Вавож ёросысь «Луч» хозяйстволэн кивалтӥсез Анатолий Владыкин возёссэ уте но, азинтэ но

Удмурт Дунне
By Удмурт Дунне 14 декабря, 2015 12:12

Вавож ёросысь «Луч» хозяйство кема аръёс ӵоже ни ветлэ азьмынӥсьёс радын. Солэсь биньгозызэ котьку возизы быгатӥсь колхоз тӧроос. Берло 4 арзэ гуртоос оскемзэс верало Анатолий Владыкинлы. Анатолий Геннадьевич ас азяз ужпум пуктэ: утёно мар лэсьтэмын, ужано хозяйствоез эшшо юнматон вылысь. Солэн тыршемез пусъемын уно таукаронъёсын. Туэ сётэмын Удмурт Элькунлэн Данъян грамотаез.

0103005,Вавожский район,деревня Гурезь-Пудга,СПК Луч,председатель Владыкин

Анатолий Владыкин.

 

—  Анатолий Геннадьевич, фамилиды Вавож палъёслы чик уг тупа, палэнысь вуэмын шат?

— Ма, мон быдэс районлы одӥг Владыкин, дыр. Выжыосы Юкаменск ёросысь Пискор гуртысь. Отын вордски, будӥ, отын кылемын мамае, отын улэ Леонид выны семьяеныз. Жаляса верано, папае милемын ӧвӧл ни. кема аръёс ӵоже со вукочиын ужамын. Мамае колхозын тыршемын, берло аръёссэ гинэ лавкае потаз.

Ми вакытысь вань пиналъёс сямен ик, мон но, музъем ужез валаса, будӥ. 5-тӥ класс бере ни киям кусо кутӥ. Нош вуоно араз мыным вал оскизы — соин картошка ӝуткай, турын нуллӥ! Кыӵе лӧптэмын вал! Пудо сиён дасян вакытэз гуртын праздникез сямен возьмаллязы. Мӧйыос но, быдэ вуымтэос но — ваньмыз ог 50-60 пала люкаськылӥзы — колхоз бусые потылӥзы. Турнаны кутскылӥзы лысву тӧлӟемлэсь азьло, доре берытскылӥзы пеймытаку гинэ. Ми, нылпиос, мӧйыослы ужаны быгатэммес возьматыны турттылӥм. Но мынам эшшо одӥг малпанэ вал: великлы тырмымон уксё люкано. Со вакытэ талы ог 60 манет пала кулэ вал, нош мамае 25 манет, атае 30 манет уждун басьтылӥзы. Велик басьтӥзы ик — выныным кыкнамы вылысь одӥг. Куасъёсмы но кыкнамылы одӥг вал.

Туж умой тодӥсько на керосин лампаен пукылон вакытъёсты, электротыл коркамы ӝуатскиз 1960-тӥ аръёслэн шоразы. Соберегес ик кылдӥзы телевизоръёс. Нырысь ик сое басьтӥз мамаелэн выныз. Телевизорез маке быдӟа, нош экранэз пичи гинэ. Ваньмы солы сокем паймемын вал!

Эшшо туж умой тодӥсько на: коркамылэсь кыдёкын ик ӧй вал колхоз гараж, отын тупатъязы комбайнъёсты, тракторъёсты. Нош ми, пичиос, соос котыртӥ ог-огмес уйылыса шудыны туж яратылӥм. Ма, мӧйыос адӟымтэ дыръя техникаез асьме валаммыя тупатъям но кариськом вал. Со гаражлы луыса ик, оло, техника борды кыстӥськыны кутски. Нош музъемез яратон пыӵаз, лэся, мамаелэн выныз бордысь. Со колхоз пред луыса ужаз. Бусые потыны дасяськемзэ шӧдӥсько ке, сьӧраз куриськисько вал. Озьы ӵошен бусыостӥ котыръяським, шепъёслэсь кисьмамзэс, турынлэсь ӝужамзэ чаклаллям.

Армиын дыръяз

Армиын дыръяз

— Иське, пичиысен тодӥськоды вал, гурт адями луоды шуыса?

— Школаме йылпумъяме бере монэ Ижысь пединститутэ келязы. Папае эшъяськиз историлы дышетӥсенымы, со ик индылӥз: та Толяез история факультетэ ыстоно, дышетске умой. Мамае, папае соглаш луизы. Но мон аслэсьтым кари: пединститутозь ӧй вуы, меӵак вамыштӥ Ижысь сельхозинститутэ, механике. Дышетскыны пыреме бере гинэ та сярысь дорам верай. Ма, пырид бере, дышетскы ини, пие, шуиз папае.

