Пӧртэм калыкъёслэн Тол бабайёссы

Удмурт Дунне
By Удмурт Дунне Декабрь 30, 2015 11:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль ар азьын пичиез но, бадӟымез но оске Тол бабайлы — ваньмызлэн потэ шудогес луэмзы, кузьым басьтэмзы. Мар бен, малпанды быдэсмыны быгатоз — угось Тол бабайёс табере трос. алигес тани Иже куное вуылӥзы Великий Устюгысь Дед Мороз, Татарстанысь Кыш бабай, Мордовиысь Якшамо Атя, Карелиысь Паккайне но мукетъёсыз. Соос ваньзы дэмен ӝуатӥзы Ижысь Шор площадьысь вож кызэз, собере дэмен ик пыриськизы «Тол бабай дорын куноын — выжыкылысь геройёс» фестивале.

Тол бабай

_DSC3028

Тол бабайлэн бодыяз юнматэмын койык йыр.

Куд-огез юалоз но, дыр: малы Удмуртиысь Тол бабайлэн шубаез бусӥр?  Шаркан ёрослэн буёлэз со. Ӵапак тапалан улэ Тол буба. Азьвыл со Мыддорин (Титово) гуртын улэ ке вал, 2012-тӥ арысен Шаркан черкогуртэ выжыяськиз, калыклы эшшо но матэгес кариськиз.  Резиденцияз вуыса, пичиез но, бадӟымез но выжыкыл дуннее сюре. Толэн-гужемен куноос дорысьтыз уг бырыло. Паймыны гинэ кыле на: кӧлыны но дырыз сюре меда Тол бабайлэн? Тушо ке но, ачиз но пичиосын ӵош шудэ-серекъя, пӧртэм мастер-классъёсы пыриське, гурезьысь нискыла. Бодыез борды кутскыны но ӟечсэ сӥзьыны мылкыд карисьёс туж трос. Соин ик Тол бабайлэн юрттӥсьёсыз вань. Одӥгез соос пӧлысь — Лымы ныл: сильтӧл сое лымы пырыослэсь чильпаз-керттӥз. Муспотон дыды юрттӥське куноосты пумитаны. Тол бабайлы куддыр люкетэмзы потэ лек кужымъёслэн. Соосын нюръяськыны секытгес луылэ. Соин ик Тол бабай ортчиз гуртъёстӥ, синйылтӥз шулдыръяськыны яратӥсь, капчи мылкыдо Сандыр агаез. Сандыр агай табере юрттӥське инкуазез утьыны, выжыкылъёс люканы. Тол бабаен ӵош со быдэс гужем котыръя удмурт гуртъёсты, люка калык кырӟан-веранъёсты, легендаосты, нош толалтэ соосты нылпиослы маде.

Эсьма, нылпиос асьсэос но выжыкыл гожъяны туж быгато вылэм. Гожъямъёссэс ысто Тол бабайлы, пӧлысьтызы тужгес устооссэ бырйыса, алигес поттэмын «Асьме доры лыктэ выжыкыл» бичет.

Эшшо Тол бабай вераны куриз на: нылпиослэсь гожтэтъёссэс, одӥгзэ кельтытэк, учке, куддыр уйбыт но пуке, соосты лыдӟыса.

— Нылпиос туала вакытэ ноутбукъёс, планшетъёс куро, — шуэ со. — Туж шаплыесь, визьмоесь уга будо соос, ог-огзылэсь адӟем каро, номырлэсь бере кылемзы уг поты.

Нылъёслэсь но пиослэсь вань та куронъёссэс, пе, быдэстыны луоз. Но со понна ӧжытак асьсэлы но тыршоно: ӟеч дышетсконо, анай-атайёссылэсь кылзӥськоно, соослы юрттӥськоно.

Ватсано на: «Сказочная карта России» сайт «Россиысь тужгес устоез выжыкыл герой» конкурс ялӥз. Али мынэ куара сётон. Нырысетӥ интыын — удмурт Тол бабай! Но тӥляд но куарады мултэс уз луы.

Дед Мороз

_DSC3015

Дед Морозэз син азе пуктыны уг луы Снегурочкатэк.

Дед Мороз ачиз но вераны уг тоды ни, кӧня солы арес — бадӟым горд пӧзьыосыныз тушсэ маялтыса, серектэ гинэ: 2 сюрс арес тырмонме вазенгес пусйи ни. Нош вордскем нуналыз — 18-тӥ ноябре. Нылпиос асьсэос та нуналэз дэмлазы, со вакытэ, пе, Великий Устюге кезьытъёс вуо, кузёяськыны кутске тол.

