Нунал кузь, даур вакчи. Кыӵеен тодэ кылёз 2015-тӥ ар?

Удмурт Дунне
By Удмурт Дунне 14 января, 2016 08:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Котькуд адямилэн улоназ туэ ар куспын воштӥськонъёс ортчизы. Нош куд-ог учыръёс кылёзы калыклэн тодэ ваёнъёсаз.

Дуннеын

Арлэн кутсконысеныз ик Европа ӝоканы ӧдъяз Ближний Востокысь но Уйпал Африкаысь вуись беженецъёслэсь. Соос Евросоюзысь узыр кунъёсы пегӟизы Сириысь ожлэсь, террористъёслэсь, куанер улонлэсь. Ар куспын вуэмын 1 миллионлэсь ятыр мигрант. Европаысь калык соосты кутыны пумит, кунгожъёсазы борддоръёс ӝуто. Озьы дуннелэн картаез воштӥське.

Ар куспын Европае вуэмын 1 миллионлэсь ятыр мигрант.

Евросоюз азьланьтӥз Россилы пумит санкциоссэ. Соос табере кыстӥськозы вуоно арын 6-тӥ августозь. Россия шып уг улы: Евросоюзысь кунъёсын поттэм вузъёслы Россиысь ӝажыосы сюрес пытсамын.

Донбасс но Киев куспын ож чалмиз, ожгар техникаез утялтыны косэмын. Югдурез чакласа возизы ОБСЕ огазеяськонысь наблюдательёс. Калык басьтӥськиз пуштытъям городъёсты, гуртъёсты ӝутон борды.

Сириысь ожлэн выль вакытэз кутскиз. Б. Асад президент вазиськиз Россилы, терроризмлы пумит ожмаськыны юрттэт курыса. Президент В. Путин вазиськиз Федерация Кенешлы, асьме армиез кунгож сьӧрын кутыны мед лэзёз шуыса. Парламентарийёс талы дурбасьтӥзы. 30-тӥ сентябре Россилэн авиациез Сириысь террористъёс вылэ нырысетӥ бомбазэ куштӥз.

Таосыд  бӧрысь вожомизы: пазьгизы Египетысь Санкт-Петербурге лобись самолётэз — быриз 224 адями, Франциын Парижын террактын ыбылэмын-пуштытэмын 128 мурт.

Шараяськиз Турцилэн террористъёсын огкылысь луэмез: турокъёс пазьгизы Су-24 истребительмес. Огез пилот быриз, мукетыз улэп кылиз. Турция, террористъёсын ӵош кариськыса, мувӧй вылын лушкем барыш поттэ. Турциысь ваем вузъёсты кунамы вузаны лэземын ӧвӧл, нош вуоно арысен турцие вуон понна виза лэсьтоно луоз.  Египетэ сюрес туристъёслы пытсамын.

Россиын

Россиын мытэмын Литературалы сӥзем ар. Сое Москваысь А. Чехов нимо театрын усьтонэ пыриськиз Россилэн Президентэз В. Путин.

062261,9 мая,день победы,парад

Быдӟым Вормонлы 70 ар тырмиз.

Быдӟым Вормонлы 70 ар тырмиз. Сое сӥё-дано пусъёнэ пыриськиз быдэс Россия, азьвыл Совето Союзэ пырись кунъёс но. Ортчизы пӧртэм ужрадъёс, оже пыриськемъёсты, ож лудын быремъёсты данъянъёс. Россилэн вань улосъёсаз ортчиз тужгес бадӟымез, яркытэз проект — «Вунонтэм полк». Оже пыриськем ӵыжы-выжыоссылэсь туспуктэмъёссэс кутыса, 12 миллионлэсь ятыр адямиос урамъёстӥ ортчизы.

13-тӥ куарусёнэ Россиысь улосъёсын ортчиз куара сётон нунал. Отчы пыриськизы Крым но Севастополь. 21 улосъёс асьсэлы выль йыр бырйизы. Озьы ик выльдӥськизы интыосысь закон кылдытъян ёзъёс.

Экономикаын кылдэм шуг-секытъёсын сэрен туэ ӝутскиз инфляция, кулэсмизы калыклэн доходъёсыз, манетлэн дуныз лэзькиз, 1 баррель мувӧйлэн дуныз 35 долларозь усиз — Россилэн бюджетаз уксё азьвыл аръёсынлэсь шӧдскымон ӧжыт люкаськиз.

