Тол бабайлэн кузьмаськонэз, пуж-пуж йӧл кыскон но быдэс гуртэн шулдыръяськон

Удмурт Дунне
By Удмурт Дунне Декабрь 30, 2015 09:59

Ува

Пуж-пуж йӧл кыско

Сяртчыгуртысь пудо утисьёс котькинлэсь вазь Выль арез пумитазы.

Ленин нимо эштос ёросын азьветлӥсь луэ. 9-тӥ декабрьлы 6 сюрс килограмм йӧл поттӥзы. Гужем вакытэ сямен нуналлы быдэ котькуд скаллэсь 19 литр йӧл кыско. Йӧл вузанлэсь бадӟым барыш поттыны быгатэмзы кунян гид пуктыны юрттӥз. 9-тӥ декабре ик хозяйствоысь кунян сюдӥсьёс выль гидэ ужаны потӥзы.

Алнаш

Кузьым люкылӥз Тол бабай

23-тӥ декабре Алнаш стадионын Тол бабайлэн кузьымез понна куасэн бызьылонъя ӵошатскон ортчиз.

Таӵе ӵошатскон кыкетӥ арзэ радъяськиз. Куасэн бызьылӥсьёс кужымзэс эскеризы эстафетной спринтын. Ужрадэ пыриськизы 100 пала спортсменъёс.  Вормисьёс радэ тросгес шедизы Алнашысь спортъя нылпи школаысь пиналъёс (тренерзы Николай Богданов).

Ужрадэ пыриськыны быгатӥзы организациос но. Кужымзэ эскериз ёрос администрациысь 3 команда. Ӵошатсконэ пыриськем спортсменъёсты Тол бабай ческыт кузьымен куноятӥз.

Дэри

Быдэс гуртэн шулдыръясько

Дэри ёросысь Пичи Венья (Вуколуд) гуртысь клубын быдэс декабрь толэзь жин вазе ини — «Вуколуд кенакъёс» ансамбльзылы 19-тӥ  толсуре 15 ар тырмиз.

Отын кырӟась нылкышноос со дыр куспын кытчы но ӧз вуэ ни!

Декабрь толэзе ик та гуртын клубзэс усьтон дырысен 1 ар тырмиз. Гурт калык табере уг ёрмы ни люкаськон интылы.  Клубен кивалтэ Светлана Зайцева. Та лыдпусэз но «Вуколуд кенакъёс» ӟеч пусйизы, гурт калыклы бадӟым концерт возьматӥзы. Али соос  саесъёссэс пужалляса ик Выль арлы дасясько.

Шаркан

Кӧня, кӧня «маймылъёс»

Туэ 23-тӥ декабрёзь Шаркан ёросын 245 пинал вордскиз, нош кӧня вордскемъёс вылӥллям Маймыллэн араз пӧртэм вакытъёсы?

Тросгес пинал вордӥське ке, иське, улонмы умоя, шуиськомы. Ёрос загсын ужасьёс паймымон лыдпусъёсын тодматӥзы. Тужгес трос нылпиос вордскиллям вылэм 1932-тӥ арын — 1 сюрс 462 нылпи. Отӥяз лыдпусъёс вошъясько: 1944-тӥ арын — 301 пинал, 1956-тӥ арын — 1 сюрс 8 нылпи, 1968-тӥ арын — 495 мурт, 1980-тӥ арын —  439, 1992-тӥ арын — 392, 2004-тӥ арын — 253 пинал. Учкомы ни, кӧня «маймыл» вордӥськоз Шаркан ёросын вуоно арын.

Дэбес

«Шудбур» — гаражын

Выль ар вуэмъя калыклы ӟеч мылкыд сёто Дэбес черкогуртысь «Шудбур» ансамбльын кырӟасьёс.

Соос черкогуртысь предприятиосы, гуртъёсы потало, культура юртъёсын сяна, фермаосын но гаражъёсын ужасьёс доры концертъёсын вуыло.

— Выль арлэсь вуэмзэ туж юн шӧдӥськом ини, ми, ужась калыкез шулдыртыса, нуналаз 4-5 концерт сётӥськомы, — верало задор-капчи мылкыдо «шудбуръёс». — Асьмеос но паймиськом, декабрь шорысен кутскыса, 28 интыын кырӟамы-верамы ини, вож кызэз ӝуатӥмы. Шумпотыса вераны быгатӥськом, милемлы туэ шуд усиз «Элькуновидение» пыриськыны. Нош арганчиосмы Удмурт Льӧмысь «Льӧмпу сяськаос» ансамблен Москваысь удмуртъёслэн Герберазы, «Битва хоров» конкурсэ вуылӥзы. Соин сэрен, лэся, калык милемыз эшшо ӟечгес тодӥз, ялан доразы ӧте.

Кез

Юрттӥсьёс

Ёросысь 6 мурт полициын ужасьёслы юрттӥське.

Та вакытэ шаерамы кылдытэмын 63 калык дружина но 4 огазеяськон, отчы пыриське 3 сюрс пала адями. Туэ ар куспын соос 643 ужрадын югдурез эскеризы, 27 йыружез сэрттӥзы. Кез ёросын калык дружина 2006-тӥ арын кылдытэмын. Отчы 6 мурт пыриське. Ёросын ортчем 12 бадӟым ужрадэз чаклазы. Та нуналъёсы ёросысь депутатъёс туэлы йылпумъянъёс лэсьтӥзы, нимысьтыз тау каризы казакъёслы но охраная нимаз предприятиосын (ЧОП-ын) ужасьёслы. Угось ӵапак соос кылдытыны юрттӥзы калык дружинаез.

Красногорск

Корказы луоз шуныт

Кокман черкогуртысь 7 семья Выль арзэ выль коркан пумиталоз.

Куашкан калэ вуэм юртъёсын улӥсьёс понна 3 выль корка ӝутэмын. Солы 6,8 миллион манет висъямын вал. Черкогуртын чагыр эстӥськон кыскемын ӧвӧл бере, ваньмаз юртъёсы гуръёс пуктэмын, выль юртэ пыремъёс ичигес пу быдтозы, эстэм гурзылэн шунытэз кемагес возиськоз.

Сюмси

Лымы дунне

Ёрос центрысь огазеяськонъёс азбаръёссэс шулдыртӥзы лымы мунёосын.

Ёросысь огазеяськонъёс пӧлын Выль арлы дасяськонъя вожвылъяськон ортче. Декабрь толэзь пумын ёрос центр выжыкыл дуннелы пӧрме: турлы буёло гирляндаос пишто, ульчаосы лымы мунёос кылдо. Выль ар вожвылъяськонын вормисе потӥзы бадӟым мешокен Тол бабай но Колобок. Та ужез дэмен быдэстӥзы ёрос администрациысь дышетонъя управлениын но нылпи творчествоя юртын ужасьёс. Кыкетӥ инты сётэмын Сюмси муниципал кылдытэтлы но егитъёслэн «Светлана» центрзылы. Куинетӥ интые потӥзы Сюмси ёрос больница, культурая управление, калыклы юрттэт сётонъя центр.

 

 

 

 

Удмурт Дунне
By Удмурт Дунне Декабрь 30, 2015 09:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<