«Арлэн кырӟанэз» ӵошатсконын вормиз Андрей Корнилов

Удмурт Дунне
By Удмурт Дунне 14 января, 2016 08:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

1 сюрс 350 куара люкаса, нырысетӥ интые потӥз Пичи Пурга ёросысь Бобья-Уча гуртын вордӥськем Андрей Корнилов.

Йылаз-пумаз вуиз «Арлэн кырӟанэз-2015» вожвылъяськон. Сое радъязы «Мынам Удмуртие» телерадиокомпаниысь «Светӥ дорын куноын» передачаез нуись Светланаос — Кибардина, Пикулева но Белых.

Вормисьёслэн концертсы ортчиз Ижысь «Аксион» культура юртын. Учкисьёс зал трос люкаськизы. Котькуд кырӟан бӧрсьы кужмо кичабонъёс чузъясько. Синъёс лӧпто, сцена вылысь кильтро дӥсяськем нуисьёсты адӟыса.

— «Арлэн кырӟанэз» проектлэн авторез луэ шаерысьтымы тодмо артист Геннадий Корепанов, — вера Светлана Пикулева. — Кылдӥз со 2000-тӥ арын. Проектлэн валтӥсь малпанэз — элькунысьтымы кырӟаны-вераны быгатӥсь усточиослы усьтӥськыны юрттон. Конкурслэн идеяез милемлы туж кельшиз. 2011-тӥ арын ми, «Мынам Удмуртие» радиоын ужасьёс, итӥськимы Геннадий Корепанов борды. Озьы радио кылзӥсьёс быгатӥзы кельшымон кырӟанъёссы понна куаразэс сётыны. Шумпотӥськомы: та вожвылъяськон калыклэн сюлэмаз зол биниськиз. Конкурсэ пыриськыны мылкыд карисьёс но арысь аре тросгес но тросгес люкасько.

Кинлы туэ вормыны шуд усиз?

1 сюрс 350 куара люкаса, нырысетӥ интые потӥз Пичи Пурга ёросысь Бобья-Уча гуртын вордӥськем Андрей Корнилов. Удмурт эстрадае та воргорон шундыё куазен гудыртэм кадь шуак-дуак пыриз. «Мынам Удмуртиелэн» кыказ но конкурсаз — «Элькуновидение», «Арлэн кырӟанэз» — вормисе потӥз. «Ижводоканалын» слесарь луыса ужась пиосмурт учкисьёслы-кылзӥсьёслы маиныз сокем кельшиз?

— Зэмзэ вераса, крезьгур дуннеен мон кемалась герӟаськемын, — вера А. Корнилов. —  Йылпумъяй Ижысь культурая колледжысь баянъя классэз. Но арганэз, гитаралэсь сиоссэ кысканы ас поннам дышетски вал. Кызьы сцена вылэ вуи? Али семьяеным улӥськомы Татарстанысь Агрыз городын. Со Пичи Пурга черкогуртлэсь кыдёкын ик ӧвӧл. Выны ӵектӥз «Зарни шеп» ансамбле кырӟаны-эктыны ветлыны. «Зарни шепысен» ик тодматски егит артистэн Иван Котельниковен. Огез концерт бӧрсьы со мыным вазиськиз: тонэ, пе, Андрей, огнадэ кырӟатоно вал. Со дырлы «Витисько лыктэмдэ» кырӟанэ дась вал ини. Озьы огнам я Котельниковен сцена вылэ потаны кутски.

Та бӧрсьы пиосмуртлэн улонэз вуберганлы укшаны ӧдъяз. Туннэ — концерт, ӵуказе — концерт, ӵуказе улыса — нош концерт. Чорыганзэ но пӧйшуранзэ вунэтоно луиз. Угось дыр висъяно на нылпиосызлы но. Таня кузпалыныз Данил пизэс но София нылзэс будэто.