Нош тодӥськоды-а, Дед Мороз туала улонлэсь чик бере уг кыльы шуыса? Кылдытэм со аслэсьтыз электрон почтазэ но. Гожтыса эскери отчы — соку ик вазиськиз, ява. Шуэ: али, пе, мон котьку онлайнын. Аслэсьтыз секретсэ но усьтӥз: выль арын вань лушкем малпанъёс одно быдэсмозы, соос ӟечесь, лякытэсь ке. Эшшо со ӵектэ пыриськыны пӧртэм конкурсъёсы но викторинаосы — соос сярысь гожтэмын сайтаз. Конвертэн лэзем гожтэтъёсты но лыдӟытэк уг кельты, арлы быдэ соос ог 200 сюрс пала люкасько.

— Куд-ог нылпиос  адресме уг тодо, — шуэ песятай. — Но конверт вылэ «Деду Морозу» гинэ но гожтыны луэ. Почтаын ужасьёс тодо кытын улэмме, соосын мон туж эшъяськисько.

Паймоно кадь: Дед Морозлэн ку дырыз тырме  меда Интернетэ но учкылыны, гожтэтъёсты но лыдӟыны, пӧртэм шаеръёстӥ, го-родъёстӥ но ширъяны — толон-валлян со вал Самараын, Ригаын, туннэ Москваын ни, нош ӵуказе сое возьмало Томскын. Туэ гинэ ог 40 городъёсы вуылӥз ни! Нош кытчы гинэ кузьымъёс уг келя! Ог арня талэсь азьло со Крыме 20 метръем вож кыз ыстӥз. 2 сюрс 500 иськемез ортчем вож ёлкаез пуктозы Симферопольысь площаде.

Вазен Дед Морозэз пиналъёс возьмало вал Уйпал полюсысь. Великий Устюгын аслэсьтыз резиденцизэ со 1999-тӥ арын усьтӥз. Нырысь аръёсаз отчы тол вылтӥ ог 2 сюрс пала туристъёс вуыло вал, табере — 40 сюрслэсь уно. Озьы та вакытэ но отчы дырто нылпиосын тырмем поездъёс, автобусъёс. Соос возьмало выжыкылэз! Зэмзэ но, Дед Морозлэн резиденциез интыяськемын пужымъёс пӧлысь туж чебер интыын, азбарез усьтӥське гинэ — кутске выжыкылъёслэн сюрессы, отысь кинэ-мае гинэ уд пумита: нюлэсмуртэз, 12 толэзьёсты-вынъёсты, визьмо кучыранэз… Соос пыр ортчыса ни, пумиськыны луоз асэныз Дед Морозэн.

— Вашкала дыръёсысь выжыкылъёсын Дед Мороз нылпиосты лушкалляз, адямиосты кынтылӥз, — ортчемзэ тодаз вае Дед Морозлэн резиденцияз каръяськем визьмо кучыран. — Малы ке сое туж лек кожаллязы. Ярано, 1930-тӥ аръёсы ни кинематограф со сярысь малпанзэ воштӥз, фильмъёсын Дед Мороз Выль ар уе нылпиос доры вуылыны но кузьымъёс люкылыны кутскиз. Со вакытъёсысен Дед Мороз нылпиослэн тужгес яратоно выжыкыл геройзы луиз.

Кыш бабай

Кыш бабай но Кар кызы ярато бигер пужыосты.

Кыш бабай но Кар кызы ярато бигер пужыосты.

Кыш бабай — Тол бабайлэн тужгес матысь бускелез, Татарстанысь луэ. Со пӧртэм кылъёсты тодэ, но ӵемысь вераське бигер сямен. Ӟуч кылэз туж шер поттылэ. Юам солэсь: маин висъяське со мукет бабайёслэсь?

Шуиз:

— Легендая вашкала тюрк калыкъёс улонлэсь выльдӥськемзэ пусйылӥзы тужгес кема кыстӥськись пеймыт уе — 22-тӥ декабре. Лыдъяллязы: та уе вордскиз дунне, инмаръёс понна кыл кутӥсь Тенгре. Толалтэ кивалтылӥз Кыш тенгресе, калыкын сое Кыш бабай шуылӥзы…

А-а, табере валамон: ачиз сярысь вера вылэм таид, иське, со — тол инмар, кыл кутылӥз Выль арез шулдыр пумитан понна. Куное котьку ӧтьылӥз эшъёссэ: Кар кызы яратоно нылзэ, Шурале нюлэсмуртэз, Су Анасы вумуртэз но трос мукетъёссэ. Шулдыръяськонъёссы кыстӥськылӥзы 1-тӥ январёзь.

