Россилэн Президентэз Владимир Путин 12-тӥзэ вазиськиз Федерал Собранилы

Удмурт Дунне
By Удмурт Дунне 4 декабря, 2015 10:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Владимир Путин вазиськонзэ мытӥз Сириын нюръяськись ожгарчиосмылы тау каронэн: соос кышкатэк пырисько быдэс дуннелы кышкытлык кылдытӥсь террористъёсын нюръяськонэ. Люкаськемъёс, шып сылыса, буре вайизы Су-24 самолётын бырем пилотэз О. Пешковез, К. Мурахтин лётчикез утчакуз бырыны шедем А. Позыничез. Георгиевской залэ ӧтемын вал бырем ожгарчиослэн кузпалъёссы.

754491357725877

Россилэн Президентэз В. Путин: нимаз луимы ке — быромы, огазеяськимы ке — кужмо луомы.

— Терроризмлэсь выжызэ порылонын Россия кемалась ини азьпал радын, — кужмо куараен вераз Президент. — Та сьӧсьёс странамес зуркатыны ӧдъязы 1990-тӥ аръёсы. Асьмеос соосын нюръяськонмес арысь аре паськытатӥмы, Россия соослэсь сузямын ни, шуыны луоз. Но мукет кунъёсын соос воксё эрказмемын. Паймытэ Турция: террористъёсын нюръяськем интые, соослы уксёен, ож тӥрлыкен юрттэ, мувӧйзэс лушкем басья. Террористъёсты быдтыны быгатомы, быдэс дуннеен огазеяськыса гинэ.

Посланиын бадӟым саклык висъяськиз кунмылэсь экономиказэ ӝутонлы. Зэм, югдур капчи ӧвӧл, но вормымон. Ӵапак дырыз кунысьтымы  производствоез паськытатыны. Бадӟым пайда вайыны юрттозы экономикаен герӟаськем проектъёс: В. Путин нимысьтыз вазиськиз Правительстволэн Тӧроезлы Д. Медведевлы, проектъёсты эшшо но ӝоггес быдэсъяны юрттӥсь ёз кылдытыны курыса.

Президент тау кариз гуртоослы — соос, пе, тыршо котькинлы адӟем карымон, нокыӵе шуг-секытъёс шоры учкытэк.

— Дышимы вал ни кунгожсьӧр сиён-юон вылын улыны, — шуиз В. Путин. — Нош табере Россия — экспортёръёс радын. Кылем арын, кылсярысь, гурт удысын поттэм вузэз палэнэ келяса, 20 миллиард доллар пала табыш поттыны быгатӥмы. 2020-тӥ арозь асьмеос вань ӝажыосмес тырмытыны кулэ асьме сиён-юонэн. Озьы вамыш бӧрсьы вамыш арысь аре ӝутскоз калыклэн улонэз, азинскоз кунмылэн экономикаез. Азьлань мыноно ке, сюрес усьтӥське ук! Одӥг интыяд лёгаськыса но кышкаса гинэ сылоно ӧвӧл.

Но гуртэз азинтон понна куд-ог ужрадъёс кутоно луоз. Миллион гектаръёсын бусыос пашмо — кузёоссы соос сярысь вунэтӥзы. Со вие ик уноез хозяйствоос музъемлы ёрмо. Таӵеез луыны кулэ ӧвӧл, шуиз В. Путин. Со вазиськиз Кун Думаысь депутатъёслы: пӧрмостэм кузёослэсь музъемзэс талано, аукцион пыр вузано но  гурт ужен рос-прос вырись адямиослы сётоно. Та законэз Кун Думаысь депутатъёс юнматыны кулэ ни вуоно арын сӥзьыл, косӥз Президент.

Калыкез эмъян, дышетон удысъёс сярысь веракуз, Владимир Путин пыкъяськиз 2012-тӥ арын юнматэм указъёсыз вылэ. Отын валтӥсь интыын — калыклы юрттон, соин ик котькуд кивалтӥсь вань сюлмыныз тыршыны кулэ соосты быдэстыны, шуиз Президент. Ӟечен пусйиз со демографиез но: вордскись нуныослэн лыдзы шумпоттэ.

— Шӧдӥськиз кыкетӥ я куинетӥ-ньылетӥ нылпи ваем понна сётӥськись анай капиталлэн пайда ваемез, — шуиз В. Путин. — Но вуоно арлэн пумаз со йылпумъяське. Мон ӵектысал та программаез эшшо 2 арлы нуйтыны. Кунмылэн азьлань улонэз будӥсь нылпиосмы бордын.

Президентлэн Федерал Собранилы вазиськонэз котьку сямен ик лад-лад, котькинлы: кивалтӥсьлы но, огшоры калыклы но — валамон чузъяськиз. Косонъёс люкылэмын пӧртэм удысъёсъя: соос бордын ик тыршоно луоз федерал центрлы но, улосъёслы но. Президент трос пол пусйиз: котьку лыдэ басьтоно калыклэсь мылкыдзэ.

Владимир Владимирович вазиськонзэ йылпумъяз тодмо учёнойлэн Дмитрий Менделеевлэн Россия сярысь кылъёсыныз:

— Нимаз луимы ке — быромы, огазеяськимы ке — кужмо луомы. Та сярысь асьмелы ноку вунэтоно ӧвӧл.

Елена Никитина

Удмурт Дунне
By Удмурт Дунне 4 декабря, 2015 10:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<