Можгалан ортчиз «Удмурт дуннелы» гожтӥськон ужрад

Удмурт Дунне
By Удмурт Дунне Декабрь 9, 2015 13:01
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

9-тӥ декабре Можга городысь почталэн валтӥсь юртаз трос калык люкаськиз. Татын радъяськиз «Удмурт дунне» газетлы но мукет изданиослы гожтӥськонъя яркыт ужрад.

_DSC0054

Можга ёросысь кырӟась-верась Сергейёс гожтӥськизы «Удмурт дунне» газетлы.

Та выллем пумиськон нырысьсэ ортчиз. Газетлы гожтӥськонъя акциез дасязы Удмуртиысь почта, солэн Можга городысь ёзэз, Можга ёросысь культурая управление но «Удмурт дунне» газет. Ӵукна ик почтае пенсия басьтыны лыктэм песянай-песятайёсты задор мылкыдын пумитаз Можгалась «Октябрь» культура юртысь «Кырӟась сюлэмъёс» ансамбль. Ужрадэз сӥё-дано усьтӥзы Можга почтамтлэн кивалтӥсез Анатолий Молодых, «Удмурт дунне» газетлэн редакторезлэн воштӥсез Елена Миннигараева. Соос веразы газет-журналъёслэн туала вакытэ кулэлыксы сярысь. Нимысьтыз пусъемын вал «Удмурт дунне» газетлэн вань удмурт калыклэн улоназ бадӟым инты басьтэмез. Кызьы сое 100 ар талэсь азьвыл лыдӟизы асьме песянай-песятайёсмы, соослэн анай-атайёссы, озьы ик али но эшлыко кусыпъёс медаз ыше.

«Удмурт дунне» газетъя вераськон туж ӟырдыт но сюлмысь пӧрмиз. Солэсь кулэлыксэ пусйиз Удмурт кун университетлэн Можга городысь ёзэзлэн директорез Татьяна Кибардина. Солэн верамезъя, куд-огез али но ӧпкеле на, выль кылъёс пыртылэмен удмурт кылын лыдӟиськыны секыт шуыса. Но со токма ӝожтӥськон, газетлэсь палэнскон муг гинэ. Выль кылъёстэк огъя удмурт кыл уз азинскы, нош асьмелы азьлань мыноно, анай кылмес утёно, удмурт изданиослы одно гожтӥськоно!

Гожтӥськон ужрадэз сӥё-дано усьтӥз Можга почтамтлэн кивалтӥсез А. Молодых. .

 

— Малпасько, татчы люкаськиз удмурт культура, литература понна сюлмыныз висись калык, — вераськонэ итӥськиз Можга ёрос библиотекалэн кивалтӥсез Светлана Сидорова. — «Удмурт дуннелэн» 100 аръем историез ӵоже асьмеос ӵош вамышъям. Милям но библиотекамы котьку «Удмурт дуннелы» гожтӥськылӥз, юбилеезлы сӥзьыса, туэ трос пӧртэм ужрадъёс ортчытӥм. Но жаляса верано, ёросамы газетлы гожтӥськисьёс ялан ӧжытгес луо. Талэсь мугзэ шуг валаны, оло, лыдӟиськон культурамы лябгес. Но мон туж курисько: ойдолэ ӵош кариськыса улом, удмурт газетлы гожтӥськом!

Сыӵе кельше, вераме ик уг луы!

Кыӵе мылкыд кельтӥз Можга почтамтын «Удмурт дуннелы» сӥзем акция?

Пачылась мылкыдзэ возьыны ӧз чида Бадӟым Учаысь библиотекаын ужась Полина Романова. Ачим, пе, мон школаын удмурт кылэз дышетэмын ӧвӧл. Но лыдӟиськыку шедись валантэм кылъёс нокыӵе ик уг пото, лыдӟиськемъя ваньмыз интыяз пуксе, валамон луэ ук.

П. Романова тау каре журналистъёслы.

П. Романова тау каре журналистъёслы.

— Сыӵе кельше «Удмурт дунне» газет, кыл но уг шедьтӥськы вераны. Туж жалясько, сое ӧжыт адями лыдӟе шуыса. Удмурт журналистъёслэн сомында тыршемзы, бызьылэмзы буш луэ кадь потэ. Та пумысен сыӵе сюлэм висе, — шуэ Полина Трофимовна. — Басьтэлэ «Удмурт дуннеез», уд жалялэ. Кызьы меда улӥськоды, сомында тунсыко иворез тодытэк, сыӵе статьяосты лыдӟытэк? Нош отысь мае гинэ шедьтыны уг луы! Тани али бырись гуртъёс сярысь гожъяло, сое лыдӟыса, пуш тыре. Отын улӥсь адямиосты адӟыса, сюлэм шумпотонэн пачыла. Сыӵе гуртъёсты, адямиосты шедьтэмзы понна «удмурт дуннеослы» йыбырттэм потэ. Нокыӵе ӟуч изданиысь сыӵезэ уд лыдӟы! Мынам кемалась ини «Удмурт дуннеысь» журналистъёслы тау кареме потэ вал, туннэ сыӵе луонлыке кылдӥз.

