Кыӵе ужпумъёс ас азяз пуктэ нылпиослэн «Шундысиос» огазеяськонзы

Удмурт Дунне
By Удмурт Дунне Январь 28, 2016 08:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арын кылдӥз нылпиослэн «Шундысиос» огазеяськонзы. Кыӵе ужпумъёсты со азяз пуктэ?

Ужез мытон

Удмурт пиналъёсты огазеян сярысь «Шунды» огазеяськонысь азьветлӥсьёс кемалась малпасько вал ни. Угось егитъёс понна «Вамыш» лагерь, «Вуюись» семинар радъясько ке, нылпиос удмуртлыклэн улоназ ӧжыт кыскемын. Куд-огъёсыз арлы огпол вуо «Шундыкар» я «Тулкым» лагерьёсы, но удмуртлыкен герӟаськем мукет проектъёсы  ар ӵоже пыриськыны луонлыкъёс соос понна ӧй вал — пиналъёслэн мылкыдзы вуоно «Шундыкарозь» пуксьыса вуэ. Та ужпум зол сюлмаськытыны кутскиз «Шунды» огазеяськонлэн ужаз пыриськись Наталья Казаковаез. Али ужез но солэн нылпиосын герӟаськемын — нылмурт Дэри школаын дышетӥсь луэ.

Удмурт нылпиос понна «Шундысиос» огазеяськон кылдытон сярысь малпан нырысьсэ шараямын вал 2014-тӥ арын Мордовиысь Саранскын. Соку  «Россия-Финляндия» огазеяськон некоммерческой огазеяськонъёс понна семинар  ортчытӥз. Отысен ик Дэри школаысь дышетӥсь Наталья Казакова 8-17 аресъем удмурт пиналъёс понна проект гожтыны кутскиз.

казакова

Н. Казакова «Вуюись» семинарын «Шундысиос» огазеяськон сярысь вера.

— Россиысь фин-угор нылпиос понна нимысьтыз огазеяськонъёс ӧвӧл, — вера Наталья Казакова. — Тае лыдэ басьтыса, милям малпанамы вал, оло, вань фин-угор нылпиос понна «Финноугорика» движение кылдытыны. Но, ужпумез котыр ласянь учкыса, валамы: со бордын ужаны секытгес луоз. Соин ик малпамы нырысь Удмуртиын «Шундысиос» огазеяськонэз пыд йылаз пуктыны.

Наталья Казакова адӟем кариз быдэс Россиысь нылпиосты огазеясь «Юностьлэн» ужамезлэсь. Озьы ик Мордовиын ортчем семинарын сое паймытӥз Киров улосвылысь «Юкона» огазеяськон. Одӥг школаысен кутскыса, огазеяськонэз кылдытӥсьёс быгатӥзы быдэс Киров улосвылысь егитъёсты ужазы кыскыны.

«Шонтӥм!»

Кылем арын шуркынмонэ ортчиз  «Шонтӥм!» слёт. Со люказ Дэри, Кез, Пичи Пурга, Кизнер, Алнаш ёросъёсысь нылпиосты. Отын ик огазеяськон азьын туэ арлы быдэстоно ужпумъёс пуктэмын. Нырысь ик, «Шундысиос» борды тросгес пиналъёсты кысконо. Со сярысь тросгес школаосысь пиналъёс мед тодозы шуыса, «ВКонтакте» бамын али кылдытэмын движенилэн огинэз. Отысь котьку тодыны луэ выль ужрадъёс сярысь. Огазеяськонэ пыремды потэ ке, школаысьтыды кӧня ке кузя люкаськыса, ивортэ Наталья Казаковалы, kookazuburra@mail.ru адресъя гожтыса. Дышетӥсьёс но пиналъёслы юрттыны быгатысалзы асьсэлэсь малпанъёссэс улонэ пыӵатыны.  Мылысь-кыдысь ужа ини Кез ёросысь Александрово школаысь Светлана Белослудцева, нылпиосты со бурдъяз огазеяськонлэн туспуктэмъёсын вожвылъяськоназ пыриськыны. Дэри ёросысь Выль Казмас школаысь Лариса Замараева нылпиос понна лэсьтӥз Выль ар ӝыт. Со ортчиз удмурт кылын. Пичи Пурга ёросысь 1 номеро школаын Нина Верещагина быдэс ёросысь пиналъёсты слётэ люказ. Дышетӥсьёслэсь ужамзэс баллъёсын дунъялозы,  ар пумын со баллъёс понна сётъяськозы «Шундысиос» движенилэн пусэныз пӧртэм арбериос. Тужгес устоосыз пиналъёс быгатозы мукет школаосы вуылыны.

нылпиос

Дэри ёросысь Ягул черкогуртысь пиналъёс.

Фин-угор егитъёслэн берпуметӥ слётазы (ФУРОР-ын) та нылпи движениен тодматскон ортчиз. Егитъёслэн мылкыдзы пуромиз: «Та удмуртъёс котьку азьпалан! Соослэсь адӟем кароно».

Азинскон

Та дыр куспын ӧжыт лэсьтэмын ӧвӧл ни: туспуктылэмъёсын конкурс, удмурт нылпиос понна Выль ар ӝытъёс, кырӟасьёс куспын «Шундыкуара» вожвылъяськон но мукет ужрадъёс.

Тулыспалэ «Шундысиос» движение пыриськись школаос ортчытозы анай кыллы сӥзем ужрадъёс. Со сяна, вань малпан «Берыктон луд» клубен валче удмурт кылэ берыктыны «Маша и медведь» мультфильмез.

Оштолэзь луоз ӟеч уж лэсьтӥсьёслэн, тимуровецъёслэн толэзьзы.

Пӧсьтолэзе Дэри ёросын ортчоз «Шудкар» лагерь. Отчы сюрыны кылдоз вань ёросъёсысь 25 пиналъёслы. 5 нунал куспын соос дышетскозы асьсэ малпанъёссэс проект вылэ гожтыны но соосты улонэ пыӵатыны.

Озьы ик паськытатыны малпамын Дэри ёросын ортчылӥсь «Шундыберган» ужрадэз, туэ чакламын сое мукет ёросъёсын но радъяны. Пайдаез угось бадӟым:  нылпиос научной ужъёссэс лыдӟо, шаертодонъя но удмурт литературая выль тодон-валанъёс басьто, КВН выллем шудонъёсын визьзэс сынало.

Мария Векшина

Удмурт Дунне
By Удмурт Дунне Январь 28, 2016 08:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<