Ури-бери ортчиз спектакль «Жингрес сӥзьыл»

Удмурт Дунне
By Удмурт Дунне 22 декабря, 2015 08:34

Пьесаез вылысьтыз вылаз пукто ке, сюлме кышкан каръяське: авторлэн малпанэз кылёз на-а? Туала шӧм пыӵатыны тыршыса, мултэс уз куасалтэ-а? Шумпотон-а, ӝожомон-а ваёз выль учкон? Таӵегес малпанъёсын вамыштӥ Удмурт театре «Жингрес сӥзьыл» спектаклез учкыны.  

IMG_4059

Игнатий Гавриловлэн «Жингрес сӥзьыл» пьесаез сцена вылын куинетӥзэ пуктӥське ни.

Игнатий Гавриловлэн «Жингрес сӥзьыл» пьесаез сцена вылын куинетӥзэ пуктӥське ни. Нырысьсэ со мынӥз 1964-тӥ арын, собере 1988-тӥын. Табере тани, 27 ар вис бере, сое пуктӥз режиссёр Алексей Ложкин.

Спектакль кутскыку, капчи мылкыд кылдыто декорациос:  сӥзьыл кызьпуос, бергаса усись ӵуж куаръёс, чузъяське лэймыт крезьгур. Учкись соку ик егит вакытъёсаз вуэ кадь. Но тани шуккиське шулдыр крезьгур, сцена вылэ пото артистъёс. Дӥсьёссыя соку ик адӟиське — совето вакытысь ужась гурт калык. Аспӧртэм совето шӧм пыӵатэ горд плакат но. Радио пыр соослы нуналлы разнарядка сёто: кинлы мар туннэ ужано. Малы ке ӵапак та люкетэз укыр шоккетыса лэсьтэмын кадь потӥз, солы удгес оскиськы. Но пумен-пумен спектакль бордаз кыске, геройёсын ӵош улыны, шудыны, серекъяны кутскиськод.

Шӧдӥське совето вакыт шоры шунытак, пальпотон пыр учкон. Аспӧртэм ретро. Со дыре ик пыртэмын туала улонысь суредъёс.  Ог-огзэс яратӥсь Борис Бегишев но Настя Грачёва шоры учкыса, тае нырысь-валысь уд шӧдӥськы на. Но сцена вылэ Тимофеевна но Паримон пересьёс пото гинэ, зал серекъяны ӧдъя ни. Кыкназы но спортэн вырон яркыт-ӵуж дӥськутэн, Паримонлэн ныр йылаз бадӟым очки, киосаз шведской ходьба шуонэн вырон бодыос. Зэм, «Жингрес сӥзьыл» спекталез 1кылем дауре пуктӥсьёслэн та йыразы но ӧй лыктысал. Ма, учкись но мазэ-созэ ӧй валасал. Нош али ваньмыз со туж серемес адӟиське: бодыосыныз шонаськыса ветлӥсь визьмояськись туала пересь но солэн сюлмо кузпалыз Тимофеевна. Озьы ке но, совето вакытэз возьматӥсь спектакльын “швед” бодыослэн потэмзы интыяз ӧвӧлгес кадь. Валаськом ини: со серемез поттон понна пыртэмын.

IMG_3988

Шӧдӥське совето вакыт шоры шунытак, пальпотон пыр учкон. Аспӧртэм ретро.

Со понна ик пыртэмын, лэся, пуны но. Со кӧня ке пол урдӥськылэ котьку дыртӥсь Кукин вылэ. Кукин кузь пыдъёссэ оло нош кымесозяз ӝутъяса, пегӟоно луэ. Зэм, пуныез адями ик шудэ. Нырысь-валысь мар шуыны ик паймоно кадь.  Но учкись лулысь-сюлмысь горе.

Нялтас вераса, спектакльлэн сюжетаз нокыӵе воштонъёс ӧвӧл: гуртысь егитъёс Настя Грачёва но Борис Бегишев ог-огзэс ярато. Борис кык арнялы ужаны кошке, песянай-песятаезлы туганэзлэсь нимзэ вераса кельтэ. Таосыз Балышкен ӝуткамъя доразы ваё Настя Сорокинаез. Кык арня ортчыса, бертэ загсын Грачёваен гожтӥськем Бегишев. Нош дораз сое чидатэк вите ни песянай-песятаеныз курам Сорокина…

Пересьёсты туж быгатыса шудо Геннадий Бекманов но Екатерина Яковлева. Та пар понна зэмзэ но сюлмаськыны кутскиськод, кусыпъёссэс валаны тыршиськод, ваче чебер кырӟакузы но, соосты кема-кема кылзэм потэ.

Чидатэк витёно Балышкенлэсь потэмзэ. Тазэ ӵапак интыяз шудэ Наталья Тур. Шудэм гинэ ӧвӧл, ачиз ик роль пушказ улэ кадь. Вож сугон куртчыса бадӟым бутыльысь йӧл юэмзэ адӟыса ик, валаськод ни: тани со, гуртысь вал кадь ужась, ас дунзэ тодӥсь кышномурт! Быг-быг мугоро нылкышно туж ӟеч тодэ, ма солы та улонлэсь кулэ: ваньбур, машинаен отчы-татчы нуллӥсь воргорон. Соин ик Балышкен  аслэсьтыз ӵыжы-выжы нылзэ Борис Бегишев шофёрлы кужмысь сётыны выре. Но та бордын но нокыӵе трагедиез уг шӧдӥськы, угось Сорокиналы аслыз но Борис кельше. Зэм, сюлэмыз солэн шымырске, Гриша Грачёв шоры учкыса но. Настя Сорокинаез шудӥсь Надежда Наговицына спектакль мынэмъя усьтӥське, куаш-куаш яратонэз утчась нылашлы пӧрме. Со дыре ик шораз пальпотон пыр учконо, керетыкуз, юр-яр карыкуз но солэн лекез зэмос ӧвӧл, шудэм кадь потэ. Комедия но тӥни.

