Покчи геройлы «За спасение погибавших» медаль сётӥзы

Удмурт Дунне
By Удмурт Дунне 9 декабря, 2015 13:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Л. Касимовалы медаль сётэ А. Бастрыкин.

Л. Касимовалы медаль сётэ А. Бастрыкин.

Россиысь Следствиея комитетлэн кивалтӥсез Александр Бастрыкин 9-тӥ декабре Иже вуылӥз. Кунысьтымы геройёслэн нуналзылы сӥзьыса,  со Балезино ёросысь Андрей Касимовлэн анаезлы Любовь Валерьяновналы «За спасение погибавших» медаль сётӥз.

Кылем арын октябрь толэзь пумын шаерамы гудыртӥз кӧшкемыт ивор. Балезино черкогуртысь нюлэскын 11 аресъем Александралэн но 13 аресъем Андрейлэн мугоръёссы шедьтэмын. Следовательёс тодӥзы: нылпиосты быдтэм черкогуртысь ик азьвыл пытсэт сьӧрын пукылэм Константин Русских. Андрей сузэрзэ вань кужмыныз утьыны вырем. Но сьӧд сюлэмо воргорон ки улын бырыны шедизы ачиз но, сузэрез но… Таин валче Россилэн Президентэз В. Путин Андрейлэсь кышкасьтэм луэмзэ медален пусйиз.

— Югдурез утён удысын 1995-тӥ арысен ужасько ни, — вераз А. Бастрыкин. — Туннэ нуналозь паймемысь уг дугдӥськы куд-ог адямиослэн сьӧсь луэмзылы. Сыӵеослы мурт улонэз талан кышкыт ӧвӧл. Ярам, Балезиноысь йыружез следовательёс ӝог шараязы. Педофил быдэс улонзэ ортчытоз кечат-вамат укно сьӧрын.

Бастрыкин медаль бырттыку, Любовь Касимовалэн бамыз кузя синкылиос васькизы. Нылкышно тау кариз, пиезлэсь кышкасьтэм луэмзэ сӥлы каризы шуыса.

«За спасение погибавших» медаль сётэмын Россиысь 3 нылпилы: Удмуртиысь, Татарстанысь, Москва улосысь. Андрей сямен ик, та пиналъёс кышкатэк утизы мурт улонэз. Татарстанысь пияш выйыны кутскем тэшкылиез поттӥз. Москва улосысь пи утиз эшъёссэ ульчаысь йыртэмасьёслэсь. Бастрыкин верамъя, арлы быдэ кунамы 20 сюрс нылпи ыше, 15 сюрссэ эриктэмало, 3 сюрсэзлэсь улонзэ талало. Соин быдэ вуымтэослы туннэ бадӟым саклык висъяно.

— Та вакытэ кышкыт йыружъёс ульчаын ӧжытгес пумиськыло, — шуэ Александр Бастрыкин. — Адямиез виисьёс, вӧсь карисьёс ӵыжы-выжыоссы, тодмооссы котырегес кариськизы. Таин сэрен котькудмылы чакласькыса улоно. Бускель коркась я квартираысь жугиськем, черекъям куараос уг шуккиськыло-а? Алигес вал учыр. Быриз нылаш. Бускельёсызлэсь юалляськыны кутскимы но бакомимы: атаез, пе, дыдыез 3 ар пала жугыса возиз. Та сярысь полицейскойёслы вазьгес вераны уг луы вал шат?

Шаерысьтымы Следствиея комитетлэсь ужамзэ Москваысь кивалтӥсь умоен пусйиз. Следовательёсмы кышкыт йыружъёсты бугыръяло. Комитет кузьымъёсын, уксёен юрттэ покчиослы чаклам  Ижысь 10-лэсь ятыр учреждениослы.

— Тросгес кадет классъёс усьтоно! — ӵектӥз Бастрыкин. — Отын нылъёс-пиос будо, вордӥськем палъёссэс гажаса, ог-огзылы юрттон мылкыдын.

Александр Ивановичез шаермылэн кивалтӥсез Александр Соловьёв куспетӥ кариз:

— Милям Вотка городын класс гинэ ӧвӧл — кадет школамы вань!

— Усто! — вазиз Бастрыкин. — Озьыен, кудӥзлы ке кадет класслы сётоно Андрей Касимовлэсь нимзэ. Татарстанын но, Москва улосын но пинал геройёссэс уг вунэто. Соослэн нимъёссы сётэмын школаослы, ульчаослы.

Шаермы но уз вунэты покчи геройзэ. Та нуналъёсы пиналъёс пӧлын шоркарамы мынэ дзюдоя А. Касимовлы сӥзем ӵошатскон. Кенешемын ни: та ужрад республикаямы арлы быдэ 2 пол ортчылоз.

Ольга Корепанова

 

Удмурт Дунне
By Удмурт Дунне 9 декабря, 2015 13:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<