Шаермы ассэ ачиз сюдэ. Кызьы дунъя ортчем арез Тӧро?

Удмурт Дунне
By Удмурт Дунне 21 января, 2016 12:04

Ар пумын элькун Тӧро Александр Соловьёв журналистъёсын пумиськылӥз, мыло-кыдо валэктонъёс сётӥз соослэн юанъёссылы.

А. Соловьёв: тыршись муртъёслы номыр уг люкеты.

А. Соловьёв: тыршись муртъёслы номыр уг люкеты.

2015-тӥ ар ӵоже трос вал Правительствоез пыкылонъёс  — кылсярысь, ЖКХ удысъя, тазалыкез утёнъя  кивалтӥсьёслы, но воштӥськонъёс ӧз ортче. Озьыен, Тӧролы яра министръёслэн ужамзы?

— Ваньмызлэн уг, — меӵак шуиз кивалтӥсь. — Берло дыре зэм но туж трос вал пыкылонъёс коммунальщикъёслы,  шоркарысь калык, тол кутскыку, ас квартираосаз кынмыса улӥз. Но  та удыс понна кыл кутӥсь — Правительстволэн Тӧроезлэн воштӥсез Андрей Сивцов — ялан оскытыны выре, югдур чидамон шуыса. Со дыре ик, арысь аре суред уродме: 2014-тӥ арын  толалтэ куазен пилиськиз 218 гумы, туэ — 347.

Вань мукет но  пыкылон: шаермы ӧз быгаты  федерал бюджетысь висъям коньдонэз уже кутыны — таиз воксё валантэм. Мукет улосъёс сое басьтыны уг быгато, нош ми дась коньдонэз кутыны ум валаське.

Министръёслэсь тыршемзэс мон нырысь ик дунъясько палэнысь уксё (инвестициос) кыскыны быгатэмзыя — сотэк азинскыны секыт. Но та ласянь асьмелэн ужмы туж дыг мынэ — кылсярысь, миым элькунамы 90 миллиард тыр инвестициос кыскемын ке вал, туэ — 52 миллиард гинэ.

Шаерамы усьтӥськысал ке нимысьтыз экономической зона (сыӵе статусэн инты ужбергатӥсьёслы паськытгес луонлыкъёс кылдытэ, налогъёсъя капчиятонъёс сётэ), кун сьӧрысь инвестициос кыскыны юрттысал.

— Кылем арын мон та пумысен вазиськылӥ Россилэн Президентэзлы Владимир Путинлы, но мыным ӵектӥзы машина поттон кластермес нырысь рос-прос пыд вылаз ӝутыны. Шонер, дыр. Удмуртиын машиностроительной кластер  2015-тӥ арысен ужа ни, валче ужан сярысь огкыл гожтэмын 12 предприятиен, эшшо  5-ез ӵош ужаны мылкыдзэ вера. Со юрттысал асьмелы заказъёс вуттыны, ватсаса ужан интыос кылдытыны. Кластерез азинтыны элькунмы 2016-тӥ арын висъялоз 22 миллион манет. Чакламъя 360 миллион висъяны кулэ федерал бюджет. Но кластер азинлыко мед ужалоз шуыса, кулэ усто специалистъёс. Соос ӧвӧл! Кулэ будэтыны производствоез — со понна али ужаськом цифровой  управлениен станокъёс лэсьтон бордын.

Со понна ӧжыт ке но волязы сюресъёс. Миым  гуртъёсын лэсьтэмын 100 иськем сюрес, тупатэмын 400 иськемлэсь трос. Шумпоттыны быгатӥм сад-бакча возисьёсты. Отчы ветлон сюресъёс воксё ярантэмесь ни вал, автобусъёс ортчыны ӧз быгатылэ, нош али город котырысь бакчаосын адямиос арбыт уло, соин ик одно юрттыны кулэ. Туэ но талы 50 миллион манет висъямын луоз.

Шуггес югдур бадӟым сюресъёс лэсьтонэн. Кылсярысь, трос аръёс ӵоже ни вераськон мынэ Ижысь Эграла выль сюрес лэсьтон сярысь — алиез, специалистъёс верамъя, туж шуг, соин отын котькытынлэсь трос шуккиськон учыръёс луо. Вылез сюрес проектъя 12 иськемлы вакчигес но луыны кулэ. Лэсьтӥськисьёс дась уж борды кутскыны, но кулэ 80 миллиард манет…

Элькунэз азинтонын мыло-кыдо тыршо гуртоос: туннэ шаермы ассэ ачиз сюдыны быгатэ, со сяна, сиён-юонмес келяськом на эшшо 63 улосэ.  Тыршись муртъёслы номыр уг люкеты — тодады вае ай, кыӵе зоро вал кылем гужем, нош гуртоос сиён-юон поттонэз 4,2 процентлы будэтӥзы но ай — оглом 64 миллиард манет тыр сиён поттӥзы.

Куке мон  2014-тӥ арын ужпум пуктӥ 2020-тӥ арозь миллион тонна йӧл поттыны, импортозамещение сярысь верась но, малпась но ӧй вал ай, но табере валаськом: шонер малпаськиськеммы. Но йӧл поттонэз будэтон понна трос лэсьтоно — пуктоно 120 выль ферма, басьтоно 37 сюрс йыр  пудо. Россиысь гурт удысъя министр Александр Ткачёв мыным  дурбасьтэ, соин та малпанмы пилотной проект луыны быгатоз, сое быдэс Россие вӧлмытыны луоз. Декабре мон вуылӥ Вавож, Алнаш, Можга ёросъёсысь пудо утисьёс доры, соослэн ужамзы шоры учкыса, оскон  уката юнма. Ми одно ик юрттыны тыршом гурт удыслы, угось СПК-лэн быдэс экономикаез, гуртлэн улэм-вылэмез возиське йӧл вылын.

Гуртэз азинтон сярысь ми ум вунэтӥське — нимысьтыз программая 2015-тӥ арын пуктэмын 11 сюрс квадрат метр улон инты — талы висъямын 90 миллион манет. Азинтӥське гуртъёсы газ кыскон.

Александр Соловьёв валэктӥз трос чыры-пыры  юанъёслы но, кылсярысь, кызьы со учке кузь тол каникулъёс шоры, кызьы пумиталля Выль арез. Выль ар уе ноку нокытчы кошкылэме ӧвӧл, шуиз со, котьку пумитасько семьяеным ӵош кузь ӝӧк сьӧрын. Шутэтскон нуналъёс кулэ, угось соку  анай-атайёслэн луонлыксы кылдэ нылпиоссылы тросгес дырзэс висъяны, пайдаё шутэтскыны.

— Мон но тыршисько внукъёсылы саклык висъяны, — шуэ А. Соловьёв, — ӵош нискыланы отпускын дыръя сяна уг пӧрмы,  мукет дыръя уг но адӟылӥськы уго — весь уж… Пинал дыръям малпасько вал, кивалтӥсь луыны номыр секытэз ӧвӧл. Но соку мон кивалтӥ 20 муртэн, нош куке тон кыл кутӥськод миллион но ӝыны калык понна, мукет ужпум. Но али со сярысь малпаськыны бер ни: кыткиськи бере — ужано. Уг тодӥськы, кӧня мон тӧроын  луо — вить-а ар, дас-а, но одно тыршо ас бӧрсям ӟеч пытьы кельтыны.

Зинаида Рябинина

Удмурт Дунне
By Удмурт Дунне 21 января, 2016 12:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<