Т. Душенкова: А. Шумиловалэн кылбуръёсаз улӟо пӧртэм пуштросъёс

Удмурт Дунне
By Удмурт Дунне 22 декабря, 2015 14:16
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
ksxcep`y 'nyj

К. Галиханов «Лычсузён».

Анастасия Шумилова кылбуръёссэ гожъя аслыз ачиз, ассэ валан понна. Чырсатэм нянь шумес выллем соос бугырскыса пото пушкысьтыз.

Сборникез нимаське «Дыр-эктон» (ӟуч кылэ берыктэ «Пляска времени /Дрожь» шуыса). Кылъёсын шудэмез татын  ик адӟиське ни. Огшоры «дыректон» кылэз гинэ уг куты, лыдӟись ачиз пӧртэм пуштросъёсты усьтыны, йырзэ тӥяны кулэ.

Кылбурчи лыдӟисез эктон пала берыктэ. Нош малпаськоно ке, эктон, М. Маковскийлэн верамезъя, куриськонлэн (молитвалэн) туж вашкала формаез луэ. Эктон пыр астэ усьтон, веран — со Инмарлы вазиськон. Сопал дуннеен герӟаськем маке. Соку ик син азям пуксё  удмурт суредасьлэн, архитекторлэн К. Галихановлэн «Лычсузён» («Экстаз») суредэз но ӟуч художниклэн Л. Бакстлэн С. Дягилевлэн сезонъёсызлы лэсьтэм сценической костюмъёсын суредъёсыз. Эшшо татын одно ик тодэ ваёно А. Белыйлэсь «Символизм как миропонимание» статьязэ, кудаз со эскере крезьгурлэсь но, эктонлэсь но пуштроссэс. Солэн малпамезъя, символ но крезьгур герӟаськемын. Крезьгур усьтэ символэз. Крезьгур улӟытэ действиез — эктонэз. Эктон пыӵамын поэтлэн вираз. Эктон — со сыӵе ик кылбуран, творческой акт. Экстазэ пырыса, со берга, берга кылъёс пӧлын («Эстӥськонлэн эстетикаез», «Гурезьгыркын эктонъёс», «бызе Тибр, бызе Нил, бызе Чупчи шур…»).

А. Шумиловалэн кылбуръёсаз улӟо пӧртэм пуштросъёс, соос вордско пумтэм космической крезьгурлэсь, пӧртэм ассоциациос кылдыто. Соин но, вылды, предложениосыз бадӟым букваен уг кутско. Озьы быдэс сборник  пумтэм-йылтэм малпанлы укшаны кутске. Туж ӵем кылбуръёсыз тазьы кылдо: кыӵе ке юан пуктэмын, собере со борды вылысьтыз вылаз валэктонъёс ватсамын. Куддыръя малпаськод: мар эшшо ватсаны луоз на? Кыӵе ассоциация бордазы тупа на? Соос вуберган кадь кыско пушказы. Одӥгез кылбурез вылтусызъя озьы ик гожтэмын — лыдӟемъя воронка пушкы сямен выйиськод («мон кылё вылысьтым дэремме, чулкаме…»).

А. Шумиловалэн героиняез понна кылбуран — секыт адӟон («секыт адӟон ветлэ соос сьӧрын, / соос сьӧрын, кин кылбурен улэ…»), героиня быземын кылбуранлы.

Та егит кылбурчиез гожъян манерезъя ӵошатэм потэ Л. Ореховаен но С. Матвеевен. Со Л. Нянькиналэн героиняез кадь уг вылтӥяськы, кыӵе ке рольёсты шудыса уг эскеры. Со ассэ валаны тырше. Аслэсьтыз пушсэ, малпанъёссэ чакла. А. Шумиловалэн героиняез ассэ ачиз кылдытэ (учке «Синучкон азьын», «Идентификация» кылбуръёссэ).

Туала вакытэ кылбурчиос синтаксической куронъёсты ӵемысь тӥяло. Татын но озьы ик. И. Бродский но озьы гожъяське вал. Анастасия сое дышетӥсьёсыз пӧлы пыртэ («кин-о тодэ? тодэ, дыр, Лосев Лев / но Бродский тодыны кулэ Иосиф»).

Дыр сярысь валан сборникын луэ валтӥсез. Угось соин кутске сборниклэн нимыз, солы сӥземын трос кылбуръёсыз. Поэт пӧртэм ласянь со шоры учке, аслыз валэктыны тырше («ӧвӧлтэм часлэн туйвуам веньёсыз…», «мар вал азьло, вералозы…», «кыллэсь берлань, отчы…» кылбуръёс).

Тунсыко лэсьтэмын удмурт бестиарий. Отчы пыро пӧртэм пудо-животъёс, кылчинъёс: муш, кылдысин, юсь, кучыран, крезьчи, шушы, ӵӧж, ош, койык, вал, вукузё, азьдага, зэрпал, палэсмурт, гондыр, кион…

Малпасько, «Дыр-эктон» кылбур сборник тросэзлы шыпыт лыдӟиськон ваёз, ассэ усьтыны но валаны дыр сётоз, мур пуштросэныз сюлэмез дыректытоз. А. Шумилова туж зол гожъяське. Мон оскисько, та нылаш удмурт поэзиез выллане ӝутоз.

Татьяна Душенкова

 

Удмурт Дунне
By Удмурт Дунне 22 декабря, 2015 14:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<