Пичи Пурга ёросысь Куреггуртысь лыдӟисьёсын пумиськон ортчиз

Удмурт Дунне
By Удмурт Дунне 21 января, 2016 12:45

Лариса но Олег  Дыгаев кузпалъёс ярато лыдӟиськыны. Соос доразы уно журнал-газетъёс басьто, кема аръёс ӵоже ини «Удмурт дунне» газетэн эшъясько. Олег Николаевич — ужбергатӥсь. Лариса Фёдоровна покчи классъёсы ветлӥсь нылпиосты визьнода.

dygaev

Е. Тимофеева но Дыгаев кузпалъёс ярато лыдӟиськыны.

— Ӟучо-удмурто гуртын будыса, удмурт кылын лыдӟиськыны ик уг быгатӥськы вал, — вера Лариса Фёдоровна. — Нош Куреггуртэ вуыса, воксё удмуртоми. Олег Николаевиче шалтыр гинэ удмурт газетъёсты лыдӟе вылэм. Табере шумпотыса вераны быгатӥсько ини: «Удмурт дунне» газет монэ лыдӟиськыны гинэ ӧвӧл, удмурт кылын вольыт но ӝикыт вераськыны дышетӥз.

— Мон, пичи дырысеным «Советской Удмуртия» газетэз лыдӟыса, будэмын, — шуэ Олег Николаевич. — Туж но туж со мыным кельше. Выль газетэз киям кутӥсько ке, мылкыды ик ӝутӥське, мае но уд гожъяське. Но ай со озьы гинэ мон кие уг вуы, кузпалыным ми сое вожмаськыса лыдӟиськом. Ченгешонъёс медаз потэ шуыса, газетэз кыклы люкиськом. Нырысь ик лыдӟыны кутскисько «Тӧр шорын» рубрикаез. Асьме палась адямиос сярысь гожъямъёсты эшшо но шумпотыса лыдӟисько. Куке тӥ адямиез рос-прос возьматыны быгатӥськоды, соку ини книга лыдӟем кадь луоно.

Берло дыре веросъёсты но романъёсты печатланы кутскиды. Туж умой со. Милям тани гуртамы библиотекамы ӧвӧл, книга шедьтон сярысь сюлмаськоно. Алигес Роман Валишинлэсь «Инвожо уйшоре но пиштэ» повестьсэ печатлады. Ой, кыӵе та писательлэн кылыз узыр но лэчыт. Озьы ик шумпотто пичи гуртъёс сярысь гожъямъёсты. Соосын тодматскыса, валаны но ӵошатыны быгатӥськод, кызьы, кыӵе калык пӧлын улӥськод.

— Газетэз дыраз уг лыдӟиськы ке, улонам мар ке уг тырмы ни кадь потэ, — шуэ Куреггуртысь нылпи садэн кивалтӥсь Елена Тимофеева но. — Куддыръя газет пятница нуналъёсы уг вуы, сыӵе дыръя ини керӟегъяськыны кутсконо.

— Ми кырӟаны но, вераны но, лыдӟиськыны но вутскиськом, — шуо «Азвесь нюжаос» ансамбле ветлӥсь нылкышноос Татьяна Чернова но Светлана Коровина. — Газет вуэ ке, дырмы вань-а, ӧвӧл-а, соку ик сое лыдӟон борды кутскиськом. Соку пудо утён но, мар но кулэ уг луы ни, лыдӟиськон понна пырак быремын ми. Егит дыръямы, колхозын ужакумы, газет лыдӟыны дырмы ӧй вал, табере, шутэтскыны потыса, котькӧня сое лыдӟыса пук, нокин нокытчы дыртытӥсь но алӥсь ӧвӧл. Ӝытсэ бызьыса сямен клубе репетицие потӥськом. Коллективмылэн кылдэмез дырысен 2 ар гинэ ай ортчемын. Со дыр куспын кытчы гинэ ӧм вуэ ни! Кин малпалоз, милемлы таӵе арлыдын Москваысь Гербере вуылыны кылдоз шуыса. Данъяськыса вераны быгатӥськом:  милям арганчимы шаерысьтымы тодмо крезьгурчи Сергей Соснов луэ. Сергей Анатольевич сярысь но «Тӧр шорын» рубрикаяды гожъяды. Кыӵе шумпотыса ми со сярысь лыдӟимы. Газет бамъёсысь тодмо адямиосты адӟыса, сюлэм шумпотэ, мукетъёссэ но мед гожтозы на кадь потэ.

Любовь Тихонова

Туспуктӥз А. Тронин

Удмурт Дунне
By Удмурт Дунне 21 января, 2016 12:45