Росреестрлэн Удмуртиысь управлениеныз кивалтӥсьлы В. Осиповлы — 60 арес

Удмурт Дунне
By Удмурт Дунне 21 января, 2016 12:41
osipov

Вячеслав Осипов.

Кизилиос инмысь уг усё

Росреестрлэн Удмурт Республикая управлениеныз кивалтӥсь Вячеслав Осипов 60 арес тырмонзэ пусйиз. Элькунмыя югдурез утёнъя министрлэн воштӥсез вал, удмуртъёс пӧлысь нырысь ик милициысь генерал-майор луиз. Россиысь Юстицияя министерстволэн Удмуртиысь ёзэныз кивалтӥз. Юстициысь 2-тӥ классъем кун советник луэ, таиз генерал-лейтенантэн ӵоша.

— 40 арлэсь ятыр погонъёс нуллӥсько, уставъя улӥсько, — шуэ Вячеслав Сергеевич. — Нош солэн куронъёсыз чурытэсь. Кузпалы но куддыр куаретэ: кызьы, пе, тынэсьтыд чурыт куронъёстэ ужасьёсыд сокема чидало ини. Муртлэн ужаз нырме уг чуртнаськы, но аслэсьтымзэ умой лэсьтыны тыршисько. Мон ведь ялан Москва азьын кыл кутӥсько. Но ужасько Удмуртиысь калык понна. Вордскем шаерысьтым кемалы кошкылэме ӧвӧл. Кӧня ке пол Кавказэ командировкае вуылӥ, Москваын ужай но дышетски. Но Москва мыным кулэ ӧвӧл. Удмуртиын вордски, дыр ке вуиз, Инмар татчы ик мед кельтоз.

Вячеслав Осиповлэн пичи дырыз Вало шур дурысь удмурт гуртын ортчиз.

— Вордски мон Можга ёросысь Ягул починка гуртын. Паспортам со Удмурт Вишур гожтэмын. Мамаелэн верамезъя, гуртамы тужгес бадӟым дыръяз но 27 юртъер гинэ вылэм. Мамае вуз карись вал, атае колхозын бригадир но, огвакытэ кузёез но, сельсовет тӧро но луыса ужаз. Дас классэз йылпумъякум, папае шуиз: гурт удысъя институтэ мынод. Мон пумит луи. Соку экран вылэ «Офицеры» фильм потӥз вал, со мынэсьтым ожгарчи луон мылкыдме бугыртӥз, — тодаз вае В. Осипов.

Школаез йылпумъямез бере Вячеслав Осипов военной училищее пыриз вал. Но ракета установкаосын ужаны дасян инты сое малпаськонэ уськытӥз: вань улондэ музъем пушкысь шахтаосын ортчытод-а? Дышетсконзэ куспетӥ карыса, армие кошкиз. Шедиз Тулаысь дано десантной дивизие. Отын парашютэн тэтчанъя но самбоя нырысетӥ разрядэн спортсмен луиз.

Армиысь дор палаз бертэмез бере Вячеслав Сергеевич Можгаысь милицие ужаны пыриз. Службазэ нуон  висказ ик Пермьысь кун университетлэн юридической факультетаз дышетскиз. Кутскиз ужан тубат кузя тубыны.

— Кизнерын мон ёрос милициен кивалтӥсьлэн воштӥсез луыса 3 ар ужай, — тодаз вае Вячеслав Сергеевич. — Собере 4 ар Можгаысь РОВД-лэн кивалтӥсезлэн воштӥсез вал, 6 ар кивалтӥсьын тырши. Бӧрысь ини элькунысь экономика удысын йыртэмасьёсын нюръяськонъя управлениен 2 но ӝыны ар кивалтӥ. Югдурез утёнъя министрлэн нырысетӥ воштӥсез 5 ар вал. Мон шонерак ваньзэ синме вераны дышемын. Со куддыр аслым ик пумит берытске ке но. Но сыӵе сямы: умойгес дыраз меӵкытыны,  верамтэ понна бӧрысь ӧпкелёно медаз луы шуыса.

— 1990-тӥ аръёсы йыртэмасьёс трос вал. Со дыре Удмуртиын шимес учыр луиз: югдурез утёнъя министрлэсь нырысетӥ воштӥсьсэ Николай Перевощиковез но семьязэ кыӵак быдтӥзы. Со интые тӥледыз пуктӥзы. Туж секыт вал, дыр, соку?