Дышетскыны туж тунсыко вал! Дор палъёсам араз кык пол сяна ӧй вуылы: Выль арлы но 8-тӥ Мартлы, бертылонэз матын ӧй вал угось. 3-тӥ курс бере практикае Вавож ёросэ келязы — ӵапак «Луч» хозяйствое. 11 кузя вал ми, пӧламы 1 гинэ ныл. Бусыосты гырыны юрттӥським, тракторъёсты тупатъям. Колхоз пред Иван Павлович Перевощиков туж яраз — визьмо, ужзэ тодэ, калыкен вераськыны быгатэ.

— Нош ужан сюресты кутскиз Коми шаерын.

— Романтика утчаса, лэся, курсысьтымы 5 кузя отчы кошким, Сыктывкараз ужалом, кожам. Соку Ижысь гурт хозяйствоя институтысь выпускникъёсты котькытчы мыло-кыдо басьто вал, тодон-валанъёссы умоесь шуыса. Но Сыктывкаре вуим но, Комилэсь картазэ поттӥзы, 5 инты возьматӥзы — быръе, пе, кытчы мыноды. Мон самой уйпаласьсэ бырйи — Ижма каргуртэз.

Туж паймымон интыос сопалан. Толалтэ 40-45 градус кезьыт возиське. Котыр сыръясь интыос. Сюресъёс ӧвӧл — ярам, пичи самолётъёс лобало вал. Матысь чугун сюрес станциозь — ог 100 иськем. Гуртоос возё скал, пужей. Картошка сопалан уг буды. Чабей, ӟег кизё, но со кисьмаса уг вутты — утялто вожен ик, пудо сиёнлы гинэ яра. Ижмаын монэ автопарклы кивалтӥсе юнматӥзы. Ог 50 мурт ужасе вал. Комиысь гурт хозяйствоослы техниказэс тупатъяны юрттылӥм. Сюрес лэсьтонэ но пыриськылӥм. Соосты кынтэм бере гинэ вӧлдыны кутско вал — техника йӧ вылтӥ гинэ ортчыны быгатылӥз угось. Ужасьёсы куспазы коми кылын вераськылӥзы. Соос уг тодо вал, мон удмурт шуыса. Нош кылъёсмы одӥг выжыысь луо бере, вераськемзэс умой-умой кылзӥськыса, мазэ-созэ валалляй. Озьы одӥг пол механизаторъёсы верасько: туннэ ужам уг поты, ойдолэ техникамы, сӧриськемын шуом. Мон шонер меда валай шуыса, нырысь ик техника котыртӥ ортчи, учки, сӧриськемын-а, ӧвӧл-а. Собере механизаторъёсылы шуи: ужатэк уз луы. Ог-огмылы чаляк дышим. Кин тодэ, кемалы меда мон отчы кыльысал. Но армие повестка вуиз. Нуназе бере 4 часын  сётӥзы, со нуналэ ик ӝыт 7 часын сюрес вылэ потоно ни вал. Келякузы индылӥзы: одно берытскы, возьмалом. Котыреным чемоданэ но отчы ик кылиз — ӧз келялэ.

Армиын 1 но ӝыны ар вал, службаме нуи Свердловск улосын, танк дивизиын.

— Озьыен, армия бере вордскем палъёсады берытскыны малпады?

— «Лучлэн» кивалтӥсеныз Иван Павлович Перевощиковен  кусыпъёсмы ӧз ышылэ. Армие но со кӧня ке гожтэт ыстӥз, вераз, хозяйствоязы егит механикъёс кулэ шуыса.

Эшшо озьы пӧрмиз на: студент дыръям ай, каникулэ бертылыкум, тодматски Глазов пединститутысь студенткаен — соосты Пискор гуртамы картошка утялтыны ыстӥллям вылэм. Уд оске: Вавож ёросысь Пужмойылысь вылэм — та гурт но «Луч» хозяйствое пыре. Армия бере малпаськи: Вавож палъёсы мынӥ ке, уж но сюроз, семья но кылдыто. Надежда со вакытэ, дышетсконзэ йылпумъяса, Вавож ёросысь Гурезь-Пудга школаын ужаны кутскемын ни вал.

Студент аръёс.

Студент аръёс.

— Сюресты гожтыса дасямын вылэм…

— «Луче» 1981-тӥ арын вуи, со дырысен ялан татын. Иван Павлович соку ик валтӥсь инженере пуктӥз. Толэзь но ужаса ӧй вутты — квартира висъязы.

Хозяйстволэн автопаркез бадӟым вал: 60 пала тракторъёс, 15 комбайнъёс. Куддыр юась но ӧй вал, кулэ-а тӥледлы выль техника — ваё но кельто. Озьы гусеничной тракторъёс гинэ колхозамы 20 пала люкаськизы, ӵем дыръя соос юнме сылылӥзы.

Зэм, соку техника ӵем сӧриськылӥз. Озьы одӥг трактор нуналаз 5-6 гектар гинэ музъемез гырыса вуттылӥз. Соин ик механизаторъёс уйин но уже потано луылӥзы.