Кыш бабайлэн дӥсез бигер пужыосын чебертэмын, йыраз ӵемысь нуллэ тюбетейка. Кар кызы нылыз туж ӵем пӧра чак-чак, балиш, соин утялтэ Кыш бабаез но эшъёссэ.

Мукет бабайёс сямен ик, Кыш бабай но толалтэ нылпиосты дораз ӧтча, соосын шудэ-шулдыръяське. Йырвизьзэс сынаны, визьноданы но вуттӥське. Кылсярысь, юа: Россиысь кыӵе бабай-ёсты тӥ тодӥськоды? Жаляса верано, нылъёс но пиос Великий Устюгысь ӟуч бабаез сяна уг тодо.

— Компьютерен ваньды эшъяськиськоды? — соку ик нылпиосты визьманы кутске Кыш бабай. — Оло, ыбылӥськон шудонъёсты гинэ тодӥськоды? Юнме дырдэс эн быдтэ, Интернетын али туж трос гожъямын Россиысь выжыкыл геройёс сярысь.

Визьман висказ нош ик небӟе, ачиз сярысь мадьыны ӧдъя. Шуэ: выжыкыллы оско нылпиос но, мӧйыос но. Озьы Выль арлэсь азьло дораз лыктӥсьёс пӧлысь ог 70 процентэз пичиос луо ке, январь ӵоже куное курисько ни бадӟымъёс. Таос но лушкем малпанъёссэс быдэстыны куро! Кылсярысь, одӥг егит нылмурт шуиз: туж, пе, потэ шедьтэме ӟеч карт, ужась мед луоз со. Мӧйыгес нылкышно ӝожтӥськиз: коньдонме, пе, банке люкасько вал, нош со банк пытсаськиз — уз-а луы ыштэм ваньбурме кызьы ке берыктыны?

— Мынам канцеляриям ужасьёслэн лыдъямзыя, ог 80 процентэз куронъёс быдэсмо, — шуэ Кыш бабай. — Нош кинлэн малпанэз улонэ уг пыӵа, иське, солэн сокем уг поты вал, мед быдэсмоз шуыса. Яке уг оскы, мон пӧртмаськыны быгатӥсько шуыса.

Бигер бабай интыяськемын Татарстанысь тужгес чебер интые — Арск ёросысь Яна Кырлай гуртэ, Казаньлэсь со ог 60 иськемын. Ӵапак та гуртын куке но улӥз «бигер Пушкин» Габдулла Тукай, та интыосты со тодмо кариз аслаз выжыкылъёсыныз. Кыш бабайлэн улон интыез пичигес, соин ик со куноосты толалтэ гинэ пумитаны быгатэ. Нош ӧтчаськысал, пе, быдэс ар ӵоже.

Кыш бабайлы выль резиденция пуктон сярысь вераськонъёс 2010-тӥ арысен мыно ни. Инты бырйыны ӧз валаллялэ: Казаньын — ӟоскытгес, нош Казаньлэсь палэнын ёросъёсы туристъёслы ветлыны секытгес. Но алигес Арск ёрос администрациысь кивалтӥсьёс бигер бабаез шумпоттӥллям ик: туж чебер инты сюриз, лыкты, Кыш бабай, учкы — тыныд но со кельшыны кулэ. Милям тонэ палэнэ келяммы уг поты.

Озьы Кыш бабайлэн аслаз но лушкем малпанэз быдэсмыны, оло, быгатоз: вуоно арын вордскем нуналаз со туж трос куноосты ӧтёз, соку ик пусъёзы выль корка пыронзэс но!

Якшамо Атя

Якшамо Атялэн улэмез потэ мордваос пӧлын.

Мордваослэн вань таӵе выжыкылзы. Одӥг гуртын улӥз Паруш нимо пияш. Ӧй вал солэн анаез но, атаез но, улӥз матысь ӵыжы-выжыез дорын. Ӟеч дышетскиз, юртъер котырын ваньзэ лэсьтӥз — семьяын одӥг воргорон. Но солэн одӥг лушкем малпанэз вал: кучапиез мед луоз. Выль ар азьын Якшамо Атялы вазиськиз сыӵе куронэн. Конвертсэ почта ящике куштэмез бере гинэ малпаськонэ усиз: гожтэтэ мордва кылын, нош Якшамо Атя сое лыдӟыны валалоз меда?

