Кин гожтӥз «Пичи вож кыз» кырӟанэз?

Удмурт Дунне
By Удмурт Дунне 23 декабря, 2015 10:00

Пиналъёсын дышетэммы потэ «Пичи вож кыз» кырӟанэз. «В лесу родилась ёлочка» ӟуч кырӟанэз ас вакытаз кин ке удмурт кылэ берыктэм. Утчаса-утчаса кылъёссэ но, авторзэ но нокызьы ум шедьтӥське. Оло, «удмурт дуннеос» юрттозы?

Сюмси ёросысь лыдӟисьёс

Кыз котырын бергамон-эктымон кырӟанъёс сокем ик трос ӧвӧл. Вашкала дыръя соос воксё но ӧй вал, шуыны луоз. Соин но 1903-тӥ-1905-тӥ аръёсы гожтэм «В лесу родилась ёлочка» кырӟан туж тодмо луиз. Кылъёсыз Раиса Кудашевалэн, крезьгурез атаезлэн Леонид Бекманлэн. Сое удмурт кылэ кин ке берыктэм но, дышетӥсь но методист Гавриил Федотов 1949-тӥ арын дасям «Букваряз» со кылъёсыз печатлам. Но отын авторез пусйымтэ.

— Удмурт радиолэн хорысьтыз нылкышноос 1950-тӥ аръёсы сое кырӟаллязы, — вера «Удмуртия» ГТРК-ысь азьвыл крезьгуръя редакторын ужам Леонид Гусев. — Но та кырӟан рос-прос выжыяськыса ӧз вутты.

Туала вакытэ нылпи садъёсын сое тодазы ик уг вайыло. Садъёсын но школаосын «Нюлэскы ми ветлыса» кырӟанэз ӵемгес быдэсто. Таизлэн кылъёсыз но нылпиос понна капчиенгес сётӥсько, лэся.

Леонид Гусев малпамъя, «В лесу родилась ёлочка» кырӟанлэсь кылъёссэ берыктӥз писатель Гай Сабитов. Но кин тодэ, оло, авторез воксё мукет. Национальной библиотекаысь йӧскалык но шаертодонъя литературая но библиографияя центр-лэн кивалтӥсез Анна Семёнова верамъя, азьвыл аръёсы книгаез дасясь ачиз ик произведениосты удмурт кылэ берыктылӥз. Соин ик 1949-тӥ арын потэм «Букваре» кыз сярысь кырӟанэз ачиз Г. Федотов берыктӥз, оло.

Национальной библиотека юрттэмъя тодмо луиз: пӧртэм аръёсы пӧртэм авторъёс та кырӟан бордын ужаллям. 2002-тӥ арын со «Удмурт дунне» газетын печатласькиз. Авторез пусъемын ӧвӧл. Нош 2003-тӥ арын декабрь толэзе «Ӟечбур!» газетын Ижысь Семён Петров гожтэ: та кырӟанэз ачим, пе, 1970-тӥ арын берыктӥ вал. Куинез ик вариантъёс ог-огзылэсь туж ик уг висъясько.

Пичи вож кыз

Тэльын вордскиз пичи вож кыз,
Тэльын ик со будӥз.
Кезьыт толэ но гужеме
Веськрес вож-вож сылӥз.

Солы сильтӧл кырӟаз тазьы:
— Ческыт уммен тон кӧл.
Солэн вылаз лымы пельтӥз:
— Медаз кынты лек тол.

Кышкась пурысь лудкеч тэтча
Пичи кыз котыртӥ.
Пурысь кион лекомыса
Бызе нюлэскытӥ.

Дӧдьы улысь тӧдьы лымы
Ӟукыр-ӟукыр вазе.
Лусьтро пыдо кельыт валмы
Туж дыртыса ворттэ.

Дӧдьы тыраз нуэ со пу,
Отын пересь пуке.
Со выжытӥз ик вож кызэз
Ӵогем — гуртэ вае.

Тани со празднике лыктэм,
Чебер, веськрес сылэ.
Уно пӧртэм шумпотонъёс
Нылпиослы ваем.

Удмурт Дунне
By Удмурт Дунне 23 декабря, 2015 10:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<