Маин дано адями? Николай Алексеев вань улонзэ сӥзиз гурт удыслы

Удмурт Дунне
By Удмурт Дунне Январь 27, 2016 09:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Гурт удысысь одӥгез тодмо, визьмо но быгатӥсь кивалтӥсь Николай Алексеев улэ но ужа Пичи Пурга ёросысь Вуж Мӧнья гуртын. Со татын гажано адями.

054315,деревня Старая Монья,Малопургинский район,председатель СПК Искра,Алексеев Николай Романович

«Удмуртия» огазеяськонлэн кивалтӥсезлэн воштӥсез Н. Алексеев.

Нырысьсэ

Гуртын будэм но война вакытэ вордскем удмурт пияш пичиысен шӧмъяз шӧгзэ но, кузьытсэ но, котькыӵе ужъёсты оскымон быдэсъяз. Сыӵе тыршемзэ но сюлмаськемзэ адӟыса, гуртоосыз сое 1980-тӥ аръёсы «Искра» колхозлы предэ бырйизы. Быдэс гуртэн басьтӥськизы музъем ужез умоятон но пудо вордонэз азинтон борды. Соин ӵош егит кивалтӥсьлэн йыраз туж трос визьмо малпанъёс бергазы. Соос пӧлысь одӥгез — гуртазы колбаса поттонэз радъян. угось гуртоос сомында пудо вордо, резина сапегъёссы, фуфайкаоссы толэн-гужемен вылысьтызы уг усьыло, нош колбаса шӧмез уноез уг тоды.

Николай Романовичлэн кичӧлтонэзлы нырысь-валысь уноез гурт калык ӧз оскы. Но Алексеев чигнась выжыысь ӧвӧл. Малпамын — одно лэсьтоно. Нош вылез ноку капчиен уг сётӥськы. Ӵапак со вакытэ сое быръё колхозникъёслэн Москваын ортчоно Всесоюзной съездазы. Калык верамъя, кион ыме гон пурӟем кадь луиз Алексеевлэн бадӟым кенеше мынэмез.

Съездысен Николай Романович тодматске кулэ адямиосын, ветлэ министерствое но мукет интыосы. Сюлмыз ӧжытак буйгаз переработкая специалистэн лад-лад кенешемез бере. Соиз соглаш луиз Вуж Мӧньяе лыктыны но колбаса поттон удыслы дышетыны. Вот таиз шумпотон ке, шумпотон! Но Н. Алексеевлэн йыраз дырын-дырын малпан чилектылӥз: быгато-а та быдӟа ныпъетэз вормыны? Но ваньзэ утчамез донгиз кожаллямтэ сюрес вылэ. Семьяез валаз, дурбасьтӥз кузпалыз Нина Григорьевна, пумит ӧз луэ бордаз ужась адямиос но.

Но улонын ваньмыз  вӧй вылтӥ кадь вольыт уг мыны. Николай Романовичез кӧня выризы палэнтыны, янгыше уськытыны, лэсьтэм ужзэ асьсэлы карыны. Но ӧз пишмы соослэн озьы дауртэмзы. Трос бызьылоно луиз Николай Романовичлы юристъёс дортӥ, потоно судъёс пыр. Кӧня кужымез но тазалыкез кошкиз юнме шорысь ӝутэм нюръяськонэ. Тазэ ачиз но матысь адямиосыз гинэ тодо.

Табере 23-тӥ арзэ ини Пичи Пурга ёросысь Вуж Мӧнья гуртын потто уно пумо ческыт колбаса, пельнянь но мукет сӥль сиёнъёс.

Республикамылэн историяз колбаса лэсьтонъя «Арама» цех весяклы пыриз гуртын нырысьсэ таӵе удыс усьтэмен. Та дырозь нокин но ӧз дӥсьтылы будэтэм сӥлез гуртын ик колбасалы но музон сиёнъёслы пӧрмытыны.