Вуиз 31-тӥ декабрь. Быдэс нунал возьмаз Якшамо Атяез, но со ӧз вуы — пияш ӝожмыт мылкыдын кӧлыны выдӥз. Но часъёс 12 пол шуккизы гинэ — ӧс азе вуизы Дед Мороз но Снегурочка. Нош со вакытэ ик вырйылысь адӟиськизы Якшамо Атя Ловонь Стирьне нунокеныз. Якшамо Атя — бадӟым тушо, вылаз ыж кулэсь вурем шубаен. Кык бабайёс куспазы споръяськыны кутскизы: кудзылы ӟечкылано пияшез? Котькудзэ валаны луэ: Якшамо Атя аспал пиналъёсыз доры кузьымен ветлыны кулэ, Дед Морозэз но возьмало быдэс Россиысь нылпиос. Но огкылэ вуизы: ӵошен ӟечкылалозы!

Парушез ӵукна сайкатӥз кучапи, нырзэ нюлыштыса. Озьы мордваослэн выжыкыл геройёссы туж эшъяськыса уло. Туннэ но соос нылпиос доры ӵемысь ӵошен вуыло.

Но мордва бабай ачиз сярысь туж ик вераны уг яраты — сайтэз но ӧвӧл, онлайнын но уг пукы. Оло, кӧтыз ӝожен? Угось солы вордскем палъёсаз корка пуктыны коньдон ӧз сюры. Отысь кивалтӥсьёс шуизы: нырысь ик дасяськоно футболэн шудонъя дуннелэн чемпионатэзлы. Ортчоз со 2018-тӥ арын. Но Якшамо Атялы пыдйылчие кыльыны ӧз сётэ артэ Ульяновск улосын. Кузоватовск ёросысь Кивить черкогуртэ пичигес сэрег висъязы. Отын угось арлы быдэ ортчылэ «Песни матери-земли» шулдыръяськон, отчы ог 5 сюрс пала туристъёс вуыло.

Кылӥськиз ни: Иже, Шаркан ёросэ вуылэмез бере Якшамо Атя нош ик ӝожомемын: аслаз юртэз мед ик луоз вылэм! Но Кузоватовск ёросысь культурая ёзын ужасьёс шуо: ми тыныд зэмос терем пуктом, Якшамо Атя, отчы одно ӧтём быдэс Россиысь тол бубаосты!

Паккайне

Паккайнелы туш ӧз поты на.

Паккайнелы туш ӧз поты на.

Карел семьяын пи вордске ке, анай-атаез шуо: таиз экемы Паккайне кадь мед луоз: чебер, капчи мылкыдо, котьмалы усто. Паккайне — тол бубаос пӧлысь тужгес егитэз. …Ой, ачиз гинэ медаз кылы вал, сое бабайёс пӧлы пыртӥм шуыса — кин тодэ, оло, вожзэ поттоз. Угось солэн ӧвӧл кузь тушез, уг нуллы ыж кулэсь шуба — Паккайне туж чакла туала модаез.

Легендая Олонец городэ ярмаркаысь берытске вал купеч семья. Кезьыт золгес но золгес чепылляны кутскиз. Купечлэн кӧто кышноез ӧз чида ни, сюрес вылын ик пинал вайиз. Со вал 1-тӥ декабре. Вордскиз таза пияш, бӧрдыны ӧдъяз со доразы вуэмзы бере гинэ. Сюрес вылын кезьыт куазен дунне вылэ потэмзэ лыдэ басьтыса, пияшез Паккайне нимазы, карел кылысь ӟуче берыктыса, Морозец луэ. Паккайне туж адӟем карымон эмеспи луиз. Нимаз ужбергатонэн но вырыны дыр шедьтэ. Карел нылъёслэсь-кышноослэсь чильпамъёссэс мукет городъёсы вуза, нош со интые вайылэ ческыт сиёнъёс. Туж яратэ пӧртэм шаеръёсты котыръяны. Кытчы гинэ уг вуы, соку ик синучкон азьын берга, чеберъяське.

Азьло вакытъёсы сямен ик, али но Паккайне вордскем нуналаз туж трос куноосты ӧтча. Уката сӥё-дано пумита быдэс Россиысь тол бубаосты. Верам ни ук: удмурт Тол бабай но со доры туэ ветлӥз.

Элина Кумачёва

Туспуктӥз А. Горбунов

Паккайнелэн туспуктэмез басьтэмын:ptzgovorit.ru

 

Удмурт Дунне
By Удмурт Дунне Декабрь 30, 2015 11:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<