IMG_3782

Чидатэк витёно Балышкенлэсь потэмзэ. Тазэ ӵапак интыяз шудэ Наталья Тур.

Спектакльын тыршемын пичи детальёс пыр но серемез поттыны. Тани, шуом, Матвей Кукин пота мӧляяз яркыт сяськаен. Учикисьлэн со соку ик тодаз кыле. Нош пумазгес со сяськаез аслаз мусоезлы Грачёв кузьма ни. Зал нош ик гурак каре.

Быдэс спектакль капчи мылкыдын мынэ ке но, сюлэмез ӵабыштыса кельтэ ик. Валаны кутскиськод: адямиос пӧртэмесь, но ваньзылы соослы шудо луон понна кулэ одӥгез гинэ —  яратон. Яратонзэ шедьтыса, гажамез шӧдыса гинэ, адями луэ лякытгес но чебергес. Котькин мед луоз со: Грачёва я Сорокина Настяос, Матвей Кукин, Балышкен, ма, быдэс улонзэс ӵош ортчытэм Паримон но Тимофеевна… Ӵапак спектакльысь пересьёс шоры учкыса, валаськод семьялэсь дунзэ.

Нимысьтыз верано, дыр, костюмъёс сярысь. Тӧдьы носки вылын сьӧд туфли — совето вакытлэн тодметэз. Но тани спектакльлэн пумаз егитъёс удмурт шӧмо туала дэремъёсын пото. Со гинэ ӧвӧл, Настяослэн пур-пур дэремъёссы тодэ вайыто «Оттепель» фильмез шӧдо. Озьы спектакльын одӥг азе бинемын этно но, гламур но, совето вакыт но. Шӧдӥське Алексей Ложкин режиссёрлэн, Марина Самсонова суредасьлэн утчаськемзы. Нялтас вераса, Марина ик Настя Грачёваез но шудӥз.

Оглом пусъёно на: спектакль 1 час 40 минут ӵоже мынэ ке но, огшокчемен ортче. Я тани, ваньмыз сэрттӥськиз, йылпумъяськиз кадь: сцена вылын нош ик ужась калык, узыр колхоз но гурт сярысь задор кырӟан, ужась калыкез данъясь кылъёсын горд флаг. Быриз? Эк, кӧт ӧз тыры, эшшо адӟысал на кадь. Но тани катанчи нош ик усьтӥське — сӥзьыл кызьпуос, бергаса усись ӵуж куаръёс, лэймыт крезьгур. Ӝыт шыпытын кылдо велосипед вылын пукись, жи! карись Балышкен но сое ворттылтӥсь Матвей Кукин. Зал гурак каре. Кызьпуос котыртӥ мусояськыса ветлӥсь мукет паръёс ветло на. Ма бен, улон азинске, нош спектакль зэмзэ но йылпумъяське. Сюлэмын туж шуныт, туж лякыт луэ. Озьы «Жингрес сӥзьыл» аспӧртэм праздник выллем ортче. Туж ури-бери, номыриз акыльтыса уг вуы.

IMG_4117

Пусйыны кулэ, спектаклез учкисьёс уноез та пьесаез тодо ни.

Пусйыны кулэ, спектаклез учкисьёс уноез та пьесаез тодо ни. Кин ке школаысен лыдӟыса, кин ке театрын азьвыл постановкаосты учкыса. Ачим но учкыкум ялан возьмай: ку тазэ верано кылъёссэс вералозы ни, ку соиз герой потоз. Сыӵегес ик мылкыдзэ шараяз Ижысь удмурт кылъя дышетӥсь Ангелина Решетникова. Спектакль, пе, шулдыр  мылкыд кельтӥз. Озьы ке но азьвыл, нырысетӥ постановка, сюлмысьтым нокызьы уз кошкы ни, отын шудӥсь артистъёсты (ма, Нина Бакишеваез ик!) номырин уд вошты ни. Ангелина Ефремовна «Жингрес сӥзьыллэн» вань постановкаосаз ветлэм, со гинэ ӧвӧл, школаын дышетскыкуз ай, колхоз бусыын гурт калыклэсь та спектаклез шудэмзэ адӟем. Солэн малпамезъя, таиз спектакль туж, пе, яралоз туала егитъёслы.  Ма, озьы ик вань. Тани Якшур-Бӧдья ёросысь Мукши школаысь нылпиос бурдъяськыса бертӥзы. Спектакле соос удмурт кылъя дышетӥсенызы Надежда Гильманшинаен ветлӥзы. Надежда Кирилловналэн верамезъя, пиналъёслы туж-туж ярам. Автобусэ пуксьыса, пе, юасько: мукетъят театре мыноды на-а? Ваньзы автобус тыр кеськиллям: «Мыном!»

Озьыен, ӟечкылалом театрмес выль тунсыко премьераен — егит мылкыдо спектаклен!

Елена Миннигараева

Удмурт Дунне
By Удмурт Дунне 22 декабря, 2015 08:34