Удмуртиысь культурая колледжлы — 70 ар

Удмурт Дунне
By Удмурт Дунне 1 декабря, 2015 13:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Культурая колледж юбилейзэ пусйиз сӥё-дано. Ужрадэ вуизы татын дышетскем но ужам усточиос. Кызьы улэ но ужа культурая колледж, вераз кивалтӥсез, Удмуртиысь культура удысысь дано ужась Елена Меркульева.

— Елена Борисовна, туала колледж сюрессэ мытӥз Быдӟым Вормонлэн араз.

— Озьы. 1945-тӥ арын Ижысь педучилищелэн инъетэз вылын усьтӥськиз библиотечной техникум. Но библиотекарьёслы сяна, шаермы ёрмиз клубын ужасьёслы но. Культураез ӝутыны кулэ вал, нош специалистъёс ӧй вал. Озьы 1961-тӥ арын техникум культпросветучилищелы пӧрмиз. 1960-тӥ-1970-тӥ аръёсы татын усьтӥськизы «оркестр», «калык хор» но «эктон» специализациос. 1992-тӥ арын дышетыны кутскимы на калык киужлы. Малы ке шуоно республикаямы кибашлыослэн центръёссы усьтӥськыны кутскизы, соослы но усточиосты будэтоно вал. 1990-тӥ арын культпросветучилище луиз культурая училище, нош 2006-тӥ арысен ми лыдъяськиськом культурая колледжен.

ансабль колледж

«Инву гур» ансамбль.

— Училищелэн нимыз трос пол вошъяськем, нош маиз ӧз воштӥськы?

— Ми понна котьку валтӥсез вал, азьланяз но озьы луоз — зэмос профессионализм но творчество. Студентъёсмес дышетӥськомы озьы. соос ас удысазы зэмос усточиос мед луозы шуыса,  калык культураез, искусствоез утьыны но азинтыны быгатэм сяна, ялан маке выльзэ малпаны, утчаны медаз жаде.

 — Студентъёсты визьноданы туала амалъёсты но кутӥськоды, дыр?

 — Одно ик. Усто специалистъёсты будэтэмед потэ ке, дышетонэ выльзэ пыӵатытэк ӧвӧл. 2011-тӥ арысен студентъёсты визьнодаськом выль дышетон  стандартъёсъя. Озьы ик радъясько экскурсиос,  котырес ӝӧкъёс, занятиос ортчыло «урок-шудон», «урок-презентация» но мукет амалъёсын. Нылпиос асьсэос пӧртэм сайтъёс но презентациос лэсьтыло.

— 70 ар куспын кӧня  но кыӵе специалистъёсты дасяды меда?

—  9 сюрслэсь уно усточиос потӥзы дорысьтымы: библиотекарьёс, кырӟась-эктӥсьёс, художникъёс, актёръёс, калыклы ужрадъёсты радъясьёс но мукетъёс.

— Берло дыре трос верасько шаерамы туризмез азинтон сярысь, мон тодӥсько, кӧня ке ар талэсь азьло, колледжын но таӵе специализация кылдӥз.

— Бен,  ми та ӧръя витетӥ арзэ ужаськом. Куинь выпускмы вал ини. Студентъёсмы асьсэос туризмъя маршрутъёс утчало-малпало, быдэс дуннелы усьто шаермылэсь тунсыко но аспӧртэм луэмзэ. Егитъёсмы ужаны мыно турфирмаосы яке муниципал кылдытэтъёсы. Республикаямы кутэмын туризмез азинтонъя нимысьтыз программа. Со туж шонер. Туризм юрттыны кулэ шаермес мукетъёслы тунсыкогес карыны но республикамылэсь экономиказэ юнматыны.

2551_5012

Туэ, выль дышетскон арлы, общежитие усьтӥськиз.

— Кык ар талэсь азьло гуртъёсысь студентъёсты секыт югдуре шедизы колледжлэн общежитиез пытсаськемен валче.

— Шумпотыса вераны луэ, тупатъян ужъёс йылпумъяськизы. Туэ, выль дышетскон арлы, общежитие усьтӥськиз. Азьло юртлэсь татын кылизы борддоръёсыз гинэ. Быдэсак воштэмын ӧсъёс, укноос, электротӥрлык, мебель, пӧраськон, мисьтӥськон но шутэтскон интыос — ваньмыз ӵыжак вылесь. Огъяулонни 340 муртлы чакламын, татын уло культурая но крезьгуръя колледжъёсын дышетскисьёс. Кин ёрме вал улон интылы, ваньзылы комната висъяськиз. Ураме уз кыле заочно амалэн дышетскисьёс но, таосызлы но интыос чакламын.

—  Колледжлэн данъяськонэз — со…?

— Адямиос: дышетӥсьёс но выпускникъёс. Тросэз выпускникъёсмы, вылӥ тодон-валан басьтыса, дорамы ик ужаны вуизы. Туннэ нуналлы колледжын 94 ужасьёсмы, 400-лэсь тросгес студентъёсмы. Тау шуэме потэ ветеранъёслы но али ужасьёслы. Та адямиостэк уз азинскы колледж. Ӟеч кылъёс вераме потэ дышетскисьёсмылы но вань выпускникъёсмылы, малы ке шуоно соос — маиз вал, вань но луоз колледжмылэн.

