500 граммъем нуныосты но утьыны луэ

Удмурт Дунне
By Удмурт Дунне 15 января, 2016 09:12
0102735,больница,роддом №7,перинатальный центр,дети

Кювезын ог 33-34 градус пала.

Анайлэсь но нунылэсь тазалыксэс утёнъя элькун центрын туннэ утьыны быгато 500 граммъем нуныосты но. Та понна басьтэмын туала куронъёслы тупась техника, отын ужало вылӥ тодон-валанъёсын специалистъёс.

Дырызлэсь вазь вуэмъёс

Перинатальной центрысь борддор кузя ошылэмын быдэс дуннелы тодмо луэм Исаак Ньютонлэн, Наполеон Бонапартлэн, Александр Суворовлэн, Василий Чапаевлэн но трос мукетъёсызлэн туспуктэмъёссы. Соос, пе, та дунне вылэ дырызлэсь вазь лыктӥллям. Бордазы ик интыямын элькунысьтымы пиналъёслэн тусъёссы — таос но дырызлэсь вазь вордскиллям. Но туспуктэмъёс вылын соос йӧн-йӧнэсь ни — муспотон мыняло. Тужгес пичиез нылаш вордскыкуз 600 грамм кыске вылэм, сое будэтӥзы, табере 3 но ӝыны арес луэм ни. Эмчиос верамъя, нылаш эшъёсызлэсь ӟечгес будэ ай.

Вашкала дыръя дырызлэсь вазь вордскем пиналъёсты возьылӥзы коркась тужгес шуныт интыын, гын сапег пушкы поныса. Вуоно полководецез Александр Суворовез будэтӥллям гур вылын, шуба пушкы бинялтыса. Туала вакытэ тазьы вырись ӧвӧл ни — эмъян удыс кыдёке азьлане вамыштӥз. Туннэ гын сапегъёсты, шубаосты воштӥзы кювезъёс.

Граммъёсты люкан

Анайлэсь но нунылэсь тазалыксэс утёнъя центр элькунамы ужаны ӧдъяз 2009-тӥ арын. Усьтӥськыкуз ик нимысьтыз боксъёс чакламын вал дырызлэсь вазь вордскемъёсты будэтонлы — 12 инты. Котькудаз 1 яке 2 кювез пуктэмын. Отын кыллись комокъёсты учкыны туж тунсыко. Йыръёссы мыжык быдӟа но ӧвӧл. Одӥгъёсыз ныс-ныс кӧло, мукетъёсыз назьыллясько, синъёссэс я усьто, я кынё.   Реанимация ёзэн кивалтӥсь Евгений Якимов верамъя, куаразы но, пе, потэ ни. Но пичильтокъёс ас понназы шоканы но, сиськыны но уг пӧрмыто на.

0102754,больница,роддом №7,перинатальный центр,дети

Анайлэсь но нунылэсь тазалыксэс утёнъя центр элькунамы ужаны ӧдъяз 2009-тӥ арын.

— Кювезын ог 33-34 градус пала, — шуэ Евгений Борисович. — Пинал утемын югытлэсь но мултэс куараослэсь — анай пушкын кадь.

Реанимация ёзэ огдырлы пыраны лэзё анайёслы — соос чаклало нуныоссэс, йӧлзэс кыскыса кельто. Нош пинал ас понназ шоканы дыше ни ке — выжто патологиосъя ёзэ.

— 1 килограммлэсь пичигес вордскем нуныос центрын ог 70-80 нунал будо, — пусйиз патологиосъя ёзэн кивалтӥсь Светлана Никифорова. — 1 но ӝыны килограммлэсь пичиосызлы кулэ ог 45 нунал.

Нуныосты будэто, ог 2 килограмм 200 грамм луытозязы. Зэм, городысьёссэ ог 300-400 граммлы ичигес дыръя но доразы лэзьыны быгато ни, соос ӟеч будо, умой сисько ке. Угось марысь мар ке, городын педиатръёс доры сюрыны капчигес.

Пӧртмаськисьёс ӧвӧл ке но…

— Дырызлэсь вазь вордскись нуныос, дыраз ӧд эскеры, юрттэт ӧд сёты ке, ӵемысь лябгес адӟо, лябгес кыло, — шуэ тазалыкез утёнъя министрлэн воштӥсез Людмила Гузнищева. — Анайлэсь но нылпилэсь тазалыксэс утёнъя центрын ваньмыз лэсьтӥське, пинал таза мед луоз шуыса. Синкӧльы бордысь сетчатка усёно кадь ке, сое татын ик юнмато. Лулсэр висёнъёсын вордскем  пичильтокъёслы но эмъясьёс юрттэт сёто. Пельзэс кылӥсь карон понна имплантация кулэ луэ ке, бадӟым городъёсысь эмъян центръёсы келяськом — та уж радъямын. Огкылын вераса, нунылэсь улонзэ утён сяна, эмъясьёс солэсь тазалыксэ юнматон понна но нюръясько. Соин ик дырызлэсь вазь вордскем нылпиос ӵемысь огъёзъёссылэсь ӟечгес но будо ай.

Перинатальной центрысь специалистъёс шуо: ми волшебникъёс ӧвӧл, но нуныосты утён понна ваньзэ лэсьтыны турттӥськом. Но жаляса верано, дуннеын  нуныос пӧлысь ог 10 процентэз дырызлэсь вазь  вордско. Элькунамы — ог 5-6 процентэз.  Но кышкан вань, азьланьын та лыдпус йылыны быгатоз шуыса. Кылсярысь, кылем арын шаерамы вордћськем 22 сюрс 60 пинал пӧлысь 1 сюрс 321-езлэн дырзэ возьмамез ӧз поты вал. Туэ 10 толэзь куспын 18 сюрс 511 нуны вордскемын, со пӧлысь 1 сюрс 611-ез нырысетӥ куаразэ вазьгес сётӥз — та 6,2 процентэз луэ.

Тазалыкез утёнъя министрлэн воштӥсез Людмила Гузнищева верамъя, нуны дырызлэсь вазь вордскыны быгатэ пӧртэм мугъёсъя, кылсярысь, кема кыстӥськись висёнъёсын, куд-ог эмъюмъёсын, керӟегъяськонъёсын сэрен.

— Соин ик анай луыны дасяськисьёслы азьло ик одно вазиськылоно специалистъёс доры, тазалыксэс юнматоно, — шуэ Людмила Гузнищева. — Кылсярысь, сакыр диабетэн курадӟись нылкышноез чакласа возьыны кулэ эндокринолог. Нош сюлэм, сэр висёнъёсын курадӟись анайёсты одно учкыны кулэ кардиолог.

Кювезъёсын кыллись тэшкылиослы дӥсямын шуныт пыдвылъёс. Эмъясьёс шуо: нуны, пе, вордскемез бере ик мед шӧдоз со сярысь сюлмаськемез. Пыдвыл — тае возьматӥсь арбери. Сое керттыса ваё анайёс. Но эмъясьёслэн но палэнэ кылемзы уг поты  — 1 номеро элькун больницаын ужасьёс киязы вень-бугор кутӥллям. Одӥгъёсыз шуныт пыдвылъёс, мукетъёсыз небыт изьыос керттӥллям —   маке мында люкаськемын соос: ӵужесь, гордэсь, вожесь… Озьы соос Анайлэсь но нылпилэсь тазалыксэс утёнъя центрын вордскем нуныослы кузьым дасяллям.

Элина Кумачёва

Туспуктӥз А. Горбунов

 

Удмурт Дунне
By Удмурт Дунне 15 января, 2016 09:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<