«Ижевская винтовка» но шаерысьтымы биатлонлэн азинскемез сярысь

Удмурт Дунне
By Удмурт Дунне Декабрь 28, 2015 09:09
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Та нуналъёсы Ижысь А. Демидов нимо спорткомплексын Россилэн биатлонъя чемпионатэз но кубокез понна нюръяськонлэн оглюкетэз ортче. Иже вуэмын Россиысь 200 пала спортсменъёс.

4sprint

«Ижысь винтовка» ӵошатскон 46-тӥзэ радъяське.

Воштӥськонъёс

«Ижысь винтовка» ӵошатскон 46-тӥзэ радъяське. Табере со огшоры ӵошатскон гинэ ӧвӧл — Россилэн чемпионатэз но кубок понна нюръяськонлэн оглюкетэз. Азьвыл аръёсы тросэз спортсменъёс дорамы ӧз вуылэ, кезьытлэсь кышкаса, али ваньмыз биатлонистъёс понна чакламын. Эсьмаса, тол куазьмы но шунытскиз.

Та ужрадлы Удмуртиын вазен ик дасяськыны кутскизы. Угось бадӟым ӵошатскон ортчытон понна спорткомплекс туала куронъёслы тупаны кулэ. Пуктэмын 30 вакс-кабинаос. Табере котькуд командалы нимысьтыз инты висъяське: тренеръёс куас зырало, спортсменъёс стартлы дасясько.

— Азьвыл аръёсын ӵошатыса, спорткомплексты воштӥськиз. Биатлонистъёсты дасян капчигес радъяське, — шуэ Ханты-Мансийскысь командалэн валтӥсь тренерез Валерий Захаров. — Таӵе кабинкаос тросаз улосъёсын пуктылэмын, соос быдӟалазыя гинэ висъясько. Кылсярысь, Тюменьысь кабинаос бадӟымесьгес, куас дасям сяна, отын спортсмен мисьтӥськыны но быгатэ.

8-тӥ но 6-тӥ

«Ижысь винтовка» эстафетаос бордысен кутскиз. Нырысь ик стартэ потӥзы воргоронъёс. Удмуртилэсь данзэ утизы Евгений Шамаев, Александр Назаров, Аркадий Меньшиков но Олег Кутлубаев. Жаляса верано, пиосмы ыбылӥськонын быдэн 2-3 пол янгышазы, калленгес бызизы. 16 команда пӧлысь 8-тӥ инты басьтӥзы. котькинлэсь кужмо вал Ханты-Мансийскысь но Тюменьысь биатлонистъёс. Вормиз «ХМАО-Югра-2» команда, ыбылӥськонын 8 пол гинэ янгышаз. Кыкетӥ интые потӥзы «ХМАО-Югра-1» командаысь воргоронъёс, соос ватсаса 15 патрон быдтӥзы но 1 круг мултэссэ бызизы. Куинетӥ интые потэм тюменьёс 15 пол кырыж ыбизы но 2 круг мултэссэ ортчизы.

Удмуртиысь нылъёслэн командаязы нырысетӥ но кыкетӥ этапъёсын бызизы Ульяна Кайшева но Валентина Телицина. Ас этапсэс азьмынӥсьёс радын йылпумъязы. Вормонлы оскон куашказ куинетӥ этапысен. Егит Алёна Иванова, нырысетӥ ыбылӥськонын ик 3 пол янгышаса, 1 мултэс круг бызиз, кыкетӥ ыбылӥськонын но янгышъёсыз вал. Ньылетӥ этапын бызись Светлана Бочкарёва но сюрессэ янгышъёстэк ӧз ортчы. 12 команда пӧлысь нылъёсмы 6-тӥ интые потӥзы.

czpy odffj sxzqbd

Медаль понна вожвылъяськонзэс туннэ мытӥзы нылкышноос.

Одӥг нунал шутэтскемзы бере 24-тӥ декабре 20 иськем сюрес вылын кужымзэс эскеризы воргоронъёс.

Стартэ потӥз 99 спортсмен. Нимаз бызьылонын котькуд кырыж ыбем понна 1 минут штраф сётӥзы. Котькинлэсь ӝог финише вуизы Иван Черезов (Тюмень), Сергей Клячин (Пермь) но Семён Сучилов (Ханты-Мансийск), ваньзы соос ыбылӥськонын быдэн одӥг пол янгышазы. Соос бере вуизы Пётр Пащенко (Ханты-Мансийск), Александр Бабчин (Башкортостан), Тимофей Лапшин (Тюмень). Вормисьёслы сяська керттэтъёс кузьмазы Россиысь Биатлонъя союзлэн кивалтӥсез Сергей Костин, Кун Думалэн депутатэз Николай Мусалимов, шаерысьтымы дано спортсмен Галина Кулакова.

