Йыбырттом: улонысь кошкиз тодосчи Надежда Кралина

Удмурт Дунне
By Удмурт Дунне Январь 26, 2016 10:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Кралина

Н. Кралина.

25-тӥ толшоре 92 аресказ сюлэмыз жугиськемысь дугдӥз тодосчилэн Надежда Кралиналэн.

— СССР-ысь Писательёслэн союзазы пыремъёс пӧлысь Удмуртиын ми Фома Ермаковен тужгес бадӟымъёсыз луиськом, — шуылоз вал со. — Мон 1959-тӥ арын отчы кутэмын, со — 1958-тӥ арын.

Жаляса верано, та мӧйы эшъёсмы, ог-огзэс уйыса кадь, улонысь но кошкизы…

Саратов палась Вольск городысь нылаш война кутскемен валче асьме шаере вуиз, Удмурт пединститутэ дышетскыны пыриз. Солы пӧсез-кезьытэз чиданы кылдӥз Ижевск-Балезино чугун сюресэз лэсьтонын, ас адӟемзэ берло книгаосаз гожъяз, берпуметӥез «Дорога, ставшая судьбой» нимын 2003-тӥ арын потӥз. УдНИИ-ын ужакуз, фольклорез эскеременыз, экспедициосы потаменыз егит тодосчи калыкмылы матэ луиз, удмурт кыллы дышиз. Соин ик, асьме писательёсты ӟуч кылэ берыктон бордын тыршыкуз, подстрочникъёстэк ужаз (та быгатонэзлы ачиз но шумпотэ вал), озьы трос удмурт авторъёсыз ӟуч лыдӟись доры вуттӥз.

Фольклорист, литературовед, критик, публицист, переводчик Надежда Кралина пӧртэм вылӥ наградаосын пусъемын. «Мифы, легенды и сказки удмуртского народа» книгаез  понна УАССР-лэн Кун премиеныз данъямын. Нимыз, ужъёсыз Москваын но тодмо, котькытын ик со калыкмылэсь данзэ ӝутон понна тыршиз, ассэ удмурт калыклэн нылыз кадь шӧдылӥз. Котькудӥз ик Н. Кралинаез тодӥсь мурт шуоз: кыл вылаз юн сылыны быгатэ вал, ваче вожвылъяськонын зэмлыкез утьыны сюлмаськиз. Солэн лэчыт кылызлэсь кӧбераллязы но…

Надежда Петровна газет-журналъёсын, театрен но эшъяськиз бере, соин ӵем пумиськыны кылдылӥз. Туж шумпотыса пумиталляз. Озьы кылбурен выремзэ но шараяз. Та ласянь со кузпалызлэсь, Ӟуч театрысь артистлэсь Валентин Рябовлэсь, адӟем карылӥз кадь, со уго усто кылбуръёс гожъяз. Соос ӵошен кык ныл будэтӥзы.

10-15 ар Надежда Петровна нокытчы потатэк улӥз ни. Бератаз синъёсыз адӟемысь копак дугдӥзы. Дораз пыриськод ке, архиве дасям бумагаоссэ радъяны курылӥз…

Надежда Кралина вань улонзэ сӥзиз удмурт калыклы, культуралы, литературалы, наукалы. Яратоно ужезлы тазалыксэ ӧз жаля. Со понна асьмеос солы йыбырттыны кулэ.

Татьяна Чернова

Удмурт Дунне
By Удмурт Дунне Январь 26, 2016 10:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<