Маин сьӧлыко «Удмурт кыл»? Кивалтӥсьёс асьсэ янгышсэс куштӥзы дышетӥсьёс вылэ

Удмурт Дунне
By Удмурт Дунне Январь 15, 2016 09:27
С. Панов.

С. Панов.

Туэ огпол гинэ ӧм гожъялэ ни шаерысьтымы куд-ог школаосын удмурт кылъя дышетӥсьёслэн «сьӧлыкъёссы» сярысь — прокуроръёс эскерем бере шараямын  законэз тӥян учыръёс:  программаосты анай кылын гинэ гожъян но  тупасьтэм учебникъёсты уже кутон. Удмурт кылъя дышетӥсьёс  тае ултӥянэн лыдъяло. Нош мар малпа та пумысен элькунмылэн прокурорез Сергей Панов?

— Бен, туэ февраль но август толэзьёсы Россиысь Генеральной прокуратура косэмъя Удмурт Элькунысь Прокуратура эскериз «Россия Федерациысь дышетон сярысь» но «Россия Федерациысь кун кыл сярысь» законъёслэсь быдэсъяськемзэс.

Со сяна, Россилэн Президентэз косэмъя туэ ар кутсконын Дышетон но наука удысын эскеронъёсъя федерал служба (мукет сямен Рособрнадзор) эскеронъёс ортчытӥз.

— Кыӵе янгышъёс шараямын вал?

— Эскеронъёс возьматӥзы,  шаерысьтымы школаосын  анай кылъя учебникъёс вань, но соос ортчемын ӧвӧл научной, педагогической, общественной, культурной но улосвыл экспертизаез, соин ик уг пыро федерал перечене. Нош кун аккредитациез ортчем дышетон программаосъя федерал перечене пырымтэ учебникъёсын ужаны уг яра.

Пусйыны кулэ, «Россия Федерациын дышетон сярысь» (N273-ФЗ) федерал законэз тӥян учыръёс шаерамы «Удмурт кыл» но «Удмурт литература» предметъёсъя гинэ шараямын ӧвӧл, сыӵе ик учыр пор но фин кылъёсъя предметъёсын.

Президент В. Путин поручение гожтӥз (Пр-1310) 2016-тӥ арын 1-тӥ мартозь анай кылъя учебникъёсты федерал перечене пыртон пумысен.

— Кин та понна кыл кутыны кулэ?

— Пиналъёслэсь  анай кылынызы дышетскон правозэс быдэсъян, школаослы учебник висъян, солы тырмыт коньдон шедьтон ужен вырыны кулэ Удмурт Республикаысь Дышетонъя но наукая министерство.

Мукет ласянь, сюлмаськыны кулэ асьсэос школаос но — соос кыл куто дышетон литератураез быръемзы понна.

Мон тодӥсько, Рособрнадзор асьме министерстволы предписание гожтӥз. Та югдурез тодэ элькунысьтымы Правительство но — туэ 13-тӥ мае  ми отчы ивор келям.

Али, мыным ивортэмзыя, та югдурез тупатонъя уж нуиське. Но «Удмурт кыл» но «Удмурт литература» предметъёсъя учебникъёслы экспертиза та дырозь ортчытымтэ на.

Таӵе югдур, нялтас вераса, Удмуртиын гинэ ӧвӧл, тросаз улосъёсын. Та дырлы федерал перечене пыремын бигер, фин, хакас но якут кылъёсъя учебникъёс гинэ.

Россилэн Президентэз бордын ужась Калык кусыпъёсъя но Россия Федерациысь Дышетонъя но наукая министерство бордысь Ӟуч кылъя советъёс валче кенешем бере, туэ 4-тӥ июле, Президент В. Путин поручение гожтӥз (Пр-1310) 2016-тӥ арын 1-тӥ мартозь анай кылъя учебникъёсты федерал перечене пыртон пумысен.

— Но приказ борды коньдон кулэ. Таӵе вакытэ со секыт ужпум…

— Та учырез тупатонлы кулэ ватсаса 34 миллион манет, туэ 27-тӥ августэ Удмурт Элькунысь Правительствое ми гожтэт ыстӥм, 2016-тӥ арлэн бюджетаз та расходъёсты пыртыны курыса. Тодмо, Кун Кенешлэн берло сессияз решение кутэмын 3 миллион манет висъян сярысь. Коньдон ноку уг тырмы, но косэмын бере — малпаськоно. Со понна ик кивалтӥсьёс — мед шедьтозы луонлык. Вазь-а, бер-а, но ужпумез сэрттоно-пертчоно луоз.

