«Удмуртия» издательство нылпиослы 11 ӝӧк выл шудон поттӥз

Удмурт Дунне
By Удмурт Дунне Декабрь 24, 2015 12:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Берло дыре «Удмуртия» издательство чебересь книгаосын гинэ уг паймытъя — пичиослы удмурт кылэз дышетыны, асьме историмес тодыны юрттӥсь кыӵе но ӝӧк выл шудонъёс уг лэсьты! Яркыт тусо, визьмо пуштросо.

_DSC0003

3 аресъем нылпиосты но вань маин гочатыны. 11 ӝӧк выл шудон пӧлын кыӵеез но ӧвӧл!

Куд-ог анай-атайёс ӝожтӥсько: нылпиосмес анай кыллы туж дышетысалмы, но удмурт шудонъёс ӧвӧл. Издательствое вуыса, валаськод: 3 аресъем нылпиосты но вань маин гочатыны. 11 ӝӧк выл шудон пӧлын кыӵеез но ӧвӧл! Соос дышето буёлъёсты тодманы, предложениос кылдытыны, выль кылъёсты тодыны, лыдӟиськыны но трос мукетызлы. Ваньмыз таос, Нациосын ужан политикая министерство юрттэмен, пото бере, соку ик нылпи садъёсы вуо, книга вузан магазинъёсы уг сюро. Но издательстволэн лавкаяз вузасько ик.

Синмаськыса басьтӥ огзэ. «Кин сайкатоз шундыез?» нимаське. Авторез — Удмуртиысь дано журналист, издательствоысь валтӥсь редактор Георгий Грязев. Вить аресъем пие, яркыт суредам картаез адӟыса, кияз соку ик кутӥз кубик. Сое лэзьяса уго, шунды дорозь сюрес вамышен-вамышен лёгоно. Пумитэ кинэз но уг сюры: вумурт, кӧттырмостэм купеч, Идна батыр, ачиз корась тӥр. Шудон уго пыкиське удмурт калыклэн мадёсъёсыз но выжыкылъёсыз вылэ. Пие соку ик юалляськыны кутскиз отысь геройёс сярысь. Мадёсъёсты тодӥсьтэмезлы татын ик валэктонэз но сётэмын, кин луэ соиз я таиз герой, кыӵе выжыкылысь со басьтэмын, кытысь шедьтыны луоно быдэссэ лыдӟон понна. Эсьма, пие выжыкылзэ но лыдӟыны ёртӥз. Озьы тӥни шудыса гинэ ӧм буйгалэ, выжыкылэн но матэгес тодматским.

Георгий Грязев со сяна но шудон малпам на. Таиз «Алнашысен Ярозь» нимаське. Кубик куяса, 3-4 кузя пиналъёс ӵошатско: Алнашысен кутскыса, кин ӝоггес вуоз Яре.  Озьы  одӥг  шудон пыр пиналъёс быдэс элькунэнымы тодматско.

Туннэ Россиысь одӥг йӧскалык издательстволэн но таӵе шудонъёсыз ӧвӧл. Соин ик «Удмуртия» книгапоттониын ужасьёс, кытчы ке палэнэ потыкузы, калыкен пумиськыкузы, адӟытонъёсы вуыкузы, ваньзэ соосты сьӧразы куто. Паймыса-гочаса учкисез туж трос.

— Туэ вуылӥмы Башкортостанысь, Татарстанысь, Пермь улосысь удмурт гуртъёсы. Отысь садъёсазы вуттӥмы шудонъёсмес. Воспитательёс шумпотыса эктыны дасесь вал. Та выллем шудонъёс уго ӧвӧл, — шуэ издательстволэн кивалтӥсез Юрий Кузнецов.

Воспитательёс понна шудонъёс — зэмос юрттӥсьёс. Ижысь К. Герд нимо гимназилэн бурд улаз ужась садысь воспитатель Алёна Устинова верамъя, ӝӧк выл шудонъёс визьноданын бадӟым инъет луо, соосын огкадь тунсыкъясько ӟуч но, удмурт но пиналъёс.

Анай-атайёслы но со юрттэт луоз. Дуныз но туж шумпоттэ — кылсярысь, «Алнашысен Ярозь» шудонэз издательствоын 50 манетэн басьтыны луэ. Нош пуштросэз макем узыр но яркыт! Коть ӟуч, коть удмурт, коть бигер нылпиослы кельшоз со! Бордаз ик уго ӟуч кылын но валэктэмез вань, кызьы шудоно шуыса.

— 5 ар ӵоже арлы быдэ 2-3 шудон поттӥськом. Вуоно арлы дасямын ни 3 шудон, — шуэ Юрий Кузнецов.

Ас вакытаз школаын ужам, али издательствоын учебникъёс поттон понна кыл кутӥсь редактор Татьяна Воронова 8 шудон малпаз. Со шуэ:

— Азьвыл ноку ӧй малпалля, ӝӧк выл шудонъёс кылдытон борды басьтӥсько шуыса. Ужея ӵемысь пумиськылӥсько методистъёсын, учебникъёслэн авторъёсынызы. Книгаосты эскерыку, отысь быдэстыны косэм ужъёсты учкыку, таосъя таӵе-таӵе шудон лэсьтыны луэ шуыса, йырын малпан чилектэ.

Йӧскалык политикая министерство ужпум пуктӥз: тужгес пичиосызлы кылмес дышетонъя шудонъёс дасяно. Со туж секыт уж. Нылпи уго уг быгаты на лыдӟиськыны. Но Глен Доман тодосчилэн, нейрофизиологлэн системаезъя нуныосыз но лыдӟиськыны дышетыны луэ. Шудон пыр покчи мурт суредъёсты-букваосты йыраз кельтэ. Лыдӟиськыны быгатӥсьтэм пиналъёслы шудонъёс суредъёсын но кылъёсын карточкаосын узыр. Соосты огазеяса, пинал вераськонзэ узырмытэ, предложениосты радъяны дыше.

Туж тросэз потэ суредась бордысь, шӧдэ-а со пиналлэсь пуштроссэ.

— Суредаськись авторъёсмы пӧлысь пусйыны кулэ Наталья Исаеваез, Александра Гладышез. Туж аспӧртэмлыко суредасьёс Николай Быков, Александр Васильев, Алексей Кузнецов,  дизайнер Валентин Семёнов.

Таослэн ужъёссы шоры учкыса, шудонъёсты кие кутыса, пичи дыр тодэ лыктэ. Ми дышетскыку, таӵе удмурт шудонъёс ӧй вал. Тодон-валанъёсыз отысь-татысь бичаса-сӥсъяса, дышетскимы. Та шудонъёс нылпиослэсь дышетскыны мылкыдзэс ӝутыны кулэ, — шуо издательствоын ужасьёс.

Елена Сараматова

Туспуктӥз А. Горбунов

 

 

 

 

 

Удмурт Дунне
By Удмурт Дунне Декабрь 24, 2015 12:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<