Шаерысьтымы хозяйствоос 2015-тӥ арын 67 миллиард манет тыр вуз поттӥзы

Удмурт Дунне
By Удмурт Дунне Январь 26, 2016 10:21

Гурт удысъя но сиён-юонъя министр Александр Прохоров верамъя, шаерысьтымы хозяйствоос 2015-тӥ арын 67 миллиард манет тыр продукция поттӥзы. 2014-тӥ арен ӵошатыса, та 6 миллиард манетлы уногес.

0103057,Вавожский район,деревня Гурезь-Пудга,СПК Луч,ферма,животные,корова

2015-тӥ арын шаерамы 624,4 сюрс тонна йӧл кыскемын, валля арен ӵошатыса, со 24 сюрс тонналы тросгес.

Тужгес бадӟым барыш вайиз йӧл кыскон. Котькуд скаллэсь миым хозяйствоосын кыскыны быгатӥзы 5 сюрс 518 килограмм йӧл. 2014-тӥ арен ӵошатыса, та 167 килограммлы уногес. Шӧдскымон азинтӥськизы фермеръёс но: котькуд сюролэсь басьтӥзы 4 сюрс 920 килограмм йӧл, та 205 килограммлы тросгес.

Тужгес трослы йӧлзэс йылтӥзы шарканъёс — 3 сюрс 354 тонналы. Таослэсь ог 1 сюрс тонналы ӧжытгес йӧл басьтӥзы дэбесъёс но вавожъёс.

— Берло дыре хозяйствоосмы саклык висъяны ӧдъязы умой выжыысь пудо басьтонлы, — вера Шаркан администрациысь гурт удысъя управлениысь валтӥсь зоотехник Марина Куклина. — Кылсярысь, «Кипун» хозяйство 2006-тӥ арын  Германиысь кӧня ке йыр скал вуттӥз вал. Зэм, кунгож сьӧрысь сюроос асьме инкуазьлы дышемын ӧвӧл, тазалыксы лябњемен, соосты пурт улэ пумен келяно луиз. Но кунянъёссы кылизы. Соос араз 10 сюрс килограммлэсь трос йӧл сёто. Нялтас вераса, ёросамы тамында йӧл сётӥсь сюроос 40 пала лыдъясько. Со сяна, 7 сюрс килограммлэсь уногес йӧл сёто ог 750 скалъёс. Таос ванен ик ёрос азьпала потэ. Пудо сиёнлэсь но ӟечлыксэ туж чакланы выриськомы.

Арез ыштонъёсын йылпумъязы Якшур-Бӧдья, Кияса, Сьӧлта ёросъёс. 2014-тӥ арен ӵошатыса, киясаос 604 килограммлы ӧжытгес йӧл кыскизы.

— Огез бадӟым хозяйствомы — «Киясово» агрокомплекс — лейкозэн нюръяське, — валэктэ Кияса администрациысь гурт удысъя управлениысь валтӥсь зоотехник Анатолий Рыболовлев. — Татын ог 200 йыр скал черламын. Пудозэс выльдыны выро бере, йӧл кысконын ыштонъёстэк нокызьы уг луы. Сыӵе ик югдур Суворов нимо хозяйствоын. Но миым одӥг йырлы но скалъёсмес ӧм кулэстэ. Соин ик меӵак вераны быгатӥсько: ар пумозь  чакласькомы ёросын йӧл кысконэз 1 сюрс тонналы йылтыны. 2020-тӥ арозь шаерамы йӧл кысконэз 1 миллион тоннаозь вуттыны косэмын бере, пудомес отчыозь 1 сюрс 250 йырлы будэтыны чакласькомы. Озьыен, йӧлмы эшшо ог 8 сюрс тонналы йылоз. Та ужпумез быдэстон борды али ик кутскиз ни «Киясово» агрокомплекс: ар кутсконын отын усьтӥськиз скал кыскыны выль зал. Басьтыны чаклало 100 йыр пудо. «Дубровское» экоферма но гидъёссэ паськытатыны малпа.

Матысь 5 ар ӵоже шаерамы кулэ лэсьтыны 38 сюрс скаллы интыос. Туэ пуктӥськон понна республикалэн бюджетысьтыз висъямын 120 миллион манет.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Январь 26, 2016 10:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<