Удмуртиысь Национальной музейлы — 95 ар. Историез усьтэ тӥрлык

Удмурт Дунне
By Удмурт Дунне 3 декабря, 2015 14:07
музей

К. Герд нимо музей

К. Герд нимо музей та лыдпуссэ паськыт пусъе. Кылем арняе Кун Кенешын ортчиз «Музей лыдӟонъёс Арсеналын» научно-практической конференция но юбилейлы сӥзем сӥё-дано ужрад.

Отчы пыриськизы шаерысьтымы, Россиысь но кунгож сьӧрысь музейёсын ужасьёс. 95 аръем сюресэз но туннэ нуналэз сярысь вераз музейлэн кивалтӥсез, Россиысь культура удысысь дано ужась Раиса Мартынова:

— Музеймы усьтӥськиз вал 1920-тӥ арын Иж но Иж ёрослэн музеез сямен. Татын ужаз 7 адями, 1925-тӥ арын фондын утиськиз 1 сюрс 508 арбери. Туннэ милям фондъёсамы лыдъяське 200 сюрслэсь уно паймымон коллекциос но тӥрлыкъёс. Ужасьёсмы — 101 мурт, берло 5 ар ӵоже коллективамы вуизы визьмо  но мыло-кыдо егитъёс. Пиналъёслэн задорзы, тунсыкъяськонзы но арлыдо ужасьёсмылэн быгатонлыкъёссы юрттозы музейлы азьлане мыныны, — шуиз Раиса Мартынова.

Арлы быдэ шаерысьтымы валтӥсь «шыкысын» ортчыло 50 пала адӟытонъёс, соосты учко 120 сюрслэсь уно адямиос.  Кылсярысь, туэ усьтӥськиз кема витем выставка — «Удмуртилэн инкуазез». Со сӥземын шаермылэн паймымон инкуазезлы, тылобурдоослы, пӧйшуръёслы, будосъёслы. Та адӟытон егит дизайнеръёслэн но музейысь наукая ужасьёслэн кӧня ке ар ӵоже валче тыршемзылэн емышез луэ.

К. Герд (нырысетӥ радысь куинетӥез) Зураын фольклор экспедициын. 1929-тӥ ар.

К. Герд (нырысетӥ радысь куинетӥез) Зураын фольклор экспедициын. 1929-тӥ ар.

2000-тӥ арысен Национальной музей нуллэ удмурт югдытӥсьлэсь Кузебай Гердлэсь нимзэ. Историяя, кылъя но литературая Удмурт институтлэн директорез Алексей Загребин верамъя, шаертодон, калык культура но Герд ог-огзылэсь люконтэмесь.

—  Азьло дырысен адями бичаз, люказ пӧртэм арбериосты. Визьмо муртъёс валазы: историез усьтыны, эскерыны юрттоз вашкала тӥрлык. Нырысетӥез  бадӟым фин-угор адӟытон усьтӥськиз 1823-тӥ арын Финляндиысь Национальной музейын. Удмурт материалъёс отын трос вал. Бичаз, люказ, вуттӥз соосты Эстониысь военной врач, Ижысь пыӵал тӥрлык поттон заводын ужам  Макс Теодор Бух. Та ик луиз Удмуртиез но Финляндиез герӟась нырысетӥез нюжа.  1918-тӥ арын этнограф Михаил Худяков Малмыжын котыраз люказ историен вырисьёсты, пӧлазы вал шаерчи, писатель Кузебай Герд, со сайкатӥз удмурт интеллигенциез. Ӵапак Гердлы удалтӥз Удмурт музеез кылдытыны. Со соку ик вала ни вал: музейлы кулэ юрт, фондъёс, экспедициос но техника. Солэн сюлмаськеменыз ик висъямын вал нимысьтыз корка. Фондъёсты узырмытон понна ачиз вуылӥз ёросъёсы но гуртъёсы, утчаз, люказ пӧртэм арбериосты, озьы ик радъяз кӧня ке экспедициос. Герд ик музейлы басьтӥз фонограф но фотоаппарат. Со сяна, мукет музейёсын кусыпъёс тупатӥз но ялан тодон-валанзэ будэтыны тыршиз. Ӵыжы-выжы калыкъёс, музей кылдытон но национальной культураез азинтон темаос огазеязы фин-угор дуннеысь 3 тодмо адямиосты, этнографъёсты: фин тодосчиез У. Сирелиусэз,  коми профессорез В. Налимовез но  удмурт югдытӥсез К. Гердэз, — шуэ Алексей Загребин.

музей

nmur.ru адресъя луэ шедьтыны музейлэсь сайтсэ.

Мар огазея черкез но музеез, та сярысь  вераз Ижысь Дун-чылкыт Николайлы сӥзем храмлэн настоятелез, протоиерей Георгий Харин.

— Нырысь ик вераны кулэ: черк ноку но музей ӧй вал, тросэз осконлэсь кыдёкын улӥсь адямиос храмез музеен малы ке сурало. Бен, татын вашкала обросъёс, вашкала кыл, вашкала черк кырӟанъёс, озьы ке но черк музей ӧвӧл. Черк — со бадӟым семьяен улон. Котькуд семьяын сямен ик, татын но арбериос вужмо, тӥясько, соосты воштоно. Озьы 19-тӥ даурысен черкъёсын кылдо хранилищеос яке черк археологияя кабинетъёс. Туннэ но ужа Москваысь духовной академия бордын сыӵе кабинет, Россиын со одӥгез бадӟымез луэ. Храмъёс понна секыт улон вуиз 1922-тӥ арын. Соку потӥз черк ваньбурез талан сярысь декрет. Ӵапак соку ик черкъёслы зол юрттӥзы странаысьтымы музейёс: утизы оскись калык понна дуно луись арбериосты, кылсярысь, преподобной Серафим Саровскийлэсь, Иоасаф Белогородскийлэсь, Иоанн Тобольскийлэсь, Александр Свирскийлэсь но мукет святительёслэсь лысьӧмъёссэс, уно обросъёсты. Тау карыны кулэ Удмуртиысь Национальной музейлы. 1932-тӥ арын музей выжиз Дун-чылкыт Михаиллэн собораз. Таин валче кӧня ке аръёслы утиськиз черк но.

архив, экспедиция

Кушман гурт вӧзын экспедиция дыръя.

Культурая но туризмъя министр Владимир Соловьёв ӟечкылаз музейчиосты.  Калык культураез но искусствоез утьыны, эскерыны но азинтыны юрттэмез понна К. Герд нимо музейлэн коллективез пусъемын Удмуртилэн Тӧроезлэн Таукаронэныз. Юбилеен валче  ик 16 ужасьёс пусъемын пӧртэм данъетъёсын. Кылсярысь, Удмуртиысь культура удысысь дано ужась луизы Надежда Бузмакова, Наталья Шумилова но Галина Мезрина. Кун Кенешлэн Данъян грамотаеныз сӥлы каремын Светлана Орехова, Удмуртиысь Правительстволэн Данъян грамотаез сётэмын Наталья Синициналы но Ольга Колчиналы. Озьы ик юбиляръёсты ӟечкылазы но капчи мылкыд кузьмазы «Айкай» театр но «Италмас» ансамбль.

Галина Семёнова

Туспуктэмъёс: nmur.ru

Удмурт Дунне
By Удмурт Дунне 3 декабря, 2015 14:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<