Огласянь, ужаны капчи вал: ӵуказе нуналлы осконэн улӥм. Но мукет ласянь, вылласянь ялан косъяськылћзы, ужез чаклаллязы. Соосъя ужатэк ӧйлась. Но колхоз предмы кужмо вал, зэмлыкез яратылӥз. Сюлмаськылӥз ужасьёсыз сярысь. Озьы колхозникъёслы дунтэк пудо сиён люкылыны ӧдъяз — та туж ӧз кельшы вылӥослы. Нырысь ик милям колхозамы кылдӥз АВМ, солэн ужаменыз тодматскыны быдэс республикаысь вуылӥзы. Ёросамы нырысьёсыз пӧлын кутским нянь пыжыны.

Иван Павлович Перевощиковлэсь ужзэ быгатыса азинтӥз Николай Леонидович Чайников. Со кивалтон вакытэ но колхозмы азинтӥськиз, азьмынӥсьёс пӧлын ветлӥз.

— Таӵе кужмо кивалтӥсьёс киысь биньгозыез кутыны кышкыт ӧй вал-а?

— Уг ваты: капчи ик ӧй вал. Угось соослэн тыбыр сьӧразы мон 30 ар вал — сомында ужай валтӥсь инженерын. Николай Леонидович Чайниковез Сьӧлта ёрослы йыре басьтэмзы бере, выль пред быръёно шуыса, хозяйствоямы собрание ортчытӥм. Тросэз колхозникъёс куаразэс мон понна сётӥзы. Ӵуказеяз уже потӥ но мар бордысен кутскыны уг валаськы. Ӝќк сьӧры люкай правленилэсь ёзчиоссэ, валтӥсь специалистъёсты. Ӵошен, огкылысь ужан мылкыдме верай. Со вал 2011-тӥ арын декабрь толэзе. Хозяйствомылэн тросэз вормонъёсыз пото калыклэн ужез гажамез бордысь. Специалистъёсмы ваньзы ик асьме палъёсын вордскемын, будэмын. Оскымонэсь, ас ужзэс  ӟеч тодо. Кылсярысь, зоотехникмы но агрономмы — кузпалъёс, Алексей но Галина Чирковъёс удысазы 30 ар пала ужало ни. Ачим интые, валтӥсь инженере, кельтӥ Николай Манашевез — Ижысь гурт хозяйствоя академие дышетскыны ыстылӥм, али диплом басьтӥз ни: йыг-йыг со, ужзэ тып-тып лэсьтоз, калыкен но вераськыны быгатэ.

Азьло вакытъёсын ӵоша-тоно ке, техникамы сомында ӧвӧл ни: паркамы ог 35 туала трактор, 6 комбайн… Кылсярысь, Австриын поттэм усыян техникамы огдыре кизе но, удобрение но пазя, огпол ортчемен 12 метр пасьта музъемез басьтэ. Со 3 МТЗ тракторез воштэ. Басьтӥм сое 2013-тӥ арын — ёросамы нокинлэн ӧй вал на. Автопаркмес арлы быдэ выльдыны турттӥськом, кылем арын талы 25 миллион, туэ 20 миллион манет висъям. Вуж трактор-комбайнъёсмес ум возиське.

Кылем арысен элита тысь дасяны кутским — талы сертификат басьтӥм. Соин ик туэ ю тысь возьыны 2 склад пуктӥм ни. Нош 3 ар талэсь азьло сьӧд-тӧдьы выжы скал будэтонъя племзавод кариським. Племенной ветылъёсты вузанъя 2014-тӥ арын республикаямы 1-тӥ интые потӥм вал. Туэ но пудомес мыло-кыдо басьто: 100-зэ келям ни Нижний Новгородэ, 50-зэ — Башкирие, эшшо 50-зэ басьтӥзы Эгра ёросэ. 17 фермаын 3 сюрслэсь ятыр сюро таза пудомы. Со пӧлысь 900-эз — кысконо скалъёс.  Кылем арын котькуд скаллэсь 6 сюрс тонналэсь ятыр йӧл поттӥм вал, туэ но солэсь ӧжыт уз луы. Пудо йырмес азьланьын но будэтыны чакласьком. Соин ик вуоно арын 400 йырлы ферма пуктыны ӧдъяськом, документъёс дасян борды кутским ни. Малпанмы мед быдэсмоз вылэм.

