Кытчы кариськоно? Вузъёсты огазеян сярысь ужпум ӝутэмын

Удмурт Дунне
By Удмурт Дунне Декабрь 22, 2015 11:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

сараматоваРоссиысь Дышетонъя но наукая министерство улосвылъёс азе ужпум пуктӥз: вузъёсты огазеяса, кельтоно огзэ я кыксэ, соос мукетъёсызлы инъет луозы. Таин валче Россиын 2020-тӥ арозь ог 40 процентэз вузъёс но соослэн 80 процентэз филиалъёссы пытсаськыны быгатозы.

Воштӥськонъёс возьмало Удмурт шаерез но. Опорной вуз кылдытонъя нимысьтыз комиссия ужа. Югдурез син шораз возе Удмуртилэн Тӧроез Александр Соловьёв. Зэм, выль сямен дышетыны пумитъяськисьёс трос. Но та пумысен Александр Соловьёв меӵак шуиз: опорной вуз кылдытом, со пумысен ченгешонэз ӧвӧл.

вузъёсты огазеян понна нимысьтыз конкурс пыр потоно. Радъя сое Россиысь Дышетонъя но наукая министерство, со чаклалоз, макем тупа соиз я таиз вуз опорной луыны. Удмуртиысь дышетонъя но наукая министр Алексей Мирошниченко верамъя, Приволжск федерал округысь  7 вуз конкурсэ пыриське ни. Кировын гуманитарной но технической вузъёссы огазеяськизы ни. Та сярысь малпасько Башкортостанын, Самара, Оренбург улосвылъёсын. Огазеяськем вузъёслы азинтӥськон вылысь арлы быдэ висъяськоз быдэн 100 миллион манет.

040292,ИЖГТУ,памятник,вечный студент

Уноез дурбасьто УдГУ-эз но ИжГТУ-эз огазеян пала.

— Кыӵе ке вузлы ватсаса уксё кыскон понна гинэ вылӥ дышетскон заведениосты одӥг липет улэ люкан уг лэсьтӥськы — дышетон удысмес кужмоятон вылысь, — шуэ Алексей Мирошниченко. — Дышетонъя но наукая министерстволэн политикаез — дурбасьтоно, юрттоно юнъёсызлы. Таин споръяськыны луэ, но сыӵе политика ог 15 ар ӵоже шӧдӥське ни.

Россиын вузъёсты огазеян нырысьсэ уг ортчы ни. Нырысь-валысь выризы федерал вузъёс кылдытыны. Татчы асьмеос ӧм пыриське. Отӥяз наукаен но эскерон ужъёсын вырись вузъёслы бадӟым саклык висъяны ӧдъязы.  Артысь Татарстан сояз но, таяз но воштӥськонъёсын ассэ возьматӥз: отын али 1 федерал но 2 научной вуз. Но асьмеос Казанен ӵошатӥськыны но вожвылъяськыны умгес быгатӥське. Табере дыр вуиз опорной вуз кылдытыны. Татын бабеме кыльыны нокызьы уг яра. Конкурсэ ӧм пыриське, опорной вуз быръёнъя огкылэ ӧм вуэ ке, вылӥ образование басьтыны секытгес луоз.

Туннэ Россиын бюджетысь дышетон удыслы  висъям уксё пӧлысь ог 60-70 процентэз  элита вузъёсты азинтыны кошке. Опорной вузъёслы бадӟым саклык висъяськыны кутскиз ке, соослы ик тросгес коньдон лыктоз. Барыш вуэмысь дугдӥз ке, наукаен вырисьёс кулэсмозы, кадръёс пегӟыны шӧталозы. Солэсь но бадӟымгес кышкытлык вань: Дышетонъя но наукая министерство учредитель сямен быгатоз вузъёслэсь диссертациос утьыны правозэс таланы, докторантураез но аспирантураез ворсаны, магистръёсты дасянъя интыосты кулэстыны. Тазьы луиз ке, тодосчиослы асьсэлы тунсыко уз луы ни ужаны — кошкозы. Тодон-валан сётӥсь учреждениос маке выльзэ пыртон сярысь уз сюлмаське, маке тунсыкоез сьӧры уз уйиське. Озьыен, вуз колледжлэсь уз висъяськы ни. Со кышкатэ.

081878,город Ижевск,УДГУ,памятник Пушкину

Кызьы кылдытоно опорной вуз?

Бадӟым юан: кызьы кылдытоно опорной вуз? Туннэ уноез ректоръёс та юанлы валэктон сётыны, сыӵе малпанэн тэрытӥськыны дась ӧвӧл. Ваньзы шуо: опорной вуз мед луоз. Но огзы но кин ке борды кариськыны уг дырто, котькудӥзлэн валтӥсь луэмез потэ, — шуэ Алексей Мирошниченко.

Кун Кенешысь Наукая, дышетонъя, культурая но егитъёсын ужан политикая комиссиен кивалтӥсь Наталья Сударикова верамъя, туала вакытэ кин гинэ экономистэз но юристэз уг дася ни. Соин ик вузъёсты огазеян сярысь ужпумез ӝутыны кулэ ни. Зэм, та ужез тыршоно вӧсь карытэк лэсьтыны. Ижысь медакадемия, гурт удысъя академия асьсэлэсь статуссэс медаз ыштэ шуыса, одно малпаськоно. Таосты ас вакытазы юнме ӧз кылдытэ, соос гинэ асьсэ удысазы юн кулэ луись специалистъёсты будэто, шуэ Наталья Сударикова. Кылсярысь, медакадемилэн ректорез Николай Стрелков мукет вузъёсын огазеяськонлы пумит. Ӟеч эмъясь луон понна дышетскем гинэ уг тырмы, рос-прос практика но кулэ на, шуэ. Нош огазеяськимы ке, ыштонъёс адӟыны быгатомы, лыдъя со. Медакадемия но гурт удысъя академия пумысен Александр Соловьёв кенешыны чакла министерствоосын, таосты возьыны азьланяз уксё мед висъяськоз шуыса.

Нялтас вераса, Россиысь вузъёс пӧлын асьме вузъёс умой адӟисько. Москваысь ужъя рынокез эскеронъя центр алигес нимысьтыз юалляськон ортчытӥз, вузъёсты йылпумъям специалистъёс макем ӵем удыссыя уже интыясько, макем ӟеч тодон-валанзы. Озьы Россиысь гурт удысъя 47 вуз пӧлын Ижысь академия 19-тӥ интыын. Тазалыкез утён удысысь специалистъёсты поттӥсь 56 заведение пӧлын асьме медакадемия 21-тӥ интыын. Инженеръёсты дасясь 140 заведение пӧлын ИжГТУ 39-тӥ интыын.

Азьланез сярысь сюлмасько студентъёс но. Воронежын, кылсярысь, экономистъёсты дасянъя факультетсэс пытсазы. Ог 2 сюрс студент кыре кылиз.

— Кыӵе вузъёсты огазеян сярысь тол но тулыс ӵоже малпаськыны дыр вань, — шуэ Алексей Мирошниченко. — уноез дурбасьто УдГУ-эз но ИжГТУ-эз огазеян пала. Таос борды Глазовысь пединститутэз герӟаны малпасьёс вань. Но пединститутэз таос борды пыртыны шонер уз луы, со воксё палэнын интыяськемын. Котьма ке но та югдурын дыртыны уг яра — ваньзэ мертано на.

 

 

Удмурт Дунне
By Удмурт Дунне Декабрь 22, 2015 11:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<