Шуг-секытъёсын артэ вормонъёс. Кызьы улэ но ужа кез калык?

Удмурт Дунне
By Удмурт Дунне Январь 27, 2016 08:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
SONY DSC

Кез ёрослэн йырыз П. Князев: али валтӥсь интые пуктӥськом фермаосты выльдонэз.

Мар вылез, умоез лэсьтӥське, кыӵе воштӥськонъёс шумпотто? Та но мукет ужпумъёс сярысь вера Кез ёрослэн йырыз Пётр Князев.

— Пётр Евгеньевич, кылемзэ арез кызьы йылпумъяды?

— Быдэс улонэ вордскем палъёсам ортче бере, колхозэн кивалтыкум но, ёросэн 10 ар кивалтытозям но, кылем арын кадь шуг гужем ӧй на кадь вал. Тулыс вань хозяйствоос но фермеръёс дыраз агротехникалэн куронъёсызъя валэс юос кизизы, будосъёс чебер пушйизы. Но араны потыса вуим-а, ӧм-а, куазь нуналысь нуналэ ведра дурен кадь кисьтыны кутскиз. Озьы 14 эштос пӧлысь 2-ез гинэ вань юоссэс аразы-кутсазы. Со «Гулейшур» но «Степанёнки» СПК-ос. Урожайзы но зӧк потӥз. Нырысетӥезлэн котькуд гектарысь шорлыдын 14,6 центнер люкаськиз, кыкетӥезлэн — 12. Нош быдэс ёросъя 10,1 центнер гинэ усиз. Озьы ик умойгес урожай басьтӥзы «Искра», «Маяк», «Большевик» но «Мысы» эштосъёс. Юн жаляса верано луэ, 3 сюрс гектар пала валэс юосмы лымы улэ кылизы. «Гулейшур» но «Степанёнки» хозяйствоослы ужаны дизельной комбайнъёссы юрттӥзы, ас дыраз металлоломе сётымтэзы иназ мынӥз. Гурт удысын гызмыльтэм но куддыръя умоен берытске.

Ёросмес пичи уд шуы. Гыроно-кизёно музъеммы 43 сюрс гектарлэсь ятыр. Со пӧлысь 15 сюрссэ тысё но пуртэсо юос басьто, турынъёс — 22, етӥн — 1 сюрс гектар. Но лудъёсмес лымшор палась хозяйствоосын уд ӵошаты, вӧл-вӧл паськытэсь бусыосмес уд адӟе, пичиесь, тэльёс вискы интыяськемын. Муосмы начаресь, горд сюй но со выллемесь. Озьы ке но валля арын быдэс ёросъя гектарысьтыз 12 центнер урожай басьтӥмы, нош 2011-тӥ арын 13,9 центнер люкамы вал. Кез калык, нокыӵе шуг-секытъёс шоры учкытэк, луонозэ но, луонтэмзэ но лэсьтэ.

Шуг-секытъёс дыръя но уг йыромо, ас хозяйствооссэс будон сюрестӥ нуо «Степанёнки», «Гулейшур», «Маяк», «Искра» но «Мысы» эштосъёслэн тӧрооссы Фёдор Першин, Владимир Дорофеев, Нина Максимова, Пётр Емельянов но Павел Сабуров. Валтӥсь специалистъёс пӧлысь висъясько «Труженик» ООО-ысь валтӥсь зоотехник  Любовь Васильева, «Степанёнки» СПК-ысь валтӥсь инженер Андрей Бузмаков, «Гулейшурысь» валтӥсь зоотехник Елена Дорофеева но мукетъёсыз. Соослэн но мукет кивалтӥсьёслэн но специалистъёслэн лулысь-сюлмысь тыршеменызы, ёрос огсыр азинске но юнма. Ваньмызлы соослы бадӟым тау карисько.

— Нош кызьы пудоды толъе? Фермаосты выльдӥсько-а?

— Капчи ӧвӧл ке но, оглом вераса, та секыт удысын арысь аре выль вамышъёс лэсьтӥськомы. Сое яркыт возьмато лыдпусъёс. Тани миым 26 сюрс 820 тонна йӧл кыским, валля арен ӵошатыса, 540 тонналы тросгес. Скаллы быдэ усиз 4 сюрс 796 килограмм, 2014-тӥ арын сярысь, 180 килограммлы трос. 5 сюрс килограммез ортчизы 6 хозяйствоос: «Искра» (5 сюрс 770 килограмм), «Большевик» (5 сюрс 610), «Гулейшур» (5 сюрс 580), «Степанёнки» (5 сюрс 554), «Родники» (5 сюрс 148) но «Маяк» (5 сюрс 051).

Али но йӧл умой потэ. Та вакытэ котькуд скаллэсь нуналаз шорлыдын 11,9 килограмм йӧл люкаськом, миым та дырен ӵошатыса, со 1,2 килограммлы уногес. Мукет сямен вераса, али нуналлы быдэ 66 тонна йӧл вузаськом, яке миым та дыре сярысь, 5 тонналы ятыргес.