Ужрадэ лыктэм адямиос, кема сылӥзы ке но, кошкыны ӧз дыртэ. Тани калык азе потӥз «Вить кырњась сюлэмъёс» коллектив. Соосты адӟыса, пенсизылы кожем ӟуч песянайёс но малы вуэмзэс вунэтӥзы, лэся. Зэм, вить Сергейёс интые, кырӟаз ньылез гинэ, одӥгез висьыны усем. Но тае нокин ӧз шӧды кадь. Кырӟамзы вискын ик Сергейёс «Удмурт дунне» газетлы гожтӥськизы. Сьӧразы пумен кыстӥськизы мукетъёсыз но. Ӝоген почтаын подписка лэсьтӥсь нылъёс котыре бадӟым черод люкаськиз. «Удмурт дуннелы» гожтӥськем котькуд адями та нуналэ пичи кузьымен — вуоно арлы календарен, синпель книгаен — бертӥз.

_DSC0094

«Кырӟась сюлэмъёс» ансамбльысь кенакъёс гожӥсько газетлы.

Россиысь Почталэн Удмуртиысь ёзэзлэн газет-журналъёслы гожтӥськонъя но вӧлмытонъя отделэзлэн кивалтӥсез Ольга Митрошина:

— Та выллем ужрадэз ортчытон сярысь дэмланэн ми вазиським республикаысьтымы вань изданиослы. Но вазиськизы «Удмурт дунне» газетын ужасьёс гинэ. Сюлмамы соку ик туж шуныт луиз. Россиысь Почталэн историяз таӵе ужрад нырысьсэ вал. Со туж ӟеч ортчиз!

Можгалась почтамтлэн кивалтӥсез Анатолий Молодых:

— Кышкаськом вал, калык уз люкаськы шуыса. Собере, кутскон азямы ни, сюлмаськыны ӧдъям: калык укыр трос вуиз ке, почтае гинэ тэром-а? Малпаськом ни вал артысь нылпи творчествоя юртэ выжыны. Но ваньмыз радъяськиз кадь, ӟоскыт шуыса, нокин ӧз ӝожтӥськы. Ужрад туж шулдыр ортчиз. Тау кареме потэ Можгаысь культура удысысь ужасьёслы, «Удмурт дунне» газетлы.

Можга ёрос администрацилэн йырызлэн социальной ужпумъёсъя воштӥсез Марина Сарычева:

— Мон оскисько, та ужрадлэн пайдаез азьланяз но шӧдӥськоз ай. Угось пумиськонэ Можга ёросысь 30 библиотекарьёс лыктӥзы. Валамон ук, туала секыт улон дыръя адямиос ваньзы ик уг быгато газет-журналъёслы гожтӥськыны. Со понна ик кулэ библиотекаос. Соос но, малпасько, таӵе яркыт ужрад бере «Удмурт дуннелы» гожтӥськозы. Мон ачим но туннэ Вуж Какси муниципал кылдытэтэ подписка лэсьтӥ. Отын милям мӧйыослэн «Инвожо» коллективзы вань. Соос юбилейзэс пусъё. Малпасько, «Удмурт дуннелы» гожтӥськон — соослы туж ӟеч кузьым. Эшшо «Удмурт дуннелэсь» чебер календарьзэ басьтӥ на, отчы «Вить Сергейёс» кинюртэмзэс пуктӥзы. Эк, шумпотозы ук песянайёсмы!

Можга городысь «Октябрь» культура юртысь чеберлыкъя кивалтӥсь  Наталья Перевощикова:

— Мон 30 арлэсь кема ужасько ни удмурт культура удысын, «Удмурт Кенешлэн» ужаз пыриськисько, удмуртлыкез туж яратӥсько. Соин ик удмурт кыл понна кӧты-сюлмы висе. Можгалась «Выль даур» удмурт газетмылы быдэс коллективенымы гожтӥськиськом. Нош туннэ ваньмы «Удмурт дуннелы» гожтӥськом. Ачим мон «Удмурт дуннеез» вань улытозям басьтӥсько ни, анаелэн но со ӝӧк выл газетэз вал.

 

Елена Васильева

Туспуктӥз А. Горбунов

Удмурт Дунне
By Удмурт Дунне Декабрь 9, 2015 13:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<