Шаерысьтымы школаосын озьы ик шараямын документациез нуонъя куронъёсты тӥян.

— Дышетӥсьёс асьсэлэсь ужзэс, анай кылмес ултӥянэн лыдъяло удмурт кылъя программаоссэс ӟуч кылэ берыктыны косэмез.

— Бен, шаерысьтымы школаосын озьы ик шараямын документациез нуонъя куронъёсты тӥян.

Кылсярысь, 2015-тӥ арын март толэзе Шаркан ёросысь дышетон учреждениосын эскерон ортчытэм бере шараяськиз: 11 школаын удмурт кылъя но литературая дышетон программаос лэсьтэмын удмурт кылын гинэ. Нош федерал закон куре соосты ӟуч кылын но гожтыны, угось дышетскисьёс, анай-атайёс но удмурт кылэз тодӥсьтэмъёс сотэк уг быгато та программаосын тодматскыны. Та учыр сярысь ми озьы ик ивортӥм  Удмурт Элькунысь Правительствое. Озьы ке но интыосын (ёросъёсысь дышетонъя управлениосын) кулэ ужрадъёс кутымтэ, рос-прос валэктон уж ортчытымтэ. Озьы туэ августэ сыӵе ик янгышъёс, шонергес ке — законэз тӥян учыръёс, шараямын Дэри, Сарапул, Ува но Якшур-Бӧдья ёросъёсысь 16 школаын.

— Но кӧня дышетӥсьёсын вераським ини, шуо, трос аръёс ӵоже ужатозязы, одӥг пол но нокин но ӧвӧл тунсыкъяськем на дышетон программаосынызы, вылаз ик, малы со кулэ  ӟучъёслы?

— Валэктӥсько: «Россия  Федерациысь кун кыл сярысь» федеральной законъя (N53-ФЗ, юнматэмын 01.05.2005) кун кыл (ӟуч кыл) одно кутӥськыны кулэ вань огазеяськонъёслэн ужазы, озьы ик  делопроизводствоын но (ст.1, п.1 ч.1 ст.3, ст.5). Тунсыкъяськон учыръёс но луыны быгатозы, кылсярысь, городын улӥсьёс пӧлын (асьсэос кылэз уг валало, но потэ, нылпизы мед дышетоз шуыса). Со сяна, «Россия Федерациысь дышетон сярысь» федеральной законъя (N273-ФЗ, юнматэмын 29.12.2012) «Удмурт кыл» но «Удмурт литература» предметъёс образовательной программалэн оглюкетэз луо (п.9 ст.2 ст.12, 14), соин ик соос быдэстэмын луыны кулэ вань куронъёсъя: удмурт но ӟуч кылъёсын. Со гинэ ӧвӧл, образовательной программаос  пуктэмын луыны кулэ Интернетэ — школалэн официальной сайтаз, соин адямиос тодматскыны мед быгатозы шуыса.

Ваньзэ-ӧвӧлзэ  прокуроръёс 18 предписание гожтӥзы. Соос эскеремын но быдэстэмын.

— Но вань та куронъёс анай кылэз, азинтэм интые, куашкатыны быгатозы…

— Озьы шуыны нокызьы уг луы, удмурт кылъя урокъёс нуиськыны кулэ, но законэз чакласа. Бен, ужез ӧжыт ватсаське, но сыӵе куронъёс.

— Кин янгыш, валамон. Но малы дисциплинарной взыскание сётэмын дышетӥсьёслы?

— Таиныз мон соглаш, малы ке шуоно ужасьёсызлэсь урод яке янгыш ужамзы понна кылзэс юаны, Ужъя кодексэз чакласа, быгатэ кивалтӥсь (работодатель) гинэ. Та учыре сыӵе полномочиосыз вань школалэн директорезлэн гинэ, озьыен, со чакла, кызьы визьнодано дышетӥсез: ӝотрак карыса-а, валэктыса-а.

Зинаида Рябинина

Удмурт Дунне
By Удмурт Дунне Январь 15, 2016 09:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<