Шуг-секытъёсын нюръяськон вылысь Россиын быдэсъяське кризисысь потонъя план. Калыклэсь мылкыдзэ тодонъя (ВЦИОМ) центр ивортэмъя, нокыӵе шуг-секытъёс шоры учкытэк, Россиын улӥсьёс ӟечезлы оско, 74 процентэз калык дурбасьтэ Владимир Путинлэн политикаезлы.

Страна пумен дыше ни экономикаын кылдэм выль югдурлы. Луонлыкъёс усьтӥсько асьме производствоез азинтыны.

Туэ гужем  ужезлэсь мозмытэмын вал Россилэн футболэн шудонъя сборноезлэн тренерез, итальянец Фабио Капелло. Асьме футболистъёсты оскизы ЦСКА клублэн наставникезлы Леонид Слуцкийлы. Л. Слуцкий кивалтэм улсын командамы нырысьсэ шудӥз Швециысь футболистъёсын но вормиз соосты 1:0 лыдын. Коньывуон толэзе Россиысь футболистъёс вормизы Молдоваысь но Черногориысь туп ӵыжасьёсты. Озьы Россилэн сборноез шедиз  Европалэн чемпионатаз, вуоно арын Францие мыныны дасяське. Нош 2015-тӥ ар понна Леонид Слуцкий устоез тренер луиз.

Удмуртиын

Москваын быдэс ар ӵоже радъяськизы Удмуртилэн нуналъёсыз. Со улсын ортчизы уно пӧртэм ужрадъёс — шоркарысь калык тодматскиз Удмурт шаерен. Элькунысьтымы кивалтӥсьёс огкыл юнматӥзы федерал ёзъёсын, пӧртэм огазеяськонъёсын.

096028,журналист,редакция,Удмурт Дунне

«Удмурт дунне» газетлы тырмиз быдэс даур.

«Удмурт дунне» газетлы тырмиз быдэс даур.

«Удмурт дуннелэсь» 100 арзэ пусъён улсын ортчизы фин-угор журналистъёслэн фестивальзы, лыдӟисьёслэн фестивальзы но дасо мында мукет ужрадъёс.

Удмуртилэн парламентэзлы тырмиз 20 ар.

«Айкай» театр пусйиз 25 ар тырмонзэ. «Айкай» мыло-кыдо пыриськиз туэ Удмуртилэсь арзэ Москваын ортчытонэ.

Быдӟым композиторлэн П. Чайковскийлэн вордскемез дырысен 175 ар тырмиз. Солы сӥзем бадӟым фестиваль ортчиз Воткаысь музей-усадьбаын. Удмуртие вуылӥзы тодмо артистъёс, композиторъёс, дирижёръёс, балеринаос. Выльдэмын Воткаысь П. Чайковскийлэн музей-юртэз но та городысь мукет объектъёс, Ижысь Операя но балетъя театр.  «Стейнвей» рояльёс вуттэмын Удмурт филармоние, Операя но балетъя театре, Воткаысь музей-усадьбае. Операя но балетъя театрлы кузьмам роялен нырысь ик шудӥз тодмо пианист Денис Мацуев. П. Чайковскийлэн юбилеезлы сӥзем ужрадъёс кыстӥськизы ар ӵоже.

Ар куспын воштӥськонъёс ортчизы кивалтонын. Гурт удысъя но сиён-юонъя министре юнматэмын Шаркан ёрослэн азьвыл йырыз Александр Прохоров, Дышетонэз азинтонъя институтлэн кивалтӥсез луиз Удмурт кун университетысь журналистикая факультетлэн азьвыл деканэз Владимир Байметов.

Огъя куара сётон нуналэ, 13-тӥ куарусёнэ, выльдӥськизы элькунысьтымы вань город Думаос. Иж городлэн йырыз луиз «Ижсталь» заводын энергетикын ужам Юрий Тюрин.

Ар ӧз ортчы ыштонъёстэк но. Улонысь кошкизы Кун Кенешысь депутат, «Титан» огазеяськонлэн ки-валтӥсез Павел Титов, Писательёслэн огазеяськонзылэн кивал-тӥсез Егор Загребин, Удмуртиысь дано журналист Владимир Алашеев, Иж но Удмурт епархиен кивалтӥсь Николай митрополит, нылпи кылбурчи Иосиф Иванов, «Советской Удмуртия» газетын кема аръёс ӵоже тыршем ожысь ветеран Николай Тебетеев, литературовед но критик Фома Ермаков.

 Дасяз Елена Никитина

Туспуктэмъёс басьтэмын вотэсысь но А. Горбуновлэсь

Удмурт Дунне
By Удмурт Дунне 14 января, 2016 08:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<