Быдэс семьяен

Николай Романовичлы шуд усиз асьме делегациен Голландие вуылыны. Отын но со пыр-поч тодматскиз фермеръёслэн уженызы, переработкаен. Паймиз бадӟым агропромышленной огазеяськонъёслы. Одӥгез но  фермер, асьмеос сямен, ас понназ нимаз хозяйство нуыны уг курадӟы. Ваньмыз соос — одӥг кужым. Государство ласянь туж ӟеч юрттэт вуэ: техника, коньдон, удобрениос, гербицидъёс. Ваньмыз вань — продукция гинэ потты. Голландецъёс, пе, меӵак шуо: ми номыр но выльзэ ӧм малпалэ. Ужаськом озьы, кызьы дышетӥз тӥляд тодмо экономистты А. Чаянов.

Тӥни озьы, дуннеысь азьмынӥсь технология пыкъяське Россиысь наука вылэ, нош асьмеос кунгож сьӧры, сюрсъёсын, миллионъёсын уксё куштыса, дышетскыны но адӟем карыны потаськом.

Кӧня ке улыса, Голландие ветлӥз Николай Романовичлэн бадӟым пиез, Миша, кык арня ӵоже тодматскиз сӥльлэсь пӧртэм пумо сиёнъёс дасян амалъёсын. Озьы Алексеевъёс быдэс семьяен нуыны кутскизы атайзылэсь кылдытэм производствозэ. Михаил Николаевич — директор, Александр Николаевичлы оскемын вал снабжение но технология, нош ачиз Николай Романович пудо вордон комплексэн кивалтӥз. Берлогес Александр Николаевичез Можга ёросысь «Русский Пычас» огазеяськонэн кивалтыны ӧтизы. Нош валля арын предприятиос огазеяськизы но «Удмуртия» ООО кылдытӥзы. Валтӥсь директор луиз Александр Алексеев, мясокомбинатсы кылиз Михаил Алексеевлы, парсь вордон комплексэз нуэ ачиз Николай Романович. Со ик луэ валтӥсь директорлэн воштӥсез.

Озьы Н. Алексеевлэн малпанъёсыз каллен-каллен улонэ пыӵало. Табере со чакла матысь дыре 2 сюрс 800 йыр скал тэрымон комплекс, 1 сюрс 200 йыр мумы парсь возён ферма пуктыны, йӧл но сӥль сиёнъёсты поттонэз быдэсак радъяны. Отчы озьы ик пырысалзы скал но парсь кыедэз уже кутон, туала куронъёслы тупась лабораториос пуктон, муосы ву кисьтан но мукет. Та ужъёсты быдэстыны ичизэ 4,5 миллиард манет кулэ луоз. Но со вакчи дыр куспын берытскоз. Николай Романовичлэн верамезъя, али, пе, мыным та ужъёслы 100 миллион манет но Удмуртиысь Правительстволэн дурбасьтэмез но юрттэмез кулэ. Озьы ужъёссы вырӟысалзы. Угось огез банк уксё висъяны пумит ӧвӧл.

Николай Романович вордскем гуртсэ шулдыртон, чебертон понна луонозэ но луонтэмзэ лэсьтӥз: кылем даурлэн 80-тӥ-90-тӥ аръёсаз Вуж Мӧньяе колхозлэн кужыменыз газ вуттӥзы, коркаосы пыртӥзы. Со вакытэ ик кык квартираен 59 юртъёслэсь ӵыжак-выль посёлок вордскиз. Гуртэтӥ асфальт сюрес лэсьтӥзы. Пуктӥзы нылпи сад, школа. Шаерамы вуж мӧньяос нырысь ик ӝутӥзы туала стадион, битум сюресэн спортзал, куасэн бызьылыны югдытэм сюрес но мукетсэ. Кунгож сьӧрысь куноос Вуж Мӧньялэн чеберезлы али но паймо.

Николай Романович шоры учкыса, кин оскоз, со 75 арессэ пусъе шуыса. Чиль-чиль сьӧд йырсияз отӥ но татӥ азвесь нюжаос кырмиськемын ке но, соос пиосмуртэ йӧно гинэ каро. Чагыр синъёсаз азьло кадь ик задор мылкыд. Озьыен, ӵуказеез нунал сайкыт луоз.

Геннадий Романов

Удмурт Дунне
By Удмурт Дунне Январь 27, 2016 09:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<