Сарапул ёросысь нылкышно пыриськиз «Модный приговор» передачае

Удмурт Дунне
By Удмурт Дунне 11 января, 2016 11:35

Туэ 14-тӥ апреле телевизор пыр Нырысетӥ каналын «Модный приговор» передачаын возьматӥзы Сарапул ёросысь Оленье Болото гуртысь Людмила Голотинаез. Дӥсяськонъя экспертъёслэсь визь-кенешсэс кылэмез бере макем воштӥськиз нылкышнолэн улонэз?

Л. Голотина «Модный приговор» передачаын.

Быдэс даурзэ медсестраын ужам кышномурт 50 арессэ пусъён азяз ик «Модный приговоре» куриськыны медэ ни вал. Улонзэ воштэмез потӥз уго. Экспертъёс ки улэ шедьыса, оло, чагыр но яркыт-чагыр буёлэз сяна, мукетъёссэ но гажаны ӧдъялоз кожаз. Солэн вань дӥськутэз, посудаез лызпыръем. Чипы карез гинэ но лыз. Капкаез но кенерез сярысь веранэз ик ӧвӧл. Бызьыны но со чагыр дэрем дӥсяз вал. Та буёлэз яратон мылкыд Людалы 14 аресказ пыӵаз. Гужемъёсы анаез вӧзын заводын юрттӥсьын ужаса, нырысетӥ уждунэныз чагыр пальто басьтӥз. Со дырысен инбам тусо буёллы синмаськиз. Лыз йырсиен но огпол ветлӥз — пурысялэс буёл басьтӥз вал, нош пӧрмиз лыз. Оло, «Модный приговорын» мукет буёлъёс шоры синзэ усьтозы, малпаз вал. Эшъёсыз но, гуртоос но ӟукыртыны ӧдъязы вал ини: огпол ке но мукет дӥсь басьты тон, Люся. Лида бускелез воксё но эшезлэсь адӟем карыны кутскиз. Быдэс Оленье Болото пумен чагыра ни кадь. Но 50 аресказ Людмила Владимировналэн передачаез лэсьтӥсьёслы вазиськыны дӥсьтонэз ӧз тырмы. Туэ, 54 аресаз вуыса, выльысь ӝутӥськиз.

Вазиськонзэ Интернет пыр келямез бере кык нунал но ӧз ортчы — Людмила Владимировналы Москваысь редакторъёс жингыртӥзы, кастинге ӧтизы. Нылкышно кырӟаны-вераны яратэ, Оленье Болотоысь культурая юртысь ужрадъёсы котьку пыриське. Капчи мылкыдыз москваослы кельшиз. Сое съёмкаосы ӧтизы. Сьӧраз вайыны куризы 40 пумо дӥсь. Валамон ни: нылкышнолэн быдэс чемоданэз чагыралэс дэрем-кофтаосын тырмиз. Модая эксперт Эвелина Хромченко пусйиз Голотиналэсь дӥсь шонер бырйыны быгатэмзэ, туала вакытэ чагыр буёл модаын, шуиз. Москва магазинысь быръем дӥсьёсты но ӧз курла. Зэм, передачаез нуись Александр Васильев горд блузка быръемез пумысен куаретӥз ик: бамды сотэк но гордалэс, горд дӥсь дӥсяса, плита дорын пӧраськыса сылэм мурт кадь адӟиськиськоды, шуиз, горд тусо нылъёслы бездытгес буёл быръёно, пе.

Кыӵеен вуиз но кыӵе луиз.

—  Эвелина Хромченко телевизор пыр гинэ лек тусо, адямиосты кылын бышкись — ролез сыӵе. Ваче син со мыным туж капчи мылкыдо йӧтӥз. Передачаын мыным дурбасьтӥсь Надежда Бабкина но эш кадь ассэ возиз, ялан шуылӥз: Люська, держись,  — вера Людмила Владимировна. — Нуназеысен 1 час уйшорозь передачаез камерае гожтӥзы. Но та дыр ӵоже мон, гуртысь потэм кышномурт, аслым ачим королева кадь йӧтӥ. Буязы, чеберъязы, ӵышкизы. Йырсиме котьку пуныса нуллӥсько вал, пельпумозям ӵышкылэме ик ӧвӧл. Палэнысен кыӵе адӟиськисько шуыса, сюлэм шурдӥз ик. Синучконъёсты котыр ворсазы уго. Асме нокытысь но адӟеме уг луы. Бускельёсме, эшъёсме, картме Москвае сьӧрам нуи. Подиум вылэ потыкум, соос мыным синучкон кадь вал. Учкисько но — соос воксё абдрамын. Синучконэз усьтӥзы но, асме ачим ик тодмамысь дугдӥ. Кин та? Воксё городской кариллям. Тыбыры ик шонертӥськиз кадь. «Мон нокыӵе Люська ӧвӧл ни» шуэмме ик ӧй вала. Передачае пыриськись Лида бускеле соку шуиз: «Людмила Владимировна тон». Людмила Владимировна зэмен ик эксэй кышно кадь адӟиськиз.

Передача бере адямиос вераськон ӝутӥзы: дораз ог 40 сюрс манет тыр дӥсь вайиз, ваньмыз понна ассэ тырытӥзы. Но нылкышно верамъя, вань дӥсьсэ солы дунтэк сётӥзы. Маин мон тыром, шуэ. Улэ пенсиен, школаын дышетскись внуксэ будэтэ. Уксё тыроно луысал ке, передачае ик ӧй пыриськысал, пе. Передача ортчем бере сое шаерамы тодманы ӧдъязы, шуэ. Зэм, йырсиез али будэ ни. Гуртын пуныса ик капчигес, уг люкеты, сиён пӧраку но. Нош чебер дӥсьсэ дӥсялля ик. Зэм, чагыр буёлэз яратэмысь ӧй дугды, шуэ.

Елена Сараматова

Удмурт Дунне
By Удмурт Дунне 11 января, 2016 11:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<