылӥ: 1 секундлы киосты коляска бордысь лэзид ке, нылпиед син куспын гурезь пыдсы питыралоз. Сӧсыр адямиос но уг кӧберало, ява — Ашере тубо. Мынам пыдъёсы дырекъяны кутскизы, ньылоны кӧсаз. Пыдкуке но ӧз чида — «ымыз» усьтӥськиз. Но отчы вуыса, вань жадён сылмиз — куноятӥзы 20 сантиметрлэсь ӝужыт кынтэм йӧлын. Соку ик валай: ми вуимы выжыкылэ — мудрон корка пилемъёс вылын вез-вез пуке кадь…

Лиля8

Ашер кунокуа вӧзын.

Ашерез ог 200 ар талэсь азьло пуктӥллям. Туннэ сое чакласа возё воргорон, солэн пиосыз. Кунооссэс пиосмуртъёс утялто гурезь улӥысь бусыосын будэтэм емышъёсынызы гинэ. Кинлэн гурезьысь васькыны кужымез ӧвӧл — шутэтско татын ик, дун тырыса. Ашер дуннеысь тужгес мудрон 20 кафеос пӧлы пыртэмын.

Адӟи Европаысь тужгес бадӟым Рейн водопадэз. Ог 23 метр вылӥысь тулкымъяськыса-ӧръяськыса кошке ву — пасьталаез 150 метр пала. Шораз ик ӝутэмын туристъёслы инты. Отчы адямиосты нуо-ваё пыжен. Та чеберез адӟыны синъёсты паськыт усьтэм ик уг луы — векчи шапыкъёс ымныре пазьгисько.

Милям луонлыкмы вал Европаысь пӧртэм кунъёсы вуылыны. Австриысь Инсбрук городэ юнме шорысь ӧм вырӟе. Чагыр экран пыр «Орёл и решка» передачаез учкимы. Отын ӵапак та городэз возьматӥзы. Гочатӥзы: огаз ульчае, пе, ватэмын ӟенелик. Пушказ — 100 доллар. Кин шедьтоз — солэсь туспуктэмзэ телевизор пыр быдэс дунне адӟоз. Кӧня утчаськимы — узырмыны ӧз кылды. Милесьтым но шаплыосгес сюризы, вылды.

Отысен дыртӥмы Ваттенс городысь Сваровскилэн музеяз. Интыяськемын со пещера пушкы. Музее пырон вадьсын лэсьтэмын великанлэн йырыз. Ымысьтыз уен-нуналэн ву бызе. 13 залысь дуно кӧльыосты но изъёсты луэ кырманы но, кылзыны но, зынъяны но. Пӧлысьтызы тросэз пыртэмын рекордъёсъя Гиннесслэн книгаяз.

Швейцариын адямиос узыр уло. Котькудӥзлэн сямен олокӧня коркаез, машинаез, пудоез. Та сяна — ческыт дуно винаосын тырмытэм мурӝолэз.

Ольга Корепанова

Удмурт Дунне
By Удмурт Дунне Январь 28, 2016 13:15 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<