Удмуртиысь спортсменъёс пӧлысь 10-тӥ интые ӝутскыны быгатӥз Евгений Шамеев, ыбылӥськонын 2 пол янгышаз, вормисьёслэсь 2 минут 52 секундлы кылиз. Мукет биатлонистъёсмы 54-тӥ, 70-тӥ интыос басьтӥзы. Чик ӧз удалты Ростислав Мусалимовлы гинэ. Кыкетӥ ыбылӥськонысен винтовкаеныз маке луиз. Тупатыны выронъяз трос дырзэ ыштӥз, 12 пол янгышаз на.

Медаль понна вожвылъяськонзэс туннэ мытӥзы нылкышноос. Шаермылэсь данзэ уте 6 спортсмен. Воргоронъёсмылы ӧз удалты бере, оло, нылъёсмы вормонэнызы шумпоттозы. 26-тӥ но 27-тӥ декабре спринт амалъя ӵошатсконъёс луозы. Субботае 12 часын воргоронъёслэн, арнянуналэ 11 час 30 минутэ нылкышноослэн ӵошатсконъёссы кутскозы. Пусйыны кулэ, 26-тӥ декабре 13 часын ужрадэз сӥё-дано усьтон но 4 стартын вормисе потэмъёсты ӟечкылан луоз. Спортэз яратӥсьёс понна ГИБДД-лэн юртэз дорысен биатлонъя спорткомплексэ нимысьтыз автобус ветлоз.

Арысь аре та ӵошатсконлэн данэз будэ. Нимаз бызьылонын но спринтын вормисе потэм 10 кужмо спортсменъёслы очкоос сётӥськозы. Котькинлэсь трос балл люкамъёслы сюрес усьтӥськоз дуннеысь но Европаысь кубок понна нюръяськонлэн ӵошатсконъёсаз пыриськыны.

Можга городысь Ульяна Кайшева Европаысь биатлонистъёслэн вожвылъяськоназы пыриськылэ. Отын вормонъёс басьтэмез понна Ульяналы луонлык сётэмын вал Дуннеысь кубок понна ӵошатсконэ пыриськыны. Но Словениысь Поклюка городын егит спортсменмы 60 кужмоез пӧлы ӧз шедьы.

— Мылкыд ӧжытак куашказ ке но, ортчемзэ уд берыкты, азьпалан ӵуказе нунал, выль вормонъёс. Оском умоезлы, — шуэ Ульяна Кайшева.

DSC_0426

Арысь аре та ӵошатсконлэн данэз будэ.

Ӵыжектон

Та вакытэ спортъя 20 школаын 500 пала пинал биатлонистъёс мугорзэс кыдато, 60-эз биатлонъя школа-интернатын улэ. Россиысь пиналъёс пӧлын асьмелэнъёслэн вормонъёссы вань, нош быдэ вуон вакытазы тросэз соос кытчы ке ышо. Кылсярысь, Иван Черезов Тюменьлэсь данзэ уте, Санкт-Петербургысь 2-тӥ команда понна Удмуртиысь 3 пиос бызьыло: Михаил Бибиков, Яков Некрасов но Геннадий Тимеев, соос биатлонъя школа-интернатын дышетскемын.

Алёна Иванова, Ижысь 30 номеро школаез йылпумъяса, Москваысь вузын тодон-валан люка. Пичи дыръяз художественной гимнастикаен вырем. Залын шоканы секыт луэм но, эмъясьёс ӵектэмъя чылкыт омыре выжем, вуэм куасэн бызьылонъя секцие, отӥяз биатлонэн тодматскем, Николай Хазеев дорын мугорзэ кыдатэм. Шаермылэсь данзэ утё биатлонъя нимысьтыз школаын дышетскымтэ муртъёс. Валентина Назарова Телицина луэмын. Жаляса верано, шаерысьтымы нимо-дано биатлонистъёс Алёна Перевозчикова, Виктор Васильев, Дмитрий Кононов бадӟым спортысь туэ кошкизы.

Удмуртиын бадӟым ӵошатскон ортче шуиськомы ке но, учкисьёс понна ӵыжектоно, соос татын туж ичи люкасько. Адӟем кароно вылэм Ува ёросысь Валентина Яковлевалэсь, Кияса ёросысь Валерий Тихоновлэсь, Дэри ёросысь Байков кузпалъёслэсь. Соос, вань ужзэс куштыса, биатлонэз учкыны лыкто.

Валентина Емельянова

Туспуктэмъёс: sportturizm.udmurt.ru

 

 

Удмурт Дунне
By Удмурт Дунне Декабрь 28, 2015 09:09
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<