Фин-угор егитъёс ог-огзылы открыткаос лэзьяло

Удмурт Дунне
By Удмурт Дунне 19 января, 2016 08:22

1Таӵе малпан вордӥськиз кылем арын Комиын ортчем фин-угор егитъёслэн слётсы (ФУРОР) дыръя.

Комиын вазенгес поттыны кутскизы коми кылын открыткаос. Удмуртъёслэн но сыӵе открыткаоссы вань, соосты лэсьтэ «Монами» студия. Тае лыдэ басьтыса, фин-угор егитъёслэн малпанзы кылдӥз: Выль арен но мукет праздникъёсын ӟечкыласа, ог-огмылы открыткаос лэзьяны луэ. Тае улонэ пыӵатон борды кутскиз Лукерья Шихова.

— Кунгож сьӧрысь егитъёс дышето удмурт, коми, саам, карел, коми-пермяк, пор кылъёсты, но ваньзылэн ик соосты улонын кутыны луонлыксы ӧвӧл, — вера Лукерья Шихова. — Нош открытка келяса, адямилэсь мылкыдзэ ӝутӥськод, дышетэм кылдэ волятӥськод яке анай кылдэ кутӥськод. Озьы ачид но басьтэм открыткаысь мукет фин-угор кылъёсысь «чырткем», «ӟеч лу», «тау» выллем кылъёсты дышетӥськод, аслад анай кылыныд но мукетъёссэ тодматӥськод. Со сяна, та проект фин-угор калыкъёслэсь кусыпъёссэс тупатыны юрттэ.

Открытка лэзьыны котькинлы луэ. Тросэз егитъёс асьсэ адресъёссэс ог-огзылы кельтӥзы ФУРОР дыръя ик. Али нош Лукерья Шихова кылдытэ адресъёсын огъя база. Отысь шедьтыны луэ ни пӧртэм фин-угор улосвылъёсын но кунъёсын улӥсь егитъёслэсь адрессъёссэс. Проект борды али итӥськемын 130 пала егитъёс. Ӝынынез соос пӧлысь — удмуртъёс но комиос. Жаляса верано, палэнэ кылё саамъёс но ненецъёс.

Дуннеын открыткаос лэзьянъя сям-йылол выль сямен вордӥськиз 2005-тӥ арын. Кылдытэмын сайт, кытысь луэ шедьтыны адямиослэсь адресъёссэс. Кылем арын лэземын 30 миллионлэсь ятыр открытка.

Мария Векшина

Туспуктӥз П. Александров

Удмурт Дунне
By Удмурт Дунне 19 января, 2016 08:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<