Гурт шорын ӝуатскиз кыз

Удмурт Дунне
By Удмурт Дунне 14 января, 2016 11:18
IMG_5792

Ужрадэ пыриськизы сьӧрлось школаосын дышетскись нылпиос но.

Пичи Пурга ёросысь Куреггуртын Выль ар кыз ӝуатскиз 1-тӥ толсуре. Ужрадэ пыриськизы сьӧрлось школаосын дышетскись нылпиос но.

Гуртэ пырон ульча быдэсак калыкен тырмемын. Огырчи шур дурын, тол куазьлы ӧч карыса сямен, тачыр гинэ гур эстӥське. Куреггуртысь «Азвесь нюжаос» ансамбльын кырӟась нылкышноос куноосты пӧсь табанен, чаен утялто. Нылпиос люр-ляр потто. Собере шӧдтэк шорысь, пӧртэм буёлъёсын ворекъяса, машина вуиз. Отысь Тол бабай но Лымы ныл потӥзы. Соос нылпиосын ӵош эктӥзы, кырӟазы, визьзэс сыназы но пӧсь табань сиизы. Собере ваньзы, выж вамен потыса, ӝужыт-ӝужыт кызэз ӝуатыны вамыштӥзы.

— Ми арлы быдэ Выль ар азьын кыз чеберъяськом, — вера Куреггуртысь староста Олег Дыгаев. — Та дырозь кыз ӝуатонмес асьме коже гинэ ортчытъяськомы вал. Нош туэ дорамы куное ӧтьыны малпамы Гожня но Баграш-Бигра школаосысь нылпиосты.

— Кызмы уен-нуналэн ӝуа-лоз, гурт калыклы капчи мылкыд но шумпотон сётыса, улоз. Выль ар уе гуртоос со доры, пӧртэм дӥськутъёсын дӥсяськыса, шулдыръяськыны потозы. Ма, сое ми озьы гинэ ум кысэ ай, Вуж Выль арозь ӝуатыса возём на, — шуэ муниципал кылдытэтэн кивалтӥсь Владимир Ложкин.

Любовь Тихонова

Туспуктӥз А. Тронин

Удмурт Дунне
By Удмурт Дунне 14 января, 2016 11:18