А. Воронцов: Удмуртиын потӥсь газет-журналъёсын, книгаосын вуз карон инты луоз

Удмурт Дунне
By Удмурт Дунне Январь 15, 2016 11:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
voronzov

А. Воронцов: Удмуртиын потӥсь газет-журналъёсын, книгаосын вуз карон инты луоз.

13-тӥ январе 25 ар тырме Россиысь печатьлэн выль вапумезлы. Солэн историез люконтэм герӟаськемын кунмылэн сюресэныз.

Йыгасько котькуд корка

1703-тӥ арын 13-тӥ январе потӥз Россиысь «Ведомости» газетлэн нырысетӥ номерез.  Пётр I эксэйлэн указэзъя ӵапак та нуналэ Россия империын пусйылӥзы Печатьлэсь нуналзэ. Совето вакытъёсы тае тупатылӥзы май толэзьлы — «Правда» газетлэн нырысетӥ номерез потон вакытлы. Но 1991-тӥ арысен иворчиослэн удыс праздниксы выльысь пусйиськыны кутскиз январе.

Удмуртиын ивор вӧл-мытонъя 316 ёзъёс пусъемын, со пӧлын 135 газет но 54 журнал. Удмурт кылын потӥсьёсыз — 16: «Удмурт дунне», «Ӟечбур!», «Иднакар», «Кенеш», «Инвожо», «Кизили», «Вордскем кыл», районын печатласькись 9 газетъёслэн удмурт приложениоссы. Элькунысьтымы ог 1 сюрс 500 мурт ужа котькуд корка ивор вуттон бордын.

— Удмуртилэн Тӧроез А. Соловьёв та удысэз азинтонлы бадӟым саклык висъя, — вераз элькунысьтымы Печатья но ивор вӧлмытонъя агентстволэн кивалтӥсез Алексей Воронцов. — Оскисько, одӥг газет-журнал, радио, телеканал но уз пытсаськы. Со сяна, кылем арын 1-тӥ январьысен ужаны кутскиз иворъёсъя «Удмуртия» улосвыл агентство. Толэзь ӵоже со 1 сюрс 300 пала иворъёс, ог 50 статьяос вӧлмытӥз ни. Соосты учкыны-лыдӟыны Интернетэ нуналлы быдэ ог 600 мурт пыра.

Эшшо кылем арысен «Мынам Удмуртие» телерадиокомпанилэсь передачаоссэ кабель каналын 24 час ӵоже  возьматыны кутскизы. Соосты учкыны быгато ни 178 гуртъёсын улӥсьёс. Туэ таӵеослэн лыдзы эшшо йылоз.

— 2016-тӥ ар Россиысь кинолэн ареныз ялэмын бере, «Мынам Удмуртие» телеканалын ужасьёс басьтӥськизы ни документальной, чеберлыко фильмъёс, мультфильмъёс дасян борды, — ватсаз Алексей Воронцов. — Соос  «Удмуртилэн зарни коллекциез» программа поттыны кутскозы.

Ӝажыос буш уз луэ

Журналистъёс вазенгес ик куризы вал: Ижын усьтоно Печатья юрт. Табере та малпан улонэ пыӵалоз. Интыяськоз со… азьвыл интыяз ик: Пастухов урамысь 13 номеро юртэ. 1970-тӥ аръёсы ӵапак та юртын печатласькизы вань газет-журналъёс. Али отын ужало «Луч», «Кизили», «Инвожо» журналъёс. Татын ик табере интыяськемын элькунысьтымы Журналистъёслэн огазеяськонзы, Печатья но ивор вӧлмытонъя агентство.

— Юртлэн нырысетӥ этажаз ӝоген усьтӥськоз газет-журналъёсын, книгаосын вуз карон инты, — пусйиз Печатья но ивор вӧлмытонъя агентстволэн кивалтӥсез. — Пӧртэм изданиосын вуз каронъя бадӟым огазеяськонъёс рынокысь кошкем бере книгаосты вӧлмытон одӥгез шугъяськытӥсь ужпум луиз. Соин ик 2016-тӥ арысен та уж борды выльысь гижысь-пиньысь басьтӥськом.

Алексей Воронцов верамъя ик, вузано кадь книгаосыз  «Удмуртия» издательстволэн али ӧжыт ӧвӧл. Удмуртилэн Тӧроез А. Соловьёв кичӧлтэм улсын книга поттонлы кылем арын элькун бюджетысь 5 миллион манет висъяськиз, солэсь азьло аръёсы 3 миллион манет гинэ вал. Талы луыса издательство кылем арын 70 пала выль книгаос дасяз, солэсь азьвыл арен ӵошатыса, со 3 поллы тросгес. Озьы 2015-тӥ арын удмурт кылын книгаос 37 пумо луизы, 2014-тӥын 21 пӧртэм гинэ вал. Азинтӥське анай кылъя учебникъёсты выль стандартъёсъя дасян но. Кылем арын 6 пумо выльдэм дышетон пособиос потӥзы.

Элина Кумачёва

Удмурт Дунне
By Удмурт Дунне Январь 15, 2016 11:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<