— Туж секыт вал. Трос валантэмез: кызьы, ма ласянь кутсконо? Одӥг интые мынӥськод — куинь шӧй, кӧня ке час ортчыса, эшшо кӧня ке мурт виемын. Чидамы. Но ужез умойтэм радъяменымы йырин милициын ужасьёс пќлысь нокин ӧз кулы. Чечняысь войнаын бен быремъёс вал. Жаль. Соин ужасьёсмес дасянлы туж бадӟым саклык висъяллямы. Бен, куд-огзэ йыртэмасьёсты шараяны ӧм быгатэ, али но шедьтыло на соосты. Но милям дырмы уг тырмы вал ваньзэс утчаны. Ми ведь, арняосын доре бертатэк, ужамы соку. Нылпиосылэсь но будэмзэс умой-умой ӧй адӟы кадь. Улонэз берыктыны луысал ке, семьяелы тросгес дыр висъясал. Но малпасько, соку уж дорын маке пиртэш кыльысал. Озьы ке но семьяе азьын янгыше вань.

— Нырысетӥзэ Чечняе мыныкуды, тӥ полковник гинэ вал. Но отын кивалтӥды генералъёсын но, соос азе но чурыт куронъёс, пе, пуктылӥллямды. Асьтэос но отысь генерал луыса берытскиды кадь.

— Бен, мон асьме элькунысьтымы югдурез утёнъя министрлэн нырысетӥ воштӥсез вал соку, но Чечняе Россия Федерациысь Правительстволэн Тӧроезлэн распоряжениезъя вуи. Одӥгез москвич юа, Удмуртия, пе, со Красноярск улосын-а? Ӧвӧл, шуисько, кыдёкынгес, Магадан сьӧрын. Тунсыко потӥз мыным, кин та адями? Личной делозэ учки но: Москваысь огаз префектураысь милициен кивалтэ. Ма, кызьы сыӵе нодтэм адямиез сыӵе вылӥозь ӝутӥллям? Но со огназ сыӵе ӧй вал, одӥгезлэн ужамез уг поты, мукетыз азьтэмъяське. Сыӵе кулэтэм адямиосты — ӝынызэ пала группировкаез,  тросэз москвичъёс вал — командировкаысь доразы ӝыныё келяй. Ну, соос шуизы, ми тыныд пунэмзэ берыктомы али. Малпаса улӥ ик: кытын ке пыдзэс пуктыны быгатозы-а? Ӧз быгатэ. Чечняын ик мыным генерал звание сётӥзы.

— 2001-тӥ арын Удмуртиын генералъёс клуб кылдытӥзы. Тӥ ваньзылэсь егит вал ке но, тӥледыз кивалтӥсе бырйизы.

— Мыным 43 арес тырмиз соку. Шаерамы сыӵе арлыдын нокин но генерал звание ӧз басья на вал. Огазеяськонын ми егитъёсты патриот мылкыдын будэтон вылысь ужамы. Уж тырмыт. Со сямез азьланьтыны кулэ, малпасько.

1999-тӥ арын Вячеслав Осиповез элькунысьтымы юстицияя министре юнматӥзы. 2005-тӥ арысен со кивалтэ Кун регистрацияя, кадастръя но картографияя федерал службалэн  (вакчияк Росреестр) Удмуртиысь ёзэныз. Кӧня кужым но тодон-валан, шонер дунъет сётыны быгатэм кулэ со понна. Кадръёсын ужанэз умой пуктӥськод ке, уж кулэезъя радъяське, шуэ В. Осипов.

— Нырысь-валысь, милициысь татчы выжеме бере, туж трос литература лыдӟоно луиз. Но кулэ дыръяз ужасьёсылэсь пыр-поч юалляськыны, валэктон курыны но уг возьдаськиськы. Соос удыссэс ӟечгес тодо ук. Табере ваньмыз интыяз пуксиз ни.   Куддыр шуисько: мон тӥледлы уг люкетӥськы-а? Вань ужмес ӟеч радъямы, оборудование тырмыт. Черодъёс  уг кылдыло, ӝожтӥськисьёс ӧвӧл, кивалтӥсьёс уг куарето. Ваньмыз огсыр, радызъя мынэ.

Гадь тыр наградаосыз пӧлысь Вячеслав Сергеевич тужгес данъяське Анатолий Кони нимо медаленыз. Со гадьпус Россиысь Юстицияя министерстволэн вылӥ данъетэз луэ.

Владимир Михайлов

 

Удмурт Дунне
By Удмурт Дунне 21 января, 2016 12:41