Ку зэмзэ вордӥськиз Трокай?

Удмурт Дунне
By Удмурт Дунне Декабрь 2, 2015 12:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
_DSC0128

1891-тӥ арын 18-тӥ ноябре (выль стилья 1-тӥ декабре) Вятской губерниысь Елабуга уездысь Алнаш волостьын Кузьма Карпович но Меланья Фёдоровна кузпалъёслэн крестьян семьяязы шумпотон вуиз — вордӥськиз пизы. Солы Трофим ним сётӥзы.

Удмурт калыклэн дано пиезлэн Трофим Борисовлэн вордӥськем нуналыз пумысен берло дыре валамтэос кылдӥзы. Угось пӧртэм интыосысь пӧртэм гожтэмез адӟыны луэ.

Солэсь улон-вылонзэ, архивъёсын пукыса, рос-прос эскериз  историк Никифор Павлов. «Трофим Борисов» книгаяз со гожтэ: «1891-тӥ арын 18-тӥ ноябре (выль стилья 1-тӥ декабре) Вятской губерниысь Елабуга уездысь Алнаш волостьын Кузьма Карпович но Меланья Фёдоровна кузпалъёслэн крестьян семьяязы шумпотон вуиз — вордӥськиз пизы. Солы Трофим ним сётӥзы». Н. Павловлэн вань гожтэмъёсаз пыр-поч валэктэмын, кытысь, кыӵе архивъёсысь басьтэмын со лыдпус. Пусъемын, Татарстанысь кун архив вылэ пыкиськемын шуыса. Но «Удмуртская республика» книгаын, паймоно кадь, Трокайлэн вордӥськем нуналыз воксё мукет (19-тӥ ноябрь) пусъемын, ссылка Никифор Павловлэн книгаез вылэ сётэмын ке но.

Уно аръёс ӵоже архивъёсын ужам писатель Николай Кузнецов дурбасьтэ Никифор Павловлэн книгаяз сётэм ивортонлы. Со пусъе: Трокаез репрессировать карыку вань допросъёсын солэн аслаз киыныз гожъям анкетаосыз вань. Ваньмаз вордӥськем нуналыз 1-тӥ декабре шуыса гожтэмын. Нялтас вераса, Николай Спиридоновичлэн «Шимес пеймытысь», «Из мрака» книгаосысьтыз Трокайлэн киыныз гожтэм анкетаез адӟыны луэ. Зэм но, 1-тӥ декабрь шуэмын.

Озьы ке но юанъёс таин гинэ уг йылпумъясько. Та нуналъёсы «Мынам Удмуртие» ТРК Трофим Борисов сярысь трос вералляз. Пусйиз, вордӥськем нуналыз выль стилья 30-тӥ ноябре шуыса. Малы? Вазиськиськом Удмуртиысь кун архиве. Татысь документъёсты кутонъя отделэн кивалтӥсь Светлана Некротюк вера: метрикая книгаын пусъемын, Трофим Борисов 18-тӥ ноябре вордӥськиз шуыса. Кыӵе нунал со луэ выль стилья, шонергес, пе, валэктозы загсын. Пусйиз на созэ но: паймоно кадь, берло дыре Трокай Борисовен тунсыкъяськисьёслэн лыдзы йылӥз.  Загсысь правоя но кадръёсъя отделэн кивалтӥсь Надежда Столбова пыр-поч валэктӥз ни: 1901-тӥ арозь вордӥськемъёслэн нуналзы борды ми, выль стилья карон вылысь, 12 нунал ватсаськом, нош со бере ке — 13. Трокаез басьтоно ке, 18 вылэ 12 ватсано луэ. Пӧрме 30-тӥ ноябрь. Но, Надежда Леонидовналэн ик верамезъя, улонын пӧртэм сямен луыны быгатэ. Ачиз адями ассэ 1-тӥ декабре гожтэ бере, озьыен, соку ик пусъёно.

Трокай Борисовлэн юбилеез шаерамы нырысьсэ рос-прос пусъемын вал 2011-тӥ арын «Удмурт Кенеш» огазеяськонлэн кичӧлтэмезъя. Кӧня ке бадӟым ужрадъёс ортчизы  Удмурт Республикалэн Президентэзлэн бурд улаз. Радъяськизы пӧртэм конкурсъёс, «Трокай» фестиваль, конференциос, Борисовлы сӥзем лыдӟонъёс, пумиськонъёс. Трокайлэн юбилеезлы сӥзьыса ик, чакламын вал дано удмурт пимылы синпелет пуктыны. Зэм, сое лэсьтон пичияк ӝегаз. Синпелетэз усьтӥзы, ар ортчыса гинэ. Но туннэ калыкмылэн одӥгез тужгес дано пиез, Удмурт автономиез кылдытӥсь, удмуртъёс понна вань лул-сюлэмзэ сётэм политик, тодосчи,  врач йӧн-йӧн сылэ Ижысь Коммунаръёслэн ульчаязы, тодэ вайытэ элькунмылэсь кылдонзэ, бугырес историез. Удмурт калыкез югдытон но Удмурт Элькунмес кылдытон понна Трокай вормонтэм трос лэсьтӥз. Кыӵе нуналэ асьмеос пусъём вордӥськонзэ — 30-тӥ ноябре-а, аслаз гожтэмезъя 1-тӥ декабре-а, сокем бадӟым пӧртэмлыкез ӧвӧл, дыр. Ачиз гинэ ялан сюлмамы мед улоз. Трокай сярысь вордскем нуналаз гинэ ӧвӧл, котьку тодын возёно!

Елена Панфилова

 Туспуктӥз А. Горбунов

 

 

 

Удмурт Дунне
By Удмурт Дунне Декабрь 2, 2015 12:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<