Мылкыдъёс

Выльысь берыктысал со аръёсты

Валерий Гоголев.

Валерий Гоголев — Алнаш ёросысь Асан совхоз-техникумысь культура юртысь хормейстер, аккомпаниатор, Удмуртиысь культура удысысь дано ужась:

— Школаямы музыкаен дышетӥсьмы Василий Иванович Корнев культпросветын дышетскемын вал. Солэсь адӟем карыса но баянэн шудэме потыса, Иже лыктӥ. Клубын ужало шуыса но, ноку ӧй малпалля, но тани 40 арлэсь кема ини культура удысын тыршисько. Училищеез йылпумъяй 1971-тӥ арын. Дышетскон аръёсме туж шунытэн тодам вайисько. Котькуд нунал баянэн шудӥсько, котькуд нунал дышетӥсьме Геннадий Александрович Шаклеинэз тодам вайисько. Кыӵе умой адями, но макем усто педагог вал, сыӵе чебересь кырӟанъёс гожъяз. Культурая училищелэн котькуд вордскем нуналаз ветлыны тыршисько. Дышетӥсьёс, студент аръёс но эшъёс уг вуно. Тани ми ӵош дышетскимы Россиысь культура удысысь дано ужасен, «Арганчи» ансамблез кылдытӥсен Екатерина Антоноваен, азьвыл культура министрен Геннадий Васильевич Чайниковен но мукетъёсыныз.

8-4-9

Владимир Глушков.

Владимир Глушков — Дэри ёросысь Шор Постол культура юртысь балетмейстер:

— Мон пырыны малпай колледжысь оркестровой люкетэ. Но татын дышетскиз гуртысьтымы ик, Ува ёросысь Бадӟым Ӝужгесысь, Сергей Татаркин, со шуиз: пыр дирижёръёсты-хореографъёсты дасясь люкетаз. Татын, шудыны сяна, кырӟаны но, эктыны но дышетозы. Уг жаляськы, солэсь кылзӥськи шуыса. Али мон «Пинал даур» ансамбльын тыршисько, тросгес вырисько эктонэн, шудӥсько крезьгуро инструментъёсын,  кырӟасько шергес. Шонерзэ вераса, мон вокалъя урокъёсысь куддыръя пегалляй. Дышетӥсе Эльвира Петровна Николаева туннэ но сое мыным тодам вайытӥз. Эшъёсы сярысь верано ке, нылъёсмы улонзэс культураен герӟазы. Кылсярысь, Надежда Леонтьева Пичи Пургаысь калык хорен кивалтэ, Вероника Шалавина Калык творчествоя элькун юртын валтӥсь методист. Пиосмы бырйизы мукет удысъёсты, культураын ужаса, уд узырмы шуизы, лэся. Но ваньзэ коньдонэн мертаны уг яра, дыр.

 

 Анна Плотникова.

Анна Плотникова.

Анна Плотникова — Удмуртиысь калык артистка:

— Культурая училищеез йылпумъяй 1990-тӥ аръёсы. Зол дышетскимы. Мон со аръёсты выльысен берыктысал на. Сыӵе шудо вакытъёс вал. Котькуд нунал тон маке выльзэ тодӥськод, котькуд выль нотаен крезьгуро дуннеез паськытгес но яркытгес усьтӥськод. Нырысь вакытэ мыным секыт йӧтӥз. Мукетъёсыз крезьгуро школа бере татчы вуэмын, нотаосты лыдӟыны быгато. Мон, гуртысь потэм ныл, соос сьӧры уйиськыны выри. Пӧрмытӥ ведь, малы ке шуоно туж зол шудэме потэ вал баянэн. Собере эшшо мылкыды лӧптӥз, мукет инструментъёс но чиньыосылэсь кылзӥськыны кутскизы шуыса. Дышетскыны мылкыды аслэсьтым бадӟым вал, но дорлэсь мӧзмон но маза ӧз сётылы. Оло, соин ик училищеысен ик кырӟан гожъяны кутски гурт, анай сярысь. Тросэз ӵош дышетскем эшъёсы культурае ӧз вамыштэ, озьы ке но ми соосын пыраклы эшъёс луимы, кусыпъёсмы али но уг ышо. Тау кылъёс вераме потэ вань дышетӥсьёслы. Котькудӥз соос пӧлысь милемды визьнодаз, бадӟым улонэ вамыштыны юрттӥз. Тани  мынам дышетӥсьёсы Виталий Юрьевич Семёновых но Надежда Семёновна Полякова котькуд ар дунъясьёс сямен пырисько «Кырӟа но шуд, удмурт арган» фестиваль-конкурсэ. Та адямиослэсь малпанзэс мон котьку ик лыдэ басьтӥсько. Тау соослы.

Галина Семёнова

Удмурт Дунне
By Удмурт Дунне 1 декабря, 2015 13:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<