Валамон, вормонъёсмы капчиен уг сётӥсько. Туэ ар куспын гинэ дунъёс воштос ёзъёслы но, удобрениослы но ог 2 поллы будӥзы ни. Соин ик котькуд вамышез чаклано луэ. Озьы кыкетӥ арзэ ни улӥськом бюджетъя. Сое юнматон азьын умой-умой чотаськом: кытысь уксё поттыны быгатом, кытчы сое кутом. Хозяйствомес юнматонэн ӵош сюлмаськоно луэ гуртъёсмес азинтон, шулдыртон сярысь но. Туж потэ вылэм, сюресъёсмы вольытэсь мед луозы шуыса. Соин ик гурт администрациен огкылысь кариськыса, ульчаосамы 3-тӥ арзэ векчи изъёс вӧлдӥськом.

1-ти Май демонстрациын.

1-ти Май демонстрациын.

— Эштосады ужаны палэнысь но куриськисьёс ӧжыт ӧвӧл. Маин гочатӥськоды соосты?

— Гуртъёсысьтымы котькуд кыкетӥез капка азьын машина сылэ — колхозамы ужасьёслэн шоро-куспо уждунзы туэ 9 толэзь ӵоже 24 сюрс манет пала луэмын. Кема ужасьёслы стажевой тыриськом, толэзьлы быдэ уждунзы борды 30 процентозь ватсаськом на. Соку гинэ ужаны кутскисьёслы ар пумын быдэн 10 сюрс манет сётӥськом.

Со сяна, колхоз чотын араз 2-3 ке но корка пуктыны турттӥськом. Котькудӥзлэн дуныз — 1 миллион манет. Озьы юрттӥськом соослы, кин ас кужыменыз корка пуктыны уг быгаты. Улон инты ӵектӥськом егит специалистъёслы но. Туэ зоотехник дорамы лыктӥз — мунчоен, гидэн, лапасэн юртъер висъям. Корка сётӥськом арендае, 10 ар ужамзы бере отын кузё луыны быгато ни.

Та сяна, ми ужасьёсмылэн тазалыксы сярысь но ум вунэтӥське. Котькуд механизаторез рейсэ потон азьын эскере эмъясь — давленизэ мерта, мылкыдзэ чакла. Фельдшеръёсмы, 3 кузя соос, озьы ик вуыло фермаосы. Котькуд колхозниклы араз  5 пол массаж лэсьто — дунзэ тыре хозяйствомы.

Малпасько, котькуд адямилэн ӵуказелы осконэн улэмез потэ — та ик гочатэ, дыр, палэнын улӥсьёсты. Алигес, кылсярысь, Яр палъёсысь семья вуиз. Алнаш ёросысь но куриськисьёс вань. Но ваньзэс ми кутыны ум быгатӥське. Шумпотымон, асьмелэн егитъёсмы палэнэ кошкыны уг дырто.

— Анатолий Геннадьевич, тӥ чурыт-а кивалтӥсь?

— Котьмалэн эсэпез луыны кулэ, кивалтон — сыӵе удыс, кытын чурыт но луыны быгатоно. Котьку но котькин азьын ӟеч гинэ луид ке, аслыд ачид пыд пуктод. Зэм, мон уг яратӥськы керетонъёсты-ӵашетонъёсты. Ваньзэс кылзыны, кылыны турт-тӥсько. Кинэн ке малпанъёсмы пӧртэмесь луо ке, со монэ оскытыны мед быгатоз, со шонер, мон янгышасько шуыса. Ӵошен огкылэ вуом. Юнме ведь адямилы сётэмын ӧвӧл йыр но, кыл но. Но маке верамлэсь азьло нырысь йырын малпаськоно!

— Котькытчы вутскиськоды: талы кытысь ке кужым, мылкыд кулэ ук…

— Шуо, котькуд ӵукна, пе, чечыен ву юоно, нуналскын ӧжытсэ ог 10 сюрс вамыш лэсьтоно. Но тросэз-а меда та куронъёсты чаклало, уката но — гуртоос пӧлын? Милям зарядка — азбарын, бакчаын, пудо котырын.

Малпасько, котькуд адямилы шудо луон понна трос ик кулэ ӧвӧл: мед луоз улон интыез, бордаз — семьяез, яратоно ужез. Кузпалы Надежда Александровна пыр ужаз школаын, ӟуч кыллы но литературалы дышетӥз. Али дорын пуке ни, нунокъёсмес утялтэ. Сергей пимы семьяеныз  бордамы ик улэ: внукмылы 4 арес, внучкамылы 1 но ӝыны тырмиз. пимы ужа гурт администрациын. Оля нылмы пинь эмъясе дышетскиз, улэ но ужа Уваын. Со но нунокен шумпоттӥз ни.

Уж сярысь верано ке, быгатӥсь коллективын азьланьын но вормонъёс одно ик луыны кулэ. Улонын тросэз воштӥське, но музъем ужасьлэн тыршемез котьку кулэ луоз.

Элина Кумачёва

Туспуктэмъёс геройлэн но А. Горбуновлэн

 

Удмурт Дунне
By Удмурт Дунне 14 декабря, 2015 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<