Со азинсконъёс ас кожазы уг лыкто. Гурт хозяйствоос берло дыре валтӥсь интые пукто фермаосты выльдонэз. Кылсярысь, кылем арын «Искра», «Труженик»  но «Гулейшур» 200 скал тэрымон выль гид ӝутӥзы,  «Гулейшур» 100 кунянлы гид вуттӥз на. Ваньмызлы адӟем карымон берга «Степанёнки» эштос. Со ас кужыменыз 320 йыр скал тэрымон гид пуктӥз. Пудозэс думытэк возё, йӧл кыскыны нимаз зал лэсьтэмын. Лэсьтӥськон бригадазы тол но, гужем но ужа. Али нюлэс дасяло. Нош «Большевик» СПК 400 скал тэрымон гидзэ ӟеч-ӟеч тупатъяз: выль молокопровод пуктӥзы, липетаз югыт пырон лэсьтӥзы, выжзэ, укнооссэ вошъязы но мукет.

Миым 92 процентэз йӧлмы вылӥ сортэн кошкиз, нош валля арын со лыдпус 90 процент вал. «Свобода» но «Большевик» эштосъёс вань йӧлзэс вылӥ сортэн вузало. Соин ӵош ик йӧллэн ӟечлыкез будэ. Ортчем арын йӧллэн напез шорлыдын 3,67 процент луиз, нош белокез — 3,13 процент. Озьы ке но данакез хозяйствоос бадӟым табыш уг басьто. Малы ке шуоно йӧллэн дуныз, будэм интые, ялан кулэсме. Ёросамы ӧвӧл ни лейкозэн висись пудо. Со туж умой.

—  Дыр ӝог ортче, тулыслэсь вуэмзэ ум шӧдылэ. Кызьы солы дасяськиськоды?

— Азьвыл аръёсы сямен ик, валэс ю кидыс тырмыт кисьтӥм. Но ӟечлыкез лябгес, удалтонлыкез улӥын ке но, ӝыныез кондициозь вуттэмын. Ӝыныезлэсь унозэ муосмес кын улэ гырим. Со, веранэз ӧвӧл, тулыс кысык бусы ужъёсты ӟечгес но ӝоггес быдэсъяны юрттоз. Нош ӟегмы одӥг куиньмосэз гинэ киземын.

Миым озьы ик секыт вал етӥн будэтӥсь но сэстӥсь предприятиослы. Одӥг сюрс гектар пӧлысь одӥг куиньмосэз уйпал буртчин утялтытэк кылиз. Озьы «Кезский льнозавод» но «Кезпромлён» огазеяськонъёс мырдэм шокало, туэлы кидыссы но уг тырмы. Ватсаса нимаз ужрадъёс кутоно луоз.

Кылем сӥзьыл ик кутскимы техникамес тулыслы дасяны. Али кужмо тракторъёсты тупатъяськом, собере сеялкаосты, культиваторъёсты, герыосты но усыосты выльдом. Оскиськом, лудэ дыраз потом но кизёнмес умой ортчытом шуыса.

— Пётр Евгеньевич, котькуд ёросын сямен ик, тӥляд но лэчыт ужпумъёсты уно. Соос пӧлысь мар туннэ тужгес зол сюлэмшугъяськытэ?

— Сюресъёс уродэн кӧня курадӟонъёс но ыштонъёс адӟе калык. Куашкамын Кулига черкогуртысь Кезэ ветлон сюрес. 5 иськем сюресэз тупатъяны элькун коньдон уг шедьты. Сое миым лэсьтыны кулэ вал, но нош ик туэлы кельтӥзы. Нялтас вераса, ми ведь асфальт сюрес ум куриське, кӧльыен вӧлдыса но, урод ӧй луысал. Калык кыӵе шумпотысал. Милям ёростӥмы 500 иськем сюресъёс кыстӥсько. Со пӧлысь ӝыныезлэсь ӧжыт гинэ тросэз асфальтэн шобыртэмын.

Кулигаын, Чепцаын но Кезын секыт югдур кылдэмын юон вуэн. Со уг тырмы. Кезлэсь 6 иськемын ӟеч ву шедьтӥм. Но сое черкогуртэ вуттон понна  уно коньдон кулэ. Ужпум со бордын.

Но милям суй-пыдмы уг юскиськы, шуг-секытъёсты вормыны дышемын ни. Озьы шумпотон но лыктэ. Гурт удысэз азинтон понна уно ужрадъёс кутӥськомы. Соос герӟаськемын музъем ужез умоятонэн, пудо вордонэз азинтонэн. Миым гурт хозяйствоосын ужасьёслэн шоро-куспо уждунзы ёросъя 11 сюрс манетлэсь уно луиз, нош азьмынӥсь эштосъёсын со 15-16 сюрс пала усе. Адямиос макем ӟеч тыршо, сокем зӧк коньдон басьто.

Геннадий Романов

Туспуктӥз В. Беломорских

Удмурт Дунне
By Удмурт Дунне Январь 27, 2016 08:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<