Комиын 4-тӥзэ ортчиз фин-угор егитъёслэн FUROR форумзы

Удмурт Дунне
By Удмурт Дунне 7 декабря, 2015 08:48
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

4-тӥ-6-тӥ толсуре Удмуртиысь, Карелиысь, Комиысь, Мурманск улосысь, Ямало-Ненецкой, Ненецкой, Ханты-Мансийской автономной округъёсысь, озьы ик Финляндиысь но Эстониысь 70 пала егитъёс Комиысь Сёрдла гуртэ но Ёртом черкогуртэ вуылӥзы.

фурор1

Асьме егитъёс Комиын.

Соосыз пумитаны комиос зол дасяськиллям: бадӟымесь коркаоссылэсь кык палъёссэ но эстылӥллям (соослэн юртъёссы 2 люкетлэсь, огпалаз уло гужем, мукет палаз — кезьыт дыръя), шурысь трос ву нуллӥллям (ву но чагыр эстӥськон кыскемын ӧвӧл), урамъёссэс югдытӥллям.

Сыктывкарысен та гуртъёс дорозь 7 час мынӥмы. Котыр нюлэс гинэ, тайга. Писпуоссы сокем ӵем, паймоно, кызьы пушказ губияны но емыш бичаны пырало. Паймим Вашка шурзылэн чылкытэзлы: сое отын быректытэк юо, соин мисьтӥсько но, мисьтасько но. Отысь ик сёмга, хариус но мукет дуно чорыгъёсты кутыло, милемыз нуналлы быдэ чорыгнянен сюдӥзы.

Автобусъёс вуттӥзы Ёртоме, отын ми понна быдэс спектакль дасяллям. Вашка шур вамен выжыса, Сёрдлае вуим. Ог 20 корка кытын шедем сылэ, нокыӵе кенеръёс, урамъёс ӧвӧл..

Умой-а, алама-а, но удмуртъёс, мукет ӵыжы-выжы калыкъёсын ӵошатыса, азьпалан, соин та форум соослы кыӵе ке ӵыж-выль малпанъёс ӧз сёты, шуыны луоз. Комиос открыткаосын герӟаськем тунсыко проект малпаллям — соос фин-угор посткроссинг кылдытыны ӵектӥзы. Ма со? тодмотэм адямиос ог-огзылы открыткаос мылкыдзэс ӝутон яке тодматскон вылысь ысъяло. посткроссинг быдэс дуннеын вӧлмемын. Фин-угор посткроссинг кылдӥз ке, удмурт дизайнеръёсмылэн но ужзы йылоз, дыр.

фурор

Вашка шур вамен выжыса, Сёрдлае вуим.

Тросэз веразы сайт лэсьтон пумысен малпанзэс, сайтэ, пе, мед луысал интыяны фин-угор кылъёсын вань шудонъёсыз — дышетӥсьёс но воспитательёс соосыз капчиен шедьтыны быгатозы. Эстонъёс егитъёслы фин-угор крезьгуръя фестиваль радъяны малпало, вакчияк веразы, кыӵеен сое адӟо. Но вань та малпанъёс азьвылгес но шараямын вал ни. Нош фильмъёсты но мультфильмъёсты кылдытон но берыктон бордын, удмуртъёс сяна, мукет фин-угоръёс уг выро на.

Синмаськыса одӥг малпанэз кылзӥмы. Комиын вань школаосын одно ик коми кылэз дышетыны кулэ, адямилэн выжыез шоры учкытэк. Нылпилы коми кыл секытэн сётӥське ке, со быгатэ мыныны библиотекае, отын дорысь уж лэсьтыны юрттӥсь нимысьтыз курсъёс радъясько.

Вераны кулэ на, азьвыл аръёсын ӵошатыса, туэ форуме вуылӥзы тросгес пичи калыкъёс: хантыос, ненецъёс. Соослы таӵе ужрадысь басьтэм малпанъёсты улонэ пыӵатыны шуг. Хантыослэн огъя алфавитсы гинэ но ӧвӧл. Литературной походъёс, вордскем кылын шудонъёс но киноосыз берыктон — соос понна льӧль малпан. Ненецъёслэн но со выллем югдурзы. Ог-огзылэсь кыдёкын улэменызы, улон интызэс ӵем вошъяменызы, огъя проектъёс бордын ужаны нокинлы.

Но таӵе пумиськонъёс луыны кулэ. Отын тодматскиськод мукет калыкъёсын, дышетскиськод трос адямиос азьын доклад лыдӟыны, пӧртэм темаосъя кенешыны… Озьы ик пусйытэк уг луы: FUROR туннэ нуналлы — одӥг гинэ сыӵе форум, кудаз вань мылкыд карись фин-угор егитъёс вуылыны быгато, со понна кыӵе ке огазеяськонэ одно пыроно ӧвӧл.

Елена Рябина

Туспуктэмез авторлэн

Удмурт Дунне
By Удмурт Дунне 7 декабря, 2015 08:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<