— «Арлэн кырӟанэз» ӵошатсконын вормисе пото шуыса, ӧй малпалля, — шуэ кырӟась. — Но шӧдӥсько вал: берпуметӥ интые уг кыльы. «Витисько лыктэмдэ» кырӟанлэсь гурзэ пушкам 2 ар пала нуллӥ. Чуръёссэ шедьтӥ «Кенеш» журналысь. «Зарни шеплэн» азьвыл кивалтӥсез Феодосия Тубылова ансамбле ветлӥсьёслы трос журналъёс ваем. Огез «Кенеш» мынам но киям шедиз. Галина Самсоновалэсь «Витисько лыктэмдэ» чуръёссэ кельшытӥ. Усто кырӟан пӧрмоз шуыса, сюлэмы шӧдэм, лэся. Нош «Льӧмпу сяська» ӝыт куспын пӧрмиз. Та кырӟанэн пыриськи «Элькуновидение» конкурсэ. Ярам, Интернет вань: Галина Самсоновалэн нунокез та кылбурез мыным ыстӥз.

Семьяязы Корнилов гинэ уг кырӟа. Софиязы но крезьгур борды кыстӥське. 3 аресъем дыды дӥсьтэ ини пурга учкисьёс азьын но ассэ возьматыны. Алёна Тимерхановалэсь но Иван Котельниковлэсь кырӟанъёссэс резь! быдэсъя. Корниловлэн атаез Бобья-Уча гуртысь воргоронъёслэн хоразы кырӟалля. Анаез нылкышноослэн «Вубуртчин» ансамблязы ветлӥз. Андрей но культура юртлэн ужаз пыриськылэ. Кылем арын отысь «Тыпыр-тапыр» КВН командазы ёросысь устоез луиз.

* * *

Кыкетӥ инты но кошкиз Пурга палъёсы. «Арлэн кырӟанэз» конкурсын 1 сюрс котыр куара люказ «Зарни шеп» ансамбльлэн кивалтӥсез, егит кырӟась Алёна Тимерханова «Мемие» кырӟанэн. Гурзэ но кылъёссэ гожтӥз Пичи Пурга ёросысь Вуж Мӧнья гуртысь Татьяна Леонтьева. Туннэ Татьяна Владимировна крезьгурен но эшъяське, ужбергатон удыссэ но валтэ.

— Та кырӟанэ кылдӥз 1998-тӥ арын февраль толэзе, — вера Татьяна Леонтьева. —  Ай соку нылпи садын ужасько вал. Гожтӥ сое, 8-тӥ Мартлы, анаелы сӥзьыса. Пианино сьӧрын мемиослы сӥзем ужрадын кырӟай. Собере родительской собраниосын но, мукет ужрадъёсын но трос пол быдэсъялляй на. Жаляса верано, анае та кырӟанме огпол сяна кылзыса ӧз вутты — 8 ар талэсь азьло улонысь кошкиз. Кызьы «Мемие» калыке потӥз? Гуртысь эшеным Фая Ивановаен ӝытлы быдэ кырӟаськомы вал — я арганэн, я гитараен. Малпамы та гурез «Электроникъёс» дорын гожтыны. Диджейёс ӟеч аранжировка дасязы. Вӧзаз Иван Котельников арганэн шудыса лэзиз на. Ӵапак соку кырӟанме Алёна Тимерханова кельшытэм. Куриз сое. Малпай: мон сое сцена вылын ялан кырӟаса уг улы, мед Алёна быдэсъялоз.

Туннэ Т. Леонтьевалэн шыкысаз эшшо 10-15 кырӟанэз вань на. Соос витё ас вакытсэс. Яке кырӟасьсэс — Татьяна Владимировналэн 6-тӥ классэ ветлӥсь Света нылызлэн но куараез жингрес. Кырӟан гожтон паласькись вылэм. Леонтьевалэсь адӟем карыса, Фая эшез но гуръёс кылдытъян борды басьтӥськем.

* * *

Быдэн ог 800 куара люказы но куинетӥ луизы Кияса ёросысь «Ерпечкаос» но Шаркан ёросысь «Тулкым» ансамбльёс. Огез «Тулыс ӝыт», мукетыз «Тулкымъя» кырӟанъёсты быдэстӥзы. Кылем арын «Арлэн кырӟанэз» вожвылъяськонын «ерпечкаос» нырысетӥ интые потӥзы вал. Пӧлысьтызы огез — Юрий Камашев — мылкыдзэ усьтэ:

— Таяз радэ нырысетӥ луыны милемлы ӧз кылды. Озьы ке но кӧтмы ӝож ӧвӧл. Вуоно арын эшшо но золгес тыршомы. Калыклэсь мылкыдзэ эшшо но юнгес ӝутомы.

Ольга Корепанова

Туспуктӥз Стас Иванов

Витисько лыктэмдэ

Кылъёсыз Галина Самсоновалэн

Укноысь укное мон ӵемысь учкисько:
Лыктэмдэ витисько, гажанэ.
Муспотон тусбуйдэ син азям возисько.
Ӝегатскиськод, исаса шат монэ!

Шур вылысь бус пыртӥ синъёсы жадьытозь
Лыктэмдэ учкыса, пукисько.
Сяськаос вылэ ӝыт лысву усьытозь,
Весь тонэ возьмасько, возьмасько.

Укноме усьтыса, мытӥсько кырӟанме.
Оло нош, кылӥськод куараме.
Лык ӝоггес! Тонэ мон огнам витисько.
Тон гинэ буйгатод сюлэмме.
Укноысь укное мон ӵемысь учкисько:
Лыктэмдэ витисько, гажанэ.
Муспотон тусбуйдэ син азям возисько.
Ӝегатскиськод, исаса шат монэ!

Мемие

Кылъёсыз Татьяна Леонтьевалэн

Мемиме ӟечкыласа,
Кырӟало та кырӟанме.
Мемиме яратыса,
Верало та кылъёсме.

Припев:
Мемие, мемие,
Малы шуо, ортчо аръёс?
Мемие, мемие,
Бам вылад кылдо кисыриос.
Мемие, мемие,
Эн кисьты тон синкылидэ.
Мемие, мемие,
Сюлмад тон кельты кылъёсме.

Кызьы-о бен тау каром
Монэ вордэм мемилы?
Кыӵе ӟеч кыл вералом
Монэ утем мемилы?

Ӟыгырто ай мемиме,
Верало ай ӟеч кылме.
Кытысь та ӟеч мылкыдыд,
Ваньзэ чидась сюлэмыд?

Тулыс ӝыт

Кылъёсыз Владимир Бубякинлэн

Гурт вылэ, гурт вылэ
Усиз ӝомыт, усиз ӝомыт.
Ӟеч-а, бур-а, тулыс ӝыт!
Ӝутӥське нюлэс йылэ
Тӧдьы юсь кадь тыр толэзь.

Припев:
Лыкты, лык, яратонэ,
Возь вылэ ӝыт шудонэ.
Тон сярысь гожтӥ кылбур,
Кырӟало тыныд выль гур.

Тыло шур, Тыло шур
Бызе жильыр, бызе жильыр,
Арган гур вӧлске жингыр
Гурт сьӧрын шудон пӧлын,
Бычыясь куакъёс улын.

Данъяса, данъяса
Чебер тустэ, чебер тустэ,
Колхозын ӟеч ужъёстэ.
Ӟеч-а, бур-а, туганэ,
Макем юн вити тонэ.

Тулкымъя

Кылъёсыз Павел Кутергинлэн

Нош туннэ ми пумиським,
Егит мылкыдмес вайим.
Поръяса лыктӥм тӥ доры,
Тӥ понна, куноосмы.

Припев:
Тулкым милемды нуоз,
Вань мылкыд но мед ортчоз.
Улон вакытмы шулдыр,
Мылкыдмы милям майбыр.

Эшъёсын валче улом,
Озьыен, ӵош кырӟалом.
Тулкымъёс вылтӥ мыном,
Куректом но шумпотом.

Припев:
Тулкым милемды нуоз,
Ар но, кык но мед ортчоз.
Улон вакытмы шулдыр,
Мылкыдмы милям майбыр.

Ӵошен киосмес кутом,
Огмы шоры берытском.
Сюлэмъёсмес буйгатом,
Веран кылмес вералом.

Припев:
Тулкым милемды нуоз,
Ар но, кык но мед ортчоз.
Улон вакытмы шулдыр,
Мылкыдмы милям майбыр.

Удмурт Дунне
By Удмурт Дунне 14